Lefatshe Leno Le Lebile Kae?
Mo lefatsheng lotlhe mathata a a masisi le ditiragalo tse di tshosang ke dikgang tsa letsatsi le letsatsi! Seno se kayang?
TSHIRELETSEGO YA GAGO: Go thunya dibomo mo marekisetsong. Barutabana le baithuti ba a thuntshiwa kwa sekolong. Masea a utswiwa batsadi ba one ba sa ntse ba lebile go sele. Basadi le bannabagolo ba tshwarwa poo tadi e amusa.
MAEMO MO GO TSA BODUMEDI: Dikereke di ema nokeng matlhakore a a lwang. Baruti ba bonwe molato mo dipolaong tsa kgailo. Baruti ba sotla bana ka tlhakanelodikobo; dikereke di fitlha seo. Batho ga ba tlhole ba ya kerekeng ka bontsi; dikago tsa dikereke di a rekisiwa.
TIKOLOGO: Dikgwa di a rengwa ka ntlha ya tsa kgwebo. Bahumanegi ba rema dikgwa gore ba bone dikgong tsa go gotsa molelo. Metsi a kgotletswe; go kotsi go a nwa. Ditlhapi di bolawa ke leswe la madirelo le ke ditsela dingwe tsa segompieno tsa go tshwara ditlhapi. Phefo e kgotletswe thata mo e dirang gore batho ba hupelwe.
GO ITSHEDISA: Go begwa gore mongwe le mongwe wa batho ba Afrika e e kwa borwa jwa Sahara o amogela madi a a ka tshwarang R3 070 ka ngwaga. Bopelotshetlha jo bo leng teng mo dikhampaning bo dira gore dikgwebo di we, mme batho ba le diketekete ba latlhegelwe ke ditiro. Boferefere bo dira gore batho ba latlhegelwe ke madi a ba a ipoloketseng botshelo jwa bone jotlhe.
DITLHAELO TSA DIJO: Ka metlha batho ba ka nna 800 000 000 mo lefatsheng lotlhe ba robala ba sa ja.
NTWA: Mo lekgolong la bo20 la dingwaga go sule batho ba feta 100 000 000 ka ntlha ya ntwa. Go na le dibetsa tsa nuklea tse di ka senyang batho botlhe go menagane gantsintsi. Go tletse dintwa tsa selegae. Borukhutlhi bo aparetse lefatshe lotlhe.
MALWETSE A LEROBOROBO LE MALWETSE A MANGWE: Go tloga ka 1918 foluu ya Spain e ne ya bolaya batho ba le 21 000 000. Jaanong AIDS ke “leroborobo le le maswe go a feta otlhe mo hisitoring ya batho.” Kankere le bolwetse jwa pelo di utlwisa batho botlhoko mo lefatsheng lotlhe.
O se ka wa leba fela se dikgang di se buang. A ditiragalo tseo di direga fela kwa lefelong leo ka nako eo? Kgotsa a ke dilo tse di amang lefatshe lotlhe mme di na le sengwe se di se kayang?
[Lebokoso/Setshwantsho mo go tsebe 5]
A Ruri Modimo o a Amega?
Fa batho ba bantsi ba utlwisiwa botlhoko ke ditiragalo tse di tshosang kgotsa fa ba hutsafaditswe thata ke sengwe, ba ipotsa gore ke ka ntlha yang fa Modimo a sa dire sengwe go thibela dilo tse di ntseng jalo.
Modimo o a amega. Gone jaanong o a re kaela e bile o re thusa ka tsela ya mmatota. (Mathaio 11:28-30; 2 Timotheo 3:16, 17) O dirile dithulaganyo tsa go fedisetsa ruri thubakanyo, bolwetse le loso. Dithulaganyo tse a di dirileng di bontsha gore ga a amege fela ka batho ba setšhaba se le sengwe, mme o amega ka batho ba ditšhaba tsotlhe, ditso le dipuo.—Ditiro 10:34, 35.
Go tweng ka rona? A o itse gore Mmopi wa legodimo le lefatshe ke mang? Leina la gagwe ke mang? O ikaeletse go dirang? O araba dipotso tseno mo Baebeleng. Mo go yone, o re bolelela ka dikgato tse a di tsayang go fedisa thubakanyo le bolwetse mmogo le loso. Ke eng se re tshwanetseng go se dira gore re solegelwe molemo? Re tshwanetse go ithuta ka ene le ka maikaelelo a gagwe. Re ka lebelela jang gore re solegelwe molemo ke dithulaganyo tseo fa re sa bontshe tumelo mo go ene? (Johane 3:16; Bahebera 11:6) Gape, go botlhokwa go ikobela ditaelo tsa gagwe. (1 Johane 5:3) A o tsaya matsapa a go dira jalo?
Gore re tlhaloganye gore ke ka ntlha yang fa Modimo a letleletse maemo a a leng teng gone jaanong, re tshwanetse go tlhaloganya kgang nngwe ya botlhokwa thata. Baebele e a e tlhalosa. Mo go tsebe 15 ya boroutšhara jono, go tlotlwa ka kgang eno.