Ba ne “Ba se Ka Ba Tsaya Tsia”

GO SA tseye ditlhagiso tsia go ka felela ka masetlapelo.

Darwin, toropo nngwe kwa Australia, e ne e ipaakanyetsa mekete ya malatsi a boikhutso ka 1974 fa didirisiwa tse di tlhabang mokgosi di ne di tlhagisa batho ka setsuatsue se se neng se atamela. Mme Darwin e ne e ise e ke e senngwe ke setsuatsue mo dingwageng di ka nna 30. Ke ka ntlha yang fa se tshwanetse go tshwenya jaanong? Bontsi jwa banni ba teng ba ne ba sa tseye kotsi eno e le e tota e ka diregang, go fitlha diphefo tse di maatla di simolola go rutlolola marulelo le go diga dipota tsa matlo a batho ba neng ba ikhutagantse mo go one. Mo mosong o o latelang, motse oo o ne o swafetse.

Kwa Colombia ka November 1985, go ne ga runya lekgwamolelo. Kapoko e e neng e gakologa le aese di ne tsa dira gore go tshologe seretse se se neng sa khurumetsa baagi ba ba fetang 20 000 ba toropo ya Armero. A ga go a ka ga nna le tlhagiso go sa le gale? Thaba e ne e na le dikgwedi di le dintsi e roroma. Le fa go ntse jalo, batho ba bantsi ba kwa Armero ba ne ba sa tshwenyege ka gonne ba ne ba tlwaetse go nna gaufi le lekgwamolelo. Badiredi ba ne ba tlhagisiwa gore masetlapelo a ne a le gaufi, mme ga ba ka ba tlhagisa batho. Go ne ga dirwa dikitsiso mo radiong go leka go ritibatsa batho. Kwa kerekeng go ne ga dirisiwa sebuelagodimo go kgothatsa batho gore ba ritibale. Maitseboa, go ne ga nna le go thunya mo go golo mo go neng ga direga gabedi. A o ka bo o ne wa tlogela dithoto tsa gago mme wa tshaba? Batho ba le bantsi ga ba a ka ba dira sepe go fitlha go nna thari.

Gantsi batho ba ba ithutang ka maje ba kgona go bonela pele sentle gore dithoromo tsa lefatshe di tlile go direga kae. Mme ga se gantsi ba kgonang go bonela pele sentle gore di tlile go direga leng. Ka 1999, dithoromo tsa lefatshe di bolaile batho ba ka nna 20 000. Bontsi jwa batho ba ba suleng ba ne ba sa akanye gore seo se ka ba diragalela.

O Leba Jang Ditlhagiso Tse di Tswang Kwa Modimong ka Boene?

Baebele ga e bolo go tlhalosa ka tsela e e utlwalang sentle ditiragalo tse di bontshang gore re mo metlheng ya bofelo. Mabapi le seo, e re rotloetsa gore re akanye ka “malatsi a ga Noa.” “Mo malatsing ao pele ga morwalela,” batho ba ne ba tshwaregile thata ka ditiro tse di tlwaelegileng tsa botshelo, le fa gone go se na pelaelo gore ba ne ba tshwenyegile ka go tlala ga thubakanyo. Mme “ba se ka ba tsaya tsia” tlhagiso e Modimo a neng a e ntsha ka motlhanka wa gagwe Noa, “go fitlha morwalela o tla o bo o ba gogola botlhe.” (Mathaio 24:37-39) A o ka bo o ne wa tsaya tlhagiso eo tsia? A o dira jalo gone jaanong?

O ne o tla dirang fa o ka bo o ne o nna kwa Sodoma, gaufi le Lewatle le le Suleng, mo metlheng ya ga Lote, setlogolo sa ga Aborahame? Naga ya teng e ne e kete paradaise. Motse wa teng o ne o atlegile. Batho ba teng ba ne ba sa tshwenyege ka sepe. Mo metlheng ya ga Lote, “ba ne ba ja, ba ne ba nwa, ba ne ba reka, ba ne ba rekisa, ba ne ba jala, ba ne ba aga.” Setšhaba se ba neng ba nna mo go sone se ne se na le boitsholo jo bo maswe ka tsela e e feteletseng. A o ka bo o ne wa tsaya tsia se Lote a neng a se bua fa a ne a kgala mekgwa eo e e bosula? A o ka bo o ne wa reetsa fa a ne a go bolelela gore Modimo o ikaeletse go senya motse wa Sodoma? Kgotsa o ne o tla tsaya e le motlae fela, jaaka banna ba ba neng ba tlile go nna bagwe ba ga Lote? A gongwe o ka bo o ne wa simolola go tshaba mme wa gadima, jaaka mosadi wa ga Lote? Le fa ba bangwe ba ne ba se ka ba tsaya tlhagiso tsia, mo letsatsing le Lote a duleng mo Sodoma ka lone, “go ne ga na molelo le sulefera go tswa legodimong mme tsa ba senya botlhe.”—Luke 17:28, 29.

Batho ba bantsi mo motlheng wa rona ga ba tseye tsia. Mme dikai tseno di kwadilwe mo Lefokong la Modimo gore di re tlhagise, gore di re kgothaletse go NNA RE DISITSE!

[Lebokoso/Setshwantsho mo go tsebe  22]

A Tota go Kile ga Nna le Morwalela wa Lefatshe Lotlhe?

Batshwayadiphoso ba bantsi ga ba dumele. Mme Baebele yone ya re o kile wa nna teng.

Jesu Keresete ka boene o ne a bua ka one, e bile o ne a tshela ka nako ya fa o ne o nna teng, a o lebile a le kwa legodimong.

[Lebokoso/Setshwantsho mo go tsebe  23]

A Tota Sodoma le Gomora di ne Tsa Senngwa?

Boithutamarope bo supela gore tiragalo eno e diregile.

Hisitori e a e umaka.

Jesu Keresete o ne a tlhomamisa gore tiragalo eno e diregile, mme e umakiwa mo dibukeng tsa Baebele tse di farologaneng di le 14.