‘Nako Ya Go Atlhola’ E Gorogile

TSHENOLO, buka ya bofelo ya Baebele, e re bolelela gore go na le moengele yo o fofang mo gare ga legodimo yo o tshotseng “dikgang tse di molemo tsa bosakhutleng go di bolela e le mafoko a a itumedisang.” O bua jaana ka lentswe le le kwa godimo: “Boifang Modimo lo bo lo mo neye kgalalelo, ka gonne nako ya gagwe ya go atlhola e gorogile.” (Tshenolo 14:6, 7) ‘Nako eo ya go atlhola’ e akaretsa go bolelwa le go diragadiwa ga katlholo ya Modimo. Go diragadiwa ga katlholo e tla bo e le nako ya fa ‘metlha ya bofelo’ e gone jaanong re tshelang mo go yone e fitlha mo bowelong jwa yone. Re tshela mo nakong eo gone jaanong.—2 Timotheo 3:1.

‘Nako ya go atlhola’ ke dikgang tse di molemo mo bathong ba ba ratang tshiamo. Ke nako e Modimo a tla namolang batlhanka ba gagwe ba ba sotlilweng ke tsamaiso eno ya dilo e e tletseng thubakanyo le e e se nang lorato.

Jaanong, pele ga ‘nako ya katlholo’ e felela ka go senngwa ga tsamaiso ya gone jaanong ya dilo e e bosula, re kgothadiwa jaana: “Boifang Modimo lo bo lo mo neye kgalalelo.” A o dira jalo? Seno ga se reye fela go bua o re, “Ke dumela mo Modimong.” (Mathaio 7:21-23; Jakobe 2:19, 20) Go boifa Modimo ka tsela e e tshwanetseng go tshwanetse ga dira gore re mo tlotle thata. Go tshwanetse ga dira gore re tlhoe bosula. (Diane 8:13) Go tshwanetse ga re thusa go rata se se molemo le go tlhoa se se bosula. (Amose 5:14, 15) Fa re naya Modimo kgalalelo, re tla mo reetsa ka tlotlo. Ga re na go tshwarega thata ka dilo tse dingwe re bo re sa bale Lefoko la gagwe, Baebele, ka metlha. Re tla mo ikanya ka dinako tsotlhe le ka dipelo tsa rona tsotlhe. (Pesalema 62:8; Diane 3:5, 6) Ba ba mo tlotlang tota ba lemoga gore ke Mmopi wa legodimo le lefatshe, ke Molaodimogolo wa Lobopo lotlhe mme ba ineela ka lorato mo go ene jaaka e le Molaodi wa matshelo a bone. Fa re lemoga gore re tshwanetse go ela dilo tseno tlhoko thata, a re direng jalo ka potlako.

Gape, nako ya go diragadiwa ga katlholo e moengele a buileng ka yone e bidiwa “letsatsi la ga Jehofa.” “Letsatsi” leo le ne la wela Jerusalema wa bogologolo ka 607 B.C.E. ka gonne banni ba teng ba ne ba sa ikobela ditlhagiso tsa ga Jehofa tse di neng di tlisiwa ke baporofeti ba gagwe. Ka go busetsa letsatsi la ga Jehofa morago mo megopolong ya bone, ba ne ba tsenya matshelo a bone mo kotsing le go feta. Jehofa o ne a ba tlhagisitse jaana: “Le gaufi e bile le itlhaganela thata.” (Sefania 1:14) ‘Letsatsi le lengwe la ga Jehofa’ le ne la wela Babelona wa bogologolo ka 539 B.C.E. (Isaia 13:1, 6) E re ka Bababelona ba ne ba ikantse metse ya bone e e sireletsegileng thata le medimo ya bone, ba ne ba tlhokomologa ditlhagiso tse ba neng ba di newa ke baporofeti ba ga Jehofa. Mme mo bosigong bo le bongwe, Babelona e ne ya gapiwa ke Bameda le Baperesia.

Re lebane le eng gompieno? Le ‘letsatsi le lengwe la ga Jehofa’ e bile e le le legolo go feta a mangwe. (2 Petere 3:11-14) Modimo o atlhotse “Babelona o Mogolo.” Go ya ka Tshenolo 14:8, moengele o bua jaana: “Babelona o Mogolo o ole.” Seo se setse se diragetse. A ka se tlhole a thibela baobamedi ba ga Jehofa. Bosula jwa gagwe le go nna ga gagwe le seabe mo ntweng di senotswe ka botlalo. Jaanong tshenyego ya gagwe ya bofelo e atametse. Ke lone lebaka le Baebele e rotloetsang batho gongwe le gongwe jaana: “Tswang mo go ene [Babelona o Mogolo] . . . fa lo sa batle go tlhakanela le ene mo maleong a gagwe, le fa lo sa batle go amogela karolo ya dipetso tsa gagwe. Gonne maleo a gagwe a koame go fitlha fela kwa legodimong, mme Modimo o gakologetswe ditiro tsa gagwe tsa go tlhoka tshiamiso.”—Tshenolo 18:4, 5.

Babelona o Mogolo ke eng? Ke tsamaiso ya bodumedi ya lefatshe lotlhe e e tshwanang fela le ya Babelona wa bogologolo. (Tshenolo, kgaolo 17, 18) Sekaseka dingwe tsa ditsela tse di tshwanang ka tsone:

• Baperesiti ba Babelona wa bogologolo ba ne ba tseneletse thata mo dikgannyeng tsa bopolotiki tsa setšhaba seo. Go ntse jalo le ka madumedi a mantsi gompieno.

• Baperesiti ba Babelona gantsi ba ne ba tshegetsa dintwa tsa setšhaba sa bone. Gantsi bodumedi jwa motlha wa segompieno bo eteletse pele mo go segofatseng masole fa ditšhaba di ntse di tlhabana.

• Dithuto le ditlwaelo tsa Babelona wa bogologolo di ne tsa dira gore setšhaba seo se wele mo boitsholong jo bo sa siamang. Fa baeteledipele ba bodumedi gompieno ba itlhokomolosa melao ya Baebele ka boitsholo, boitsholo jo bo sa siamang bo dirwa thata ke baruti le ke batho fela. Se sengwe se se tshwanetseng go elwa tlhoko ke gore ka gonne Babelona o Mogolo o itshwere jaaka seaka mo lefatsheng le mo ditsamaisong tsa lone tsa bopolotiki, Tshenolo e mo tlhalosa e le seaka.

• Gape Baebele ya re Babelona o Mogolo o tshelela mo “manobonobong a a sa a tlhabelweng ke ditlhong.” Kwa Babelona wa bogologolo, ba ba okametseng kwa tempeleng ba ne ba reka ditsha tse dikgolo, mme baperesiti ba ne ba tsena thata mo dilong tsa kgwebo. Gompieno, mo godimo ga mafelo a kobamelo a a leng teng, Babelona o Mogolo o na le dikgwebo tse dintsi le dithoto. Dithuto tsa gagwe le malatsi a gagwe a boikhutso di mo humisa thata e bile di humisa le batho ba bangwe ba tsa kgwebo.

• Go dirisa ditshwantsho, maselamose le boloi go ne go tlwaelegile kwa Babelona wa bogologolo, fela jaaka go tlwaelegile mo mafelong a mantsi gompieno. Go ne go tsewa gore fa motho a swa o fetela kwa botshelong jwa mofuta o mongwe. Babelona e ne e tletse ka ditempele le mafelo a kobamelo go tlotla medimo ya bone, mme Bababelona ba ne ba ganetsa baobamedi ba ga Jehofa. Babelona o Mogolo le ene o na le ditumelo tseo le mekgwa eo.

Mo metlheng ya bogologolo, Jehofa o ne a dirisa ditšhaba tse di maatla mo go tsa bopolotiki le mo go tsa bosole go otlhaya ba ba neng ba sa kgaotse go mo itlhokomolosa le go itlhokomolosa thato ya gagwe. Ka jalo Samarea e ne ya senngwa ke Baasiria ka 740 B.C.E. Jerusalema e ne ya ripitlwa ke Bababelona ka 607 B.C.E. le ke Baroma ka 70 C.E. Mme Babelona yone e ne ya fenngwa ke Bameda le Baperesia ka 539 B.C.E. Mo motlheng wa rona Baebele e bolelela pele gore dipuso tsa bopolotiki, go tshwana le sebatana sa naga, di tla tlhasela “seaka” di bo di se dira se se sa ikategang, di senola se seaka seno e leng sone tota. Di tla se senyetsa ruri.—Tshenolo 17:16.

A dipuso tsa lefatshe di ka dira selo se se ntseng jalo? Baebele ya re ‘Modimo o tla go tsenya mo dipelong tsa tsone.’ (Tshenolo 17:17) E tla nna selo sa tshoganyetso, se se gakgamatsang, se se garolang pelo, se se sa bonelwang pele le fa e le go bonwa se atamela.

O tshwanetse go tsaya kgato efe? Ipotse jaana: ‘A ke sa ntse ke ngaparetse mokgatlho mongwe wa bodumedi o o kgotletsweng ke dithuto le ditlwaelo tse di o tlhaolang e le karolo ya Babelona o Mogolo?’ Le fa o se leloko la one, o ka nna wa ipotsa jaana: ‘A ke letleletse moya wa one gore o ntlhotlheletse?’ Moya wa mofuta mang? Moya wa go amogela boitsholo jo bo repileng, go rata dithoto le menate go na le go rata Modimo, kgotsa go itlhokomolosa Lefoko la ga Jehofa (le e leng mo dilong tse di lebegang di le dinnye). Akanyetsa karabo ya gago ka kelotlhoko.

Gore Jehofa a re amogele, go botlhokwa thata gore dilo tse re di dirang le tse dipelo tsa rona di eletsang go di dira, di neele bosupi jwa gore eleruri ga re karolo ya Babelona o Mogolo. Go potlakile gore re dire jalo. Baebele e bua jaana fa e re tlhagisa gore bokhutlo bo tla tla ka tshoganyetso: “Babelona motse o mogolo o tla piriganyediwa kwa tlase jalo a latlhelwa ka bofefo, mme ga a kitla a tlhola a bonwa gape.”—Tshenolo 18:21.

Mme ga se gone gotlhe. Mo karolong e nngwe ya ‘nako eo ya katlholo,’ Jehofa Modimo o tla dirisa Bogosi jwa gagwe jo bo kwa legodimong jo a bo neileng Jesu Keresete, go atlhola tsamaiso ya lefatshe lotlhe ya bopolotiki, babusi ba yone, le batho botlhe ba ba itlhokomolosang tshwanelo ya gagwe ya go busa. (Tshenolo 13:1, 2; 19:19-21) Ponatshegelo ya boporofeti e e kwadilweng mo go Daniele 2:20-45 e tlhalosa puso ya bopolotiki go simolola ka nako ya Babelona wa bogologolo go tla go fitlha jaanong e le setshwantsho se segolo thata se se dirilweng ka gouta, selefera, kgotlho, tshipi le letsopa. Boporofeti joo bo ne jwa bolela jaana malebana le motlha wa rona: “Modimo wa legodimo o tla tlhoma bogosi jo bo se kitlang bo senngwa le ka motlha.” Mme Baebele e bolela jaana malebana le se Bogosi joo bo sa ntseng bo tla se dira mo ‘nakong ya katlholo’ ya ga Jehofa: “Bo tla thubaganya bo fedisa magosi ano otlhe [a batho], mme bo tla ema ka bosakhutleng.”—Daniele 2:44.

Baebele e tlhagisa baobamedi ba boammaaruri gore ba se ka ba rata “dilo tse di mo lefatsheng”—mokgwa wa botshelo o o rotloediwang ke lefatshe leno le le tlhoboganeng le Modimo wa boammaaruri. (1 Johane 2:15-17) A ditshwetso tsa gago le dilo tse o di dirang di bontsha gore ga o na go letla sepe se go thibela go ema Bogosi Jwa Modimo nokeng? A ruri ke jone bo tlang pele mo botshelong jwa gago?—Mathaio 6:33; Johane 17:16, 17.

[Lebokoso mo go tsebe  14]

Bokhutlo bo Tla Tla Leng?

“Ka ura e lo sa akanyeng gore ke yone, Morwa motho o tla ka yone.”—Mathaio 24:44.

“Nnang lo disitse, ka gonne ga lo itse letsatsi le fa e le ura.”—Mathaio 25:13.

“Ga [bo] kitla [bo] tla morago ga nako.”—Habakuke 2:3.

[Lebokoso mo go tsebe  14]

A go Itse Go ne Go Tla Fetola Tsela e o Tshelang ka Yone?

Fa o ne o tlhomamisegile tota gore katlholo e e tlang ya Modimo e sa ntse e saletswe ke dingwaga di sekae gore e tle, a seo se ne se tla fetola tsela e o tshelang ka yone? Fa e le gore bokhutlo jwa tsamaiso eno ya bogologolo ga bo a tla ka nako e o neng o e lebeletse, a o letlile seno sa dira gore o goge dinao fa o direla Jehofa?—Bahebera 10:36-38.

Go bo re sa itse nako go re naya sebaka sa go bontsha gore re direla Modimo ka maitlhomo a a siameng. Ba ba itseng Jehofa ba lemoga gore Modimo, yo o bonang dipelo, ga a na go kgatlhwa ke go nna matlhagatlhaga ka motsotso wa bofelo.—Jeremia 17:10; Bahebera 4:13.

Ka metlha Jehofa o tla pele mo bathong ba ba mo ratang tota. Jaaka batho ba bangwe, Bakeresete ba boammaaruri ba ka nna ba dira ditiro tsa boitshediso. Le fa go ntse jalo, mokgele wa bone ga se go huma, mme ke go nna le dithoto tse di lekaneng le tse dingwe tse ba ka di abelang ba bangwe. (Baefeso 4:28; 1 Timotheo 6:7-12) Gape ba itumelela boitlosobodutu jo bo molemo le go iphokisa phefo, mme fa ba dira jalo ba batla go lapologelwa, e seng fela go dira se batho botlhe ba se dirang. (Mareko 6:31; Baroma 12:2) Jaaka Jesu Keresete, ba itumelela go dira thato ya Modimo.—Pesalema 37:4; 40:8.

Bakeresete ba boammaaruri ba batla go tshela mme ba direle Jehofa ka bosakhutleng. Tsholofelo eo e ntse e le ya botlhokwa le fa ba tshwanelwa ke go letela masego mangwe ka lobaka lo loleele go feta jaaka bangwe ba ne ba lebeletse.

[Lebokoso/Setshwantsho mo go tsebe  15]

Kgang e e Amanang le Bolaodi

Gore re kgone go tlhaloganya gore ke ka ntlha yang fa Modimo a letlelela pogo e e kanakana, re tshwanetse go tlhaloganya kgang ya bolaodi. Bolaodi ke eng? Ke mofuta wa taolo e e kwa godimo thata.

Ka gonne Jehofa e le Mmopi, o na le tshwanelo ya go busa lefatshe le botlhe ba ba nnang mo go lone. Le fa go ntse jalo, Baebele e tlhalosa gore bogologolo mo hisitoring ya batho, bolaodi jwa ga Jehofa bo ne jwa gwetlhiwa. Satane Diabolo o ne a re Jehofa o ne a gagamaditse molao go sa tlhokege, o ne a bolelela batsadi ba rona ba ntlha maaka ka se se tla ba diragalelang fa ba ne ba ka tlhokomologa molao wa Modimo mme ba dira dilo ka tsela ya bone, le gore tota go ne go ka nna botoka fa ba ne ba ka itaola kwantle ga Modimo.—Genesise, kgaolo 2, 3.

Fa Modimo a ka bo a bolaile batsuolodi bao gone fela foo, seo se ne se tla bontsha gore o na le maatla, mme se ne se se na go rarabolola dikgang tse di neng tsa tsoga. Go na le gore Jehofa a bolaye batsuolodi bao gone fela foo, o neile dibopiwa tsa gagwe tsotlhe tse di botlhale sebaka sa go bona diphelelo tsa botsuolodi joo. Le fa seno se dirile gore re boge, gape se re neile sebaka sa gore re tsholwe.

Gape, Jehofa o ne a dira dithulaganyo ka lorato gore batho ba ba tla mo utlwang le ba ba tla bontshang tumelo mo setlhabelong sa thekololo sa Morwawe ba gololwe mo boleong le mo diphelelong tsa jone mme ba tshele mo Paradaiseng, le fa seno se ne se raya gore a latlhegelwe thata. Fa go tlhokega, seno se ka dirwa ka tsogo ya baswi.

Gape, go bo go fetile nako e e rileng pele ga kgang eno e rarabololwa go neile batlhanka ba Modimo sebaka sa go bontsha gore ba ka kgona go anaanela lorato lwa Modimo mme ba itshupe ba ikanyega mo go Jehofa mo maemong otlhe. Go rarabolola kgang e e malebana le bolaodi jwa Modimo mmogo le kgang e e tsamaisanang le yone ya go boloka bothokgami ga batho, go botlhokwa e le gore go tlotlwe melao yotlhe ya lobopo ka tshwanelo. Fa go ne go sa nna jalo, kagiso ya boammaaruri e ka bo e seyo.a

[Ntlha e e kwa tlase]

[Setshwantsho]

Tsamaiso ya lefatshe lotlhe ya puso ya bopolotiki e tla fela