Go Rera go re Thusa go Itshoka
1 Lefoko la Modimo le re kgothaletsa gore re ‘taboge ka boitshoko lobelo lo re lo tlhomilweng pele.’ (Baheb. 12:1) Fela jaaka motabogi a tlhoka go itshoka gore a wetse lobelo ka katlego, le rona re tshwanetse go itshoka gore re bone botshelo jo bo sa khutleng. (Baheb. 10:36) Bodiredi jwa Bokeresete bo ka re thusa jang gore re kgone go itshoka ka boikanyegi go fitlha kwa bokhutlong?—Math. 24:13.
2 Re Nonofa Semoyeng: Fa re bolelela batho ba bangwe ka tsholofetso e e itumedisang e e mo Baebeleng ya lefatshe le lesha la tshiamo, seno se tla re thusa go dira gore tsholofelo ya rona e nne e ntse e nonofile. (1 Bathes. 5:8) Go nna le seabe ka metlha mo bodireding jwa tshimo go re naya tshono ya go itsise ba bangwe ka boammaaruri jo re bo ithutileng mo Baebeleng. Re nna le tshono ya go femela tumelo ya rona e e re thusang go sireletsa bomoya jwa rona.
3 Gore re kgone go ruta ba bangwe ka tsela e e nang le matswela, go botlhokwa gore rona ka borona re tlhaloganye boammaaruri jwa Baebele sentle. Re tshwanetse go dira patlisiso le go tlhatlhanya ka se re se ithutileng. Maiteko a re a dirang a godisa kitso e re nang le yone, a nonotsha tumelo ya rona le go re lapolosa semoyeng. (Dia. 2:3-5) Ka jalo, rona ka borona re a inonotsha fa re ntse re leka go thusa ba bangwe.—1 Tim. 4:15, 16.
4 Go nna le seabe ka tlhagafalo mo bodireding ke karolo e e botlhokwa ya “diaparo tse di feletseng tsa tlhabano tse di tswang kwa Modimong,” tse re di tlhokang gore re kgone go emelana le Diabolo le madimona a gagwe re nitame. (Baef. 6:10-13, 15) Go tshwarega mo tirelong e e boitshepo go re thusa go nna re tlhomile mogopolo wa rona mo dilong tse di agang le gore re se ka ra leswafadiwa ke lefatshe la ga Satane. (Bakol. 3:2) Go ruta ba bangwe ditsela tsa ga Jehofa go re gakolola gore rona ka borona re tshwanetse go nna le boitsholo jo bontle.—1 Pet. 2:12.
5 Modimo O a Re Nonotsha: Sa bofelo, go nna le seabe mo tirong ya boefangele go re ruta go ikanya Jehofa. (2 Bakor. 4:1, 7) A bo seo e le lesego le le seng kana ka sepe jang ne! Go mo ikanya ka tsela e e ntseng jalo ga go re tlhomelele fela gore re kgone go wetsa bodiredi jwa rona mme gape go re thusa go lebana le maemo le fa e ka nna afe fela a re ka lebanang le one mo botshelong. (Bafil. 4:11-13) Eleruri, go ithuta go ikanya Jehofa ka botlalo ke selo se se ka re thusang go itshoka. (Pes. 55:22) Go na le ditsela di le dintsi tse tiro ya go rera e re thusang ka tsone gore re kgone go itshoka.