Bontsha ba Bangwe Gore o Amega ka Bone—Ka go Nna Pelonomi
1 Fa mosadi mongwe yo o neng a na le maikutlo a a sa siamang ka Basupi ba ga Jehofa a ne a gakologelwa lekgetlho la ntlha la fa a ne a simolola go kopana le mongwe wa bone, o bolela jaana: “Tota ga ke gakologelwe gore re ne re tlotla ka eng, mme ke gakologelwa fela gore o ne a le pelonomi, a le boikokobetso e bile a reetsa ka kelotlhoko. Ke ne ka ikutlwa ke mo rata.” Dikakgelo tseno di bontsha kafa go leng botlhokwa ka gone gore re bontshe batho ba re ba rerelang gore tota re amega ka bone.—Bafil. 2:4.
2 Lorato lo Pelonomi: Tsela nngwe e re ka bontshang batho ka yone gore re a ba rata ke go nna pelonomi mo go bone. (1 Bakor. 13:4) Motho yo o pelonomi o kgatlhegela thata go itse gore maemo a ntse a tsamaela motho yo mongwe jang e bile o eletsa go mo thusa ka ditsela dingwe. Ke boammaaruri gore tiro ya go rera ka boyone ke tiro ya go bontsha batho ba bangwe bopelonomi. Mme re tla bontsha gore tota re amega ka batho ba bangwe e seng fela ka go ba rerela. Tsela e re dirisanang le batho ba bangwe ka yone—go nna botsalano, mekgwa ya rona e mentle, tsela e re ba reetsang ka yone, dilo tse re di buang le tsela e re di buang ka yone, le tsela e re lebang ba bangwe ka yone—e tla bontsha gore tota re amega ka bone.—Math. 8:2, 3.
3 Go amega ka batho ba bangwe ka lorato gape go tla re tlhotlheletsa gore re ba thuse ka ditsela dingwe tse di mosola. Fa mokaulengwe mongwe wa mmulatsela a ne a ntse a rera ka ntlo le ntlo, o ne a lelekwa ka bonako ke motlholagadi mongwe yo o tsofetseng fa a sena go tsena mo ntlong ya gagwe ka a ne a lemoga gore ke Mosupi. O ne a bolelela mokaulengwe yono gore o ne a le kwa godimo a pagame lere a leka go baakanya lebone kafa boapeelong fa a ne a utlwa a kokota fa kgorong. Mokaulengwe o ne a mo raya a re: “Go kotsi gore o pagame lere go se na motho gaufi le wena.” Motlholagadi yono o ne a mo letla go tsena mo ntlong. Mokaulengwe o ne a mo thusa ka lebone mme a tsamaya. E ne ya re fa morwa motlholagadi yono a tla go mo tlhola metsotso e se kae moragonyana, a bolelela morwawe se se neng se diragetse. Morwawe o ne a kgatlhegile tota mo a neng a ikaelela go batla mokaulengwe yono gore a tle a mo leboge. Seno se ne sa felela ka gore ba nne le motlotlo o o itumedisang, mme morwawe a dumela go ithuta Baebele.
4 Fa re le pelonomi, re bontsha batho lorato lo Jehofa a ba ratang ka lone e bile re kgabisa molaetsa wa Bogosi. Ka jalo, e kete ka metlha re ka “itshupa re le badiredi ba Modimo . . . ka bopelonomi.”—2 Bakor. 6:4, 6.