Go Tokafatsa Bokgoni Jwa Rona mo Bodireding—Thapisa Baboledi ba Basha

Lebaka La go Bo go Le Botlhokwa: Barutwa ba basha ba ga Jesu ba tshwanetse go ithuta go dira “dilo tsotlhe” tse a di laetseng mme go ruta ba bangwe boammaaruri ke sengwe sa dilo tseo. (Math. 28:19, 20) Batho ba le bantsi ba ba sa tswang go kopanela le phuthego ba setse ba neela dipuo mo Sekolong sa Bodiredi sa Puso ya Modimo e bile ba ka tswa ba setse ba rerela ba masika kgotsa ditsala tsa bone. Mme fa nako e ntse e ya, ba anaanela le go feta dilo tse ba ithutang tsone e bile ba ithuta gore Jehofa o batla gore batho botlhe ba utlwe dikgang tse di molemo, ka jalo, ba ka nna ba batla go tsamaya le rona mo tshimong. (Bar. 10:13, 14) Fa ba sena go tshwanelegela go nna baboledi ba ba sa kolobediwang, ba ka tlhoka go thapisiwa gore ba itse se ba tshwanetseng go se dira fa ba le mo bodireding.—Luke 6:40.

Kafa O ka Go Dirang ka Gone:

Thusa mmoledi yo mosha gore a nne le dikgatiso tse a tla tlhokang go di dirisa fa a rera le fa a ruta. Mmontshe tsela e wena o rulaganyang beke ya gago ya tshimo ka yone mme o mo tlhalosetse gore kgatiso nngwe le nngwe o e dirisetsa eng.
Tlhophang puisano e lo ka ratang go e dirisa go tswa mo kgatisong ya Tirelo ya Rona ya Bogosi mme lo ikatise ka yone. Mmolelele gore ga a tlhoke go e bua jaaka e ntse. Tlotlang ka diseting tse di mo bukeng ya Sekolo sa Bodiredi, tsebe 82, tse di tlwaelegileng mo tshimong ya lona. Mo tlhalosetse botlhokwa jwa go apara le go ipaakanya sentle.—2 Bakor. 6:3, 4.
Tswelela o ntse o mo thapisa. Bontsha mmoledi yo mosha karata ya tshimo mme o mo rute go kwala rekoto ya batho ba a kopanang le bone mo tshimong. Mmontshe gore wena o kwala jang rekoto ya batho ba ba kgatlhegang ba o kopanang le bone. Mo rute go dirisa bukana ya Good News for People of All Nations le website ya jw.org mo bodireding. Mo thuse go itse se a ka se dirang go tswelela pele a ithuta le motho yo o kgatlhegang.—1 Bakor. 3:6.
Nna pelotelele mme o mo akgole. (Dia. 25:11) Mo tlhomele sekao se se molemo. Fa o le matlhagatlhaga e bile o mmontsha gore o a mo kgatlhegela, seo se tla mo thusa le mo dingwageng tse di tlang.

Leka Seno mo Kgweding Eno:

Bereka le moithuti wa gago mme o tsamaye le ene go ya dipoelong kgotsa fa o ya go tshwara thuto ya Baebele. Fa o se na motho yo o ithutang le ene, o ka kopa mmoledi yo o se nang maitemogelo gore a bereke le wena mo tshimong.