Pele ga lo Rera, lo ka Tlhoka go Batla

1. Ke ka ntlha yang fa diphuthego tse di mo lefelong le le buang dipuo di le dintsi di abelwa tshimo go ya ka puo e e buiwang moo?

¹ Ka Pentekosete ya 33 C.E., fa barutwa ba ga Jesu ba sena go amogela moya o o boitshepo, ba ne ba “simolola go bua ka diteme tse di farologaneng” le batho ba ba tswang kwa dikarolong tse di kgakala tsa lefatshe. (Dit. 2:4) Ka ntlha ya seo, go ne ga kolobediwa batho ba le 3 000. Se se kgatlhang ke gore, go bonala bontsi jwa baeti ba ne ba bua puo e e tshwanang gongwe e le Sehebera kgotsa Segerika. Le fa go ntse jalo, Jehofa o ne a tlhopha gore ba rerelwe molaetsa wa Bogosi ka puo ya bone. Ga go na pelaelo gore lebaka le lengwe la seno ke gore gantsi batho ba amogela dikgang tse di molemo ka bonako fa ba di utlwa ka puo ya bone. Ka jalo, gompieno, diphuthego tse di abetsweng go dira tshimo mo mafelong a a buang dipuo di le dintsi di abelwa tshimo go ya ka puo. (Re Rulaganyeditswe, ts. 107, ser. 2-3) Ditlhopha tse di buang puo e sele ga di abelwe tshimo, mme di rerela batho ba ba buang puo e e buiwang mo tshimong ya phuthego e e tlhokometseng setlhopha se se rileng mmogo le diphuthego tse di gaufi.

2. (a) Letsholo la go batla ke eng mme go tlhokega gore le dirwe kae? (b) Diphuthego di ka thusana jang go bereka tshimo e go buiwang dipuo di le dintsi mo go yone? (c) Re tshwanetse go dira eng fa re kopana le mongwe yo o buang puo e nngwe yo o kgatlhegang?

² Fa o nna mo lefelong la batho ba buang puo e e tshwanang, o ka kgona go rera ka ntlo le ntlo. Le fa go ntse jalo, fa o nna mo toropong e kgolo e go buiwang dipuo di le dintsi mo go yone, o ka nna wa se kgone go tsamaya ka ntlo le ntlo. Go ka tswa go na le diphuthego tse di dirisang dipuo tse dingwe, tse di rerang mo lefelong leo. Le fa diphuthego di ka lo naya tshedimosetso ya batho ba ba kopanang le bone ba ba buang puo ya gago, boikarabelo jo bogolo jwa go batla batho ba ba buang puo eo ba o ka ba rerelang ke jwa phuthego ya lona kgotsa jwa setlhopha sa lona. (Bona lebokoso la setlhogo se se reng “Thusanang.”) Ka jalo, o ka nna wa tshwanelwa ke go nna le seabe mo letsholong la go batla le mo go lone o tla batlang batho ba ba buang puo e e rileng. Letsholo la go batla batho ba ba buang puo e e rileng le ka dirwa jang?

3. Go ikaegile ka eng gore phuthego kgotsa setlhopha se batla kae batho kgotsa se dirisa nako e e kana kang mo letsholong leno?

³ Go Rulaganya Letsholo la go Batla: Nako e e dirisiwang mo letsholong la go batla batho mo mafelong a a buang dipuo tse dintsi e ikaegile ka maemo a lefelo leo. Ka sekai, ke batho ba le kae ba ba buang puo e e rileng mo lefelong leo? Go na le baboledi ba le ba kae? Phuthego kgotsa setlhopha se setse se na le diaterese di le kae? Ga go tlhokege gore phuthego e batle batho ba ba buang puo e e rileng mo lefelong leo lotlhe mme e ka tlhopha go batla thata mo mafelong a a mo tshimong ya bone le mo mafelong a a seng kgakala thata. Le fa go ntse jalo, go botlhokwa go nna le thulaganyo e e siameng ya letsholo leno e le gore batho ba le bantsi kafa go ka kgonegang ka teng ba nne le tshono ya go bitsa leina la ga Jehofa.—Bar. 10:13, 14.

4. (a) Letsholo le tshwanetse go rulaganngwa jang? (b) Ke ditsela dife tse dingwe tse lo ka di dirisang go batla batho ba ba buang puo ya lona?

⁴ E le gore diphuthego tse di farologaneng di se ka tsa dira mo lefelong le le tshwanang, setlhopha sa bagolwane, segolobogolo molebedi wa tirelo, o tshwanetse go rulaganya le go okamela letsholo leno. (1 Bakor. 9:26) Mo ditlhopheng tse di buang puo e sele, mokaulengwe yo o tshwanelegang, segolobogolo mogolwane kgotsa motlhanka wa bodiredi yo o tlhophilweng ke setlhopha sa bagolwane sa mo phuthegong eo, a ka etelela letsholo leno pele. Diphuthego di le dintsi le ditlhopha di na le thulaganyo e e tlhomameng ya go dira dipatlisiso tsa go baakanyetsa letsholo, gongwe ba dirisa buka ya diaterese le e e nang le maina a batho kgotsa Internet go batla maina a a tlwaelegileng mo puong eo. Go tswa foo, letsholo leno la go batla le tla dirwa ka go letsa mogala kgotsa ka go etela batho go tlhomamisa gore ke diaterese dife tse di tshwanetseng go tsenngwa mo mmapeng wa tshimo. Fa seo se kgonega, setlhopha sa bagolwane sa phuthego e e tlhokometseng setlhopha, se ka rulaganya gore gangwe le gape phuthego yotlhe e nne le seabe mo letsholong leno la go batla.—Bona lebokoso la setlhogo se se reng “Kafa lo ka Bonang Batho ba ba Buang Puo ya Lona ka Teng.”

5. (a) Ke dikakantsho dife tse di newang baboledi ba ba dirang letsholo la go batla batho ba ba buang puo e e rileng? (b) Re ka reng fa re kopana le batho fa re le mo letsholong?

⁵ Nako le nako fa re nna le seabe mo letsholong la go batla batho ba ba buang puo e e rileng re tshwanetse go nna le mokgele o o tlhomameng. E re ka letsholo leno e le karolo ya bodiredi, re tshwanetse go apara jaaka fa re le mo tirong ya go rera. Batho ba le bantsi ba fitlhela gore fa ba boeletsa se ba tla se buang ka puo eo fa ba le mo letsholong leno, go ba thusa gore ba nne ba tlhoafetse le gore ba tokafatse bokgoni jwa bone jwa puo. Re ka bala nako e re e dirisang mo letsholong la go batla mme ga re a tshwanela go bala nako ya fa go baakanngwa dimmapa le fa go rulagangwa manaane a tshimo. Fa re kopana le mongwe yo o buang puo eo, re tshwanetse go leka go mo rerela dikgang tse di molemo mme ka bonako morago ga foo re itsise molebedi wa tirelo kgotsa mongwe yo a mo tlhomileng e le gore direkoto tsa tshimo di nne di siame. Re tshwanetse go dira jalo go sa kgathalesege gore a motho yoo o bontshitse kgatlhego. Le fa gone letsholo la go batla batho ba ba buang puo e e rileng le le botlhokwa, re tshwanetse go nna tekatekano mme re nne le seabe mo dikarolong tsotlhe tsa bodiredi.—Bona lebokoso la setlhogo se se reng “Se o Ka se Buang Fa o Le mo Letsholong Leno.”

6. Go batla batho ba ba sa utlweng mo ditsebeng go na le dikgwetlho dife tse di tlhomologileng?

⁶ Go Batla Batho Ba ba Sa Utlweng mo Ditsebeng: Go batla batho ba ba sa utlweng mo ditsebeng go na le dikgwetlho tse di tlhomologileng mme go tlhoka maiteko a a kgethegileng le boitshoko. Motho yo o sa utlweng mo ditsebeng a ka se tlhalosiwe ka go peleta leina la gagwe, ka tsela e a lebegang ka yone kgotsa ka tsela e a aparang ka yone. Mo godimo ga moo, ba lelapa la gagwe le ditsala ba ka gana kgotsa ba okaoka go naya baboledi tshedimosetso e ba e batlang. Dikakantsho tse di latelang tsa go batla batho ba ba sa utlweng mo ditsebeng di ka nna tsa thusa gape fa re le mo letsholong la go batla batho ba ba utlwang.

7. (a) Ke dipatlisiso dife tse di ka dirwang mo mafelong a bonno go batla batho ba ba sa utlweng mo ditsebeng? (b) Re ka dira jang gore mong wa ntlo a se ka a re belaela?

⁷ Diphuthego le ditlhopha tse di dirisang puo ya diatla di ile tsa atlega fa di ne di dira dipatlisiso mo mafelong a bonno. Gongwe mong wa ntlo a ka tswa a ile a bona moagelani, modirimmogo kgotsa mongwe yo a tsenang sekolo le ene a dirisa puo ya diatla. A ka tswa a ile a bona letshwao la mmila le le tsibosang baagelani gore go na le bana ba ba sa utlweng mo ditsebeng mo lefelong leo. Gongwe a ka tswa a na le mongwe wa losika yo o sa utlweng mo ditsebeng. Gakologelwa gore loeto lwa gago lo ka tsosa dipelaelo. Le fa go ntse jalo, o ka dira gore mong wa ntlo a wele makgwafo ka go nna botsalano le go tlhalosa loeto lwa gago ka bokhutshwane le ka seriti. Bangwe ba ile ba nna le matswela a a molemo ka go ntsha Baebele kgotsa di-DVD fa ba ntse ba botsa mong wa ntlo gore a o itse mongwe yo o sa utlweng mo ditsebeng. Go tswa foo ba tlhalosa fela gore ba batla go bolelela motho yoo tsholofetso ya Baebele. Fa mong wa ntlo a okaoka go go neela tshedimosetso, a ka nna a dumela go tsaya karata ya gago ya aterese kgotsa ya taletso ya go tla dipokanong tsa phuthego gore a di neye wa losika kgotsa tsala e e sa utlweng mo ditsebeng.

8. Phuthego e e gaufi e ka thusa phuthego ya puo ya diatla jang?

⁸ Ka letsatsi le le lengwe kgotsa a le mabedi mo ngwageng, phuthego e e dirisang puo ya diatla e ka laletsa phuthego e e gaufi ya puo e nngwe gore e tle go ba thusa mo letsholong la go batla mo ditoropong tse dikgolo tse di leng mo tshimong ya bone e e kgolo. Pokano ya tshimo e e tshwarwang ke phuthego e e dirisang puo ya diatla e ka akaretsa ditaelo tsa letsholo leno le go dira pontsho. Setlhopha sengwe le sengwe se se tsamayang ka koloi se ka abelwa bobotlana mmoledi a le mongwe wa phuthego e e dirisang puo ya diatla le go newa mmapa o o bontshang lefelo le le rileng le ba yang go batla kwa go lone.

9. Letsholo la go batla le ka dirwa jang kwa lefelong le batho ba ba sa utlweng mo ditsebeng ba kopanang mo go lone fa ba intsha bodutu kgotsa kwa ba bonang thuso ya setšhaba teng?

⁹ Gape letsholo leno le ka dirwa kwa lefelong le go itsegeng gore batho ba ba sa utlweng mo ditsebeng ba kopana mo go lone go intsha bodutu kgotsa kwa ba thusiwang ke setšhaba teng. Baboledi ba tshwanetse go apara ka tsela e e tshwanelang seemo. Go ka nna botoka go bua le motho a le mongwe kgotsa ba le babedi ba ba leng teng le go dirisa temogo go na le go bua le setlhopha sotlhe. Fa puisano e na le matswela, gongwe lo ka neelana tshedimosetso e lo ka buisanang ka yone.

10. Baboledi ba ka batla batho jang mo dikgwebong tsa lefelo la bone?

¹⁰ Tsela e nngwe ke go baakanya dimmapa tse di bontshang dikgwebo tse di mo lefelong la lona le go di etela ka nako e e tshwanetseng. Mmapa o mongwe o ka nna wa akaretsa le diteishene di le mmalwa tsa peterolo. O mongwe o ka tswa o na le dry clean, mafelo a botlhatswetso, diresetšhurente, dihotele kgotsa mofuta o mongwe wa kgwebo. Fa mmapa mongwe le mongwe o na le dikgwebo tse di tshwanang, baboledi ba ka nna ba dirisa mokgwa o o tshwanang gore ba nne le maitemogelo le bokgoni. Ka sekai, e re ka gantsi dihotele di amogela baeti ba ba sa utlweng mo ditsebeng, re ka bolelela motho yo o amogelang baeng ka bokhutshwane ka tiro ya rona mme re mo neye sephuthelwana se se nang le DVD le taletso ya dipokano tsa phuthego gore hotele e di bontshe baeng ba ba sa utlweng mo ditsebeng. Kwa dikgwebong dingwe re ka botsa gore a ga go na badiri bape kgotsa batho ba ba rekang ka metlha ba ba dirisang puo ya diatla. Fa e le gore go na le sekolo sa batho ba ba sa utlweng mo ditsebeng mo tshimong e lo e dirang, lo ka naya sekolo dikgatiso dingwe tsa di-DVD tsa rona gore ba di beye mo laeboraring ya bone.

11. Ke ka ntlha yang fa letsholo la go batla e le karolo e e botlhokwa ya bodiredi?

¹¹ Tiro e e Botlhokwa: Go batla beng ba matlo ba ba buang puo ya lona go ka tsaya nako gore lo ba bone. Mo godimo ga moo, dipuo dingwe tsa lefelo le lo leng mo lone di ka fetoga ka bonako fa batho ba ntse ba fuduga, e leng selo se se dirang gore go nne thata go boloka direkoto tsa tshimo di siame. Le fa go ntse jalo, mo mafelong a a ntseng a oketsega, letsholo la go batla ke karolo e e botlhokwa ya bodiredi. Jehofa yo o re neileng kabelo ya go rera, ga a na tlhaolele. (Dit. 10:34) ‘Thato ya gagwe ke gore batho ba mefuta yotlhe ba bolokwe mme ba tle mo kitsong e e leng yone ya boammaaruri.’ (1 Tim. 2:3, 4) Ka jalo, a re dirisaneng le Jehofa le bakaulengwe ka rona, go batla batho ba dipuo tsotlhe ba ba nang le “pelo e e molemo le e e siameng.”—Luke 8:15.

[Lebokoso mo go tsebe 3]

Thusanang

Fa phuthego kgotsa setlhopha se ka rata go thusa go batla batho ba ba buang puo ya bone ba ba ka ba rerelang, molebedi wa tirelo a ka ikgolaganya le bagolwane ba diphuthego tse di gaufi tse di buang puo e nngwe. Go ka nna molemo go ikgolaganya fela le diphuthego tse di seng kgakala thata kgotsa tse di nang le palo e ntsi ya batho ba ba buang puo ya lona. Diphuthego tse go ikgolagantsweng le tsone di ka itsise baboledi gore fa ba kopana le mongwe yo o buang puo eo, ba kwale aterese ya motho yoo mme ba e neye molebedi wa tirelo gore a e fetisetse kwa phuthegong kgotsa kwa setlhopheng se se kopileng thuso. Balebedi ba tirelo ba diphuthego tse di amegang ba ka dira thulaganyo ya go bereka tshimo e e nang le dipuo tse dintsi le go romela batho ba ba kgatlhegang kwa phuthegong kgotsa kwa setlhopheng se se tshwanetseng.

Fa baboledi ba kopana le mongwe yo o buang puo e nngwe yo o bontshang kgatlhego (kgotsa mongwe yo o sa utlweng mo ditsebeng), ba tshwanetse gore ka bonako ba tlatse foromo ya Tsweetswee Boela (S-43) mme ba bo ba e naya mokwaledi wa phuthego. Seno se tla thusa motho gore a bone thuso ya dilo tsa semoya ka bonako.—Bona km 5/11 ts. 3.

[Lebokoso mo go tsebe 4]

Kafa lo ka Bonang Batho ba ba Buang Puo ya Lona ka Teng

• Botsa batho ba bangwe—baithuti ba Baebele, ba lelapa, badirimmogo jalo le jalo.

• Dirisa buka ya difouno le diaterese go bona maina a a tlwaelegileng mo puong ya lona. Thulaganyo ya go batla aterese le leina la motho ka go tsenya dinomoro tsa gagwe e ka fitlhelwa mo Internet kgotsa kwa khampaning ya difouno.

• Botsa ka botlhale mo mafelong a a abelang batho ditirelo, a a jaaka dilaeborari tse di mo lefelong la lona, diofisi tsa puso le dikholetšhe.

• Lebelela dikitsiso mo lokwalodikgannyeng la mo lefelong la lona malebana le ditiro tsa morafe tse di rulagantsweng ke batho ba ba buang puo e sele.

• Etela mabenkele le dikgwebo tse di mo lefelong la lona tse di rekisang dilo tsa batho ba ba buang puo e sele.

• Kopa tetla mo go ba ba nang le taolo gore o beye tafole ya dikgatiso kwa lefelong la kgwebo, kwa yunibesithing kgotsa kwa lefelong la dipalangwa le le nang le batho ba le bantsi ba ba buang puo eo.

• Fa molao wa naga ya lona o letla, o ka reka buka ya diaterese kgotsa thulaganyo ya khomputara e e batlang mafelo mo Internet.

[Lebokoso mo go tsebe 5]

Se o Ka se Buang Fa o Le mo Letsholong Leno

Fa re le botsalano, re le peloephepa e bile re tlhamalala fa re bua, seo se tla dira gore mong wa ntlo a se ka a nna le dipelaelo. Gantsi go a thusa go ba bontsha pele dikgatiso tsa puo ya bone.

Morago ga go dumedisa o ka nna wa re: “Re batla batho ba ba buang puo ya ․․․․․ gore re kgone go tlotla le bone ka tsholofetso ya Baebele. A o itse mongwe yo re ka tlotlang le ene?”

Fa o batla batho ba ba sa utlweng mo ditsebeng o ka re: “Dumela. A nka go bontsha sengwe? [O dirisa sedirisiwa se sennye se se tshamekang dibidio kgotsa founo e e kgonang go tshameka bidio, mmontshe temana ya Baebele go tswa mo kgatisong ya puo ya diatla.] Re na le dibidio di le mmalwa tse di sa duelelweng tse di diretsweng go thusa batho ba ba sa utlweng mo ditsebeng go ithuta ka Modimo. A o itse mongwe yo o sa utlweng mo ditsebeng kgotsa yo o sa utlweng sentle yo o dirisang puo ya diatla?” Fa mong wa ntlo a sa gopole ope, gantsi go ka nna molemo gore a go neye dikai tsa mafelo a a ka tswang a bone batho ba ba sa utlweng mo ditsebeng kwa go one, jaaka kwa tirong, kwa sekolong kgotsa mo lefelong leo.