Dikgatiso Tse di Dirisiwang mo Bukaneng ya Pokano ya Botshelo le Bodiredi
© 2023 Watch Tower Bible and Tract Society of Pennsylvania
NOVEMBER 6-12
MATLOTLO A A MO LEFOKONG LA MODIMO | JOBE 13-14
“Fa Motho a Swa, A a Ka Tshela Gape?”
Go Eletsa ga Rona Botshelo jo Boleelenyana
TOTA le gompieno batho ba le bantsi ba ka se ka ba ganetsa kgopolo eno e e bontshang tsela e botshelo bo leng bokhutshwane ka yone, le mororo e ile ya kwalwa dingwaga tse di ka nnang 3 500 tse di fetileng. Batho ga ba bolo go ikutlwa ba sa kgotsofalele go latswa botshelo jo bo monate ka nakwana fela ba bo ba tsofala le go swa. Ka jalo, go ile ga nna le mekgwa e mentsi ya go lelefatsa botshelo go ralala hisitori.
Mo motlheng wa ga Jobe Baegepeto ba ne ba ja dikgeleswa tsa peo tsa diphologolo ka maiteko a go boela mo bosheng jwa bone, mme ga se ka ga thusa sepe. Bongwe jwa maikaelelo a magolo a mokgwa wa metlha ya bogare wa go tswakanya dimetale dingwe go dira ditlhare e ne e le gore go dirwa molemo wa makgonatsotlhe o o tla dirang gore batho ba tshele botshelo jo boleelenyana. Bomankge ba le bantsi ba mokgwa ono wa go tswakanya dimetale go dira setlhare ba ne ba dumela gore gauta e e itiretsweng e ne e ka dira gore motho a se ka a swa le gore go ja mo dijaneng tsa gauta go ne go tla lelefatsa botshelo. Ba-Tao ba Ba-China ba bogologolo ba ne ba akanya gore ba ne ba ka kgona go fetola tsela e mmele o dirang ka yone ka go dirisa mekgwa e e jaaka go tlhatlhanya, go nna le mokgwa o o rileng wa go hema le mokgwa o o rileng wa go ja mme ka tsela eo ba tshelele ruri ba sa swe.
Motlhotlhomisi mongwe wa kwa Spain e bong Juan Ponce de León o itsege ka go kgaratlha ka thata go bona motswedi wa bosha. Ngaka nngwe ya lekgolo la bo18 la dingwaga mo bukeng ya gagwe ya Hermippus Redivivus o ne a akantsha gore go tsewe makgarebana a a sa leng masha a bo a tsenngwa mo kamoreng e nnye ka nako ya dikgakologo mme go bo go tsewa moya o ba o hemelang kwa ntle o tsenngwa mo dibotlolong o bo o dirisiwa go nna molemo o o lelefatsang botshelo. Le fa go ntse jalo, ga go na epe ya mekgwa eno e e ileng ya atlega.
A Setlhare se se Kgaotsweng se ka Tlhoga Gape?
SETLHARE sa motlhware se se kobegileng ga se kgatlhise go le kalo fa o se bapisa le setlhare se sentle sa mosedara sa kwa Lebanona. Mme gone, setlhare sa motlhware se kgona go gola mo maemong a bosa a a thata. Dingwe tsa ditlhare tseno di tshela lobaka lwa dingwaga di ka nna 1000. Medi ya setlhare seno e kgona go golela kwa teng teng ka fa tlase ga lefatshe e bile setlhare se ka boa se gola gape le fa kutu ya sone e kgaotswe. Fa fela medi ya sone e sa ntse e tshela, se kgona go gola.
Monna yo o ikanyegang e bong Jobe, o ne a tlhatswegile pelo gore le fa a swa, o tla boa a tshela gape. (Jobe 14:13-15) O ne a dirisa sekai sa setlhare, gongwe setlhare sa motlhware, go bontsha gore o ikanya Modimo gore o tla kgona go mo tsosa mo baswing. Jobe o ne a re: “Gonne le e leng setlhare se na le tsholofelo. Fa se kgaolwa, se tla tlhoga gape.” Fa pula e na morago ga komelelo, kutu ya setlhare se se omeletseng sa motlhware e kgona go boa e gola gape le go tlhagisa “kala e kgolo jaaka semela se sesha.”—Jobe 14:7-9.
“O Tla Tlhologelelwa”
Mafoko a ga Jobe a re ruta kafa Jehofa a leng lorato ka gone: O na le kamano e e kgethegileng le batho ba ba tshwanang le Jobe ba ba ipayang mo diatleng tsa gagwe, ba mo letla gore a ba bope mme e nne batho ba ba rategang mo matlhong a gagwe. (Isaia 64:8) Jehofa o tsaya baobamedi ba gagwe ba ba ikanyegang ba le botlhokwa. O ‘tlhologeletswe’ batho ba ba suleng ba ikanyega. Mokanoki mongwe a re lefoko la Sehebera le le ranotsweng fano e le tlhologelelwa, “ke lengwe la mafoko a kwantle ga pelaelo a gatelelang thata maikutlo a go tlhologelelwa sengwe.” Ee, Jehofa ga a gakologelwa baobamedi ba gagwe fela mme gape o tlhologelelwa go dira gore ba boe ba tshele gape.
Go Ribolola Matlotlo mo Dikwalong
it-1-E 191
Melora
Molora o ne o tshwantshetsa sengwe se se se nang boleng kgotsa se se se nang mosola. Ka sekai, Aborahame o ne a bontsha seno fa a ne a bolelela Jehofa jaana: “Ke lorole le molora fela.” (Ge 18:27; bona gape le Isa 44:20; Job 30:19.) Jobe o ne a tshwantsha se bagomotsi ba maaka ba neng ba mmolelela sone le “diane tsa melora.”—Job 13:12.
NOVEMBER 13-19
MATLOTLO A A MO LEFOKONG LA MODIMO | JOBE 15-17
“Elifase o Bontsha Se re Sa Tshwanelang Ke go Se Dira fa re Gomotsa ba Bangwe”
Tila go Akanya ka Tsela E e Sa Siamang!
Mo makgetlhong a le mararo a Elifase a neng a bua mo go one, o ne a ntsha mogopolo wa gore Modimo o re batla dilo tse dintsi jaana mo e leng gore ga go na sepe se batlhanka ba gagwe ba se dirang se se mo kgotsofatsang. Elifase o ne a raya Jobe a re: “Bona! Ga a na tumelo mo batlhankeng ba gagwe, mme o pega barongwa ba gagwe molato.” (Jobe 4:18) Moragonyana Elifase o ne a bua jaana ka Modimo: “Ga a na tumelo mo baitsheping ba gagwe, le magodimo tota ga a phepa mo matlhong a gagwe.” (Jobe 15:15) Mme o ne a botsa a re: “A Mothatayotlhe o na le kgatlhego epe ya go bo o le tshiamo?” (Jobe 22:3) Biledade o ne a dumalana le se Elifase a neng a se bua ka gonne o ne a re: “Go na le ngwedi, mme ga e phatsime; le dinaledi ka botsone ga di phepa mo matlhong a [Modimo].”—Jobe 25:5.
Re tshwanetse go itisa gore re se ka ra tlhotlhelediwa ke tsela e e ntseng jalo ya go akanya. Seo se ka dira gore re akanye gore Modimo o re batla dilo tse dintsi thata. Go akanya ka tsela eo go ka senya kamano ya rona le Jehofa. Mo godimo ga moo, fa re ineela go nna le pono e e ntseng jalo, re tla arabela jang fa re newa kgakololo? Go na le gore re amogele kgakololo ka boikokobetso, dipelo tsa rona di ka nna tsa “galefela Jehofa ka boene,” re bo re nna ka sekgopi. (Diane 19:3) Ruri seno se tla re tsenya mo kotsing e kgolo tota ya semoya!
Etsa Sekao sa ga Jesu sa go Nna Boikokobetso le sa Bopelonomi
16 Mafoko a rona a bopelonomi. Bopelonomi bo re tlhotlheletsa gore re bue “ka tsela e e gomotsang le meya e e tshwenyegileng maikutlo.” (1 Bathes. 5:14) Ke eng se re ka se buang go ba kgothatsa? Re ka ba bolelela gore re amegile thata ka bone. Re ka ba akgola le go ba thusa gore ba lemoge dinonofo tse di molemo tse ba nang le tsone le bokgoni jo ba nang le jone. Re ka ba gopotsa gore Jehofa o ne a ba thusa gore ba bone boammaaruri, ka jalo o ba tsaya ba le botlhokwa thata. (Joh. 6:44) Re ka ba tlhomamisetsa gore Jehofa o amega thata ka batlhanka ba gagwe ba ba “pelo e phatlogileng” kgotsa ba ba “moya o pitlaganeng.” (Pes. 34:18) Mafoko a rona a bopelonomi ruri a ka lapolosa batho ba ba tlhokang go gomodiwa.—Diane 16:24.
Go Ribolola Matlotlo mo Dikwalong
Dintlhakgolo Tsa Buka ya Jobe
7:9, 10; 10:21; 16:22—A mafoko a Jobe a neng a a bua fano a bontsha gore o ne a sa dumele mo tsogong ya baswi? Dikakgelo tseno di tlhalosa se se neng se tla tloga se diragalela Jobe. Jaanong he, Jobe o ne a raya goreng? A ka tswa a ne a raya gore fa a ka swa, ga go ope wa balekane ba gagwe yo o neng a tla mmona. Go ya ka se bone ba neng ba tla se bona, o ne a se kitla a boela kwa ntlong ya gagwe kana a amogelwa ke ope go fitlha ka nako e Modimo a e beileng. Gape Jobe a ka tswa a ne a raya gore ga go ope yo o ka kgonang go boa kwa Sheole a sa thusiwe ke Modimo. Go ya ka se re se balang mo go Jobe 14:13-15, ga go pelaelo gore Jobe o ne a solofetse gore mo isagweng go tla nna le tsogo ya baswi.
NOVEMBER 20-26
MATLOTLO A A MO LEFOKONG LA MODIMO | JOBE 18-19
“O se Ka wa Latlha Bakeresetemmogo le Wena”
Ithute mo Kgannyeng Ya go Bo Jesu a Ile a Lela
9 O ka ema batho ba ba hutsafetseng nôkeng. Jesu ga a ka a lela le Maratha le Marea fela, gape o ne a ba reetsa a bo a ba gomotsa. Le rona re ka dira se se tshwanang go gomotsa batho ba ba hutsafetseng. Mogolwane mongwe wa kwa Australia e bong Dan a re: “Fa mosadi wa me a sena go tlhokafala, ke ne ke tlhoka thuso. Ka metlha, bakaulengwe ba le bantsi le basadi ba bone ba ne ba ikemiseditse go ntheetsa. Ba ne ba ntetla gore ke bontshe tsela e ke utlwileng botlhoko ka yone e bile ba ne ba sa tlhabiwe ke ditlhong fa ba mpona ke lela. Gape ba ne ba nthusa ka go ntlhatswetsa koloi, go nthekela dijo le go nkapeela fa ke ne ke sa kgone go itirela dilo tseno. E bile ba ne ba rapela le nna gangwe le gape. Ruri e ne e le ditsala tsa boammaaruri le ‘bomorwarramotho ba o ka ikaegang ka bone ka dinako tsa matshwenyego.’”—Diane 17:17.
Fa Mongwe Yo o Mo Ratang a Tlogela Jehofa
16 Tswelela o ema nôkeng malapa a a nang le motho yo o kgaotsweng. Mo nakong eno, ba tlhoka gore o ba bontshe gore o a ba rata le gore o ba kgothatse. (Baheb. 10:24, 25) Ka dinako dingwe, ba malapa a motho yo o kgaotsweng, ba nna le boikutlo jwa gore le bone ba tsewa jaaka motho yo o kgaotsweng ka gonne ba bangwe mo phuthegong ga ba tlhole ba bua le bone. Ga re batle gore ba ikutlwe jalo! Re tshwanetse go kgothatsa le go gomotsa basha ba batsadi ba bone ba tlogetseng go direla Jehofa. Maria yo monna wa gagwe a neng a kgaolwa a bo a tlogela lelapa la gagwe a re: “Bakaulengwe le bokgaitsadi ba ne ba re etela, ba re apeela ba bo ba nthusa go ithuta le banake. Ba ne ba nkutlwela botlhoko ba bo ba lela le nna, ba mpuelela fa go ne go na le batho ba ba buang maaka ka nna e bile ba ne ba nkgothatsa tota.”—Bar. 12:13, 15.
A o Eletsa go Dira Sengwe se Segolwane?
20 Setlhopha sa bagolwane se tshwanetse go lemoga gore molebedi kana motlhanka wa bodihedi yo o tlositsweng a ka tshwenyega thata mo boikutlong, le eleng lefa a tlogetse tshiamelo eo ya gagwe ka boene. Fa a sa kgaolwa, mme bagolwane ba bona gore mokaulengwe o tshwenyegile thata mo boikutlong, ba tshwanetse go mo naya thuso e e lorato ya semoya. (1 Bathesalonia 5:14) Ba tshwanetse go mo thusa go lemoga gore phuthego e a mo tlhoka. Le eleng le fa a ne a tlhoka kgakololo, go ka nna ga se ka ga tsaya lobaka gore monna yo o jalo yo o boikokobetso le yo o nang le tebogo yoo a bone ditshiamelo tse dingwe tse di oketsegileng mo phuthegong.
Go Ribolola Matlotlo mo Dikwalong
Nonofo ya Lefoko la Bopelonomi
Le fa go ntse jalo, fa Jobe ka boene a ne a tlhoka go kgothadiwa, Elifase le ditsala tsa gagwe ga ba a ka ba bua mafoko a bopelonomi le ene. Ba ne ba pega Jobe molato ka ntlha ya pitlagano e a neng a le mo go yone, ba supa gore o tshwanetse a bo a dirile phoso nngwe mo sephiring. (Jobe 4:8) The Interpreter’s Bible e akgela jaana: “Seo Jobe a se tlhokang ke kutlwelobotlhoko ya batho. Se a se utlwang ke go tewa mafoko a ‘boammaaruri’ jo bo feteletseng le a a mantle tota mme a tswapogile a bodumedi le dikgakololo tse di senang bokao tsa boitsholo.” Jobe o ne a hutsafetse thata fa a ne a utlwa mafoko a ga Elifase le ditsala tsa gagwe mo a ileng a ikutlwa a patelesega go botsa a re: “Lo tlaa nna lo tshwenya mowa wa me, lo nthubaganya ka mafoko ka lobaka lo lo kae?”—Jobe 19:2.
Re se ka le ka motlha ra dira gore motlhanka wa Modimo a utlwisiwe botlhoko ke mafoko a re a buang kwantle ga go akanyetsa le kwantle ga bopelonomi. (Bapisa Duteronome 24:15.) Seane sengwe sa Baebele se re tlhagisa jaana: “Se o se buang se ka senya kana sa boloka botshelo; ka jalo o tshwanetse wa rwala molato wa mafoko a gago.”—Diane 18:21, Today’s English Version.
NOVEMBER 27–DECEMBER 3
MATLOTLO A A MO LEFOKONG LA MODIMO | JOBE 20-21
“Fa Motho a Humile ga go Reye Gore ke Motho yo o Siameng”
A o ‘Humile Malebana le Modimo’?
12 Mo mafokong a ga Jesu, go huma malebana le Modimo go farologanngwa le go ikokoanyetsa dithoto, kgotsa go ikhumisa ka dilwana. Ka jalo, Jesu o ne a bolela gore mo botshelong ga re a tshwanela go amega thata ka go ikokoanyetsa dithoto kgotsa go ikgotsofatsa ka se re nang le sone. Mo boemong jwa moo, re tshwanetse go dirisa dithoto tsa rona gore re tokafatse kgotsa re nonotshe kamano ya rona le Jehofa. Ruri go dira jalo go tla dira gore re hume malebana le Modimo. Ka ntlha yang? Ka gonne go tla felela ka gore a re segofatse thata. Baebele e re bolelela jaana: “Tshegofatso ya ga Jehofa—ke yone e e humisang, mme ga a e oketse ka botlhoko.”—Diane 10:22.
Go Ribolola Matlotlo mo Dikwalong
Go Fenya Satane le Ditiro Tsa Gagwe
19 Re ela tlhoko gore motlhanka wa Modimo Jobe o ne a tshwanelwa ke go itshokela ‘megopolo e e tshwenyang’ eo Satane a neng a e tsenya mo go ene a dirisa Elifase le Sofare. (Jobe 4:13-18; 20:2, 3) Ka jalo Jobe o ne a nna le “matshwenyego,” mme seo sa felela ka gore ‘mafoko a gagwe a phomesegele fela’ kaga “ditheregiso” tse di neng di mo tshwenya mo mogopolong. (Jobe 6:2-4; 30:15, 16) Elihu o ne a reetsa Jobe ka tidimalo go tswa foo a mo thusa ka bopeloephepa gore a bone kafa Jehofa a lebang dilo ka tsela e e botlhale ka gone. Gompieno le gone, bagolwane ba ba akanyetsang ba bontsha gore ba amega ka ba ba mo botlhokong ka go sa ba okeletse “kgatelelo.” Go na le moo, ba tshwanetse go ba reetsa ka bopelotelele, fela jaaka Elihu, ba bo ba ba tshasa lookwane lo lo lapolosang lwa Lefoko la Modimo. (Jobe 33:1-3, 7; Jakobe 5:13-15) Ka jalo mongwe le mongwe yo o tshwenyegang mo maikutlong ka ntlha ya ditiragalo dingwe tse di botlhoko, lefa e ka tswa e le boammaaruri kana e le se se ikakanyediwang fela, kana yo o ‘tshosiwang ke ditoro, le diponatshegelo’ jaaka Jobe, a ka bona kgomotso e e lapolosang ya Dikwalo mo phuthegong.—Jobe 7:14; Jakobe 4:7.
DECEMBER 4-10
MATLOTLO A A MO LEFOKONG LA MODIMO | JOBE 22-24
“A Motho a ka Nna le Mosola mo Modimong?”
Tila go Akanya ka Tsela E e Sa Siamang!
Selo se sengwe gape se se tshwanang le go akanya gore Modimo o re batla dilo tse dintsi thata ke go akanya gore o leba batho e se ba sepe. Fa Elifase a ne a bua lekgetlho la boraro o ne a botsa jaana: “A monna yo o nonofileng a ka nna le thuso mo Modimong ka boene, mo e leng gore ope fela yo o nang le temogo a ka nna le thuso mo go ene?” (Jobe 22:2) Tota Elifase o ne a raya gore batho ga ba na mosola ope mo Modimong. Biledade le ene o ne a re: “Motho yo o nang le go swa a ka nna yo o se nang molato jang fa pele ga Modimo, kgotsa motho yo o tsetsweng ke mosadi a ka nna phepa jang?” (Jobe 25:4) Go ya ka ene, Jobe, e leng mothonyana fela yo o swang, a ka nna jang le boemo jo bo siameng fa pele ga Modimo?
Gompieno batho bangwe ba na le maikutlo a go sa ithate. Dilo tse di tshwanang le tsela e ba godisitsweng ka yone, mathata a ba nnileng le one mo botshelong kana go tlhoiwa ka ntlha ya morafe kana setso sa bone e ka nna tsone tse di dirileng gore ba ikutlwe jalo. Mme gone Satane le madimona a gagwe le bone ba itumelela go kgoba batho. Fa ba ka kgona go dira gore motho a ikutlwe a sa dire sepe se se kgotsofatsang Modimo Mothatayotlhe, seno se ka dira gore a inyatse le go feta. Fa nako e ntse e ya, motho yono a ka katogela kgakala le Modimo yo o tshelang kana a kgaogana le ene.—Bahebera 2:1; 3:12.
Botsofe le botsogo jo bo seng bontle di ka dira gore re se ka ra kgona go dira sengwe le sengwe. Fa re tsaya se re se dirang gone jaanong mo tirelong ya Bogosi re se bapisa le se re neng re se dira fa re ne re sa ntse re le basha, fa re ne re na le botsogo jo bontle e bile re na le maatla a a oketsegileng, se re se dirang gone jaanong se ka lebega se le sennye thata. Go botlhokwa gore re lemoge gore Satane le madimona a gagwe ba batla gore re ikutlwe re se na sepe se re se dirang se se kgotsofatsang Modimo! Re tshwanetse go tila go akanya ka tsela e e ntseng jalo.
Thuto e e Malebana le go Rarabolola Mathata
Ditsala tsa gagwe tse tharo di ile tsa tswelela pele di kgoba Jobe marapo ka go bolela dikgopolo tsa tsone ka namana go na le gore di bolele ka botlhale jwa bomodimo. Tota Elifase o ile a ba a re ‘Modimo ga o ikanye batlhanka ba one’ le gore tota Jehofa o ne a sa tshwenyege gore a Jobe o ne a siame kana nnyaa. (Jobe 4:18; 22:2, 3) Go thata go akanya ka kakgelo e e kgobang marapo—jalo kana e e seng boammaaruri—go gaisa eo! Ga go gakgamatse go bo moragonyana Jehofa a ne a kgalemelela Elifase le ditsala tsa gagwe tlhapatso eno. “Ga lo a bua se se siameng ka ga me,” o ne a bolela jalo. (Jobe 42:7) Mme puo e e utlwisang botlhoko thata e ne e santse e tla buiwa.
Basha ba ba Ipedisang Pelo ya ga Jehofa
10 Jaaka go senotswe mo pegong eo ya Baebele, Satane o ne a sa belaele boikanyegi jwa ga Jobe fela, mme gape o ne a belaela le jwa botlhe ba bangwe ba ba direlang Modimo—go akaretsa le wena. Tota e bile, fa Satane a ne a bua ka batho ka kakaretso, o ne a raya Jehofa a re: “Sengwe le sengwe se monna [e seng Jobe fela mme mongwe le mongwe] a nang le sone o tla se ntsha mo boemong jwa moya wa gagwe.” (Jobe 2:4) A o bona seabe se o nang le sone mo kgannyeng e e botlhokwa eno? Jaaka go bontshitswe mo go Diane 27:11, Jehofa a re go na le sengwe se o ka se mo nayang—se se ka dirang gore a kgone go araba motho yo o mo kgobang, e leng Satane. Akanya fela—Molaodimogolo wa Lobopo lotlhe o go kopa gore o nne le seabe go araba kgang e kgolo go di gaisa tsotlhe tse di kileng tsa nna teng. A bo o na le boikarabelo jo bogolo le tshiamelo e kgolo jang ne! A o ka dira se Jehofa a kopang gore o se dire? Jobe o ne a dira jalo. (Jobe 2:9, 10) Jesu le batho ba bangwe ba bantsintsi mo hisitoring, mmogo le basha ba bantsi le bone ba dirile fela jalo. (Bafilipi 2:8; Tshenolo 6:9) Le wena o ka dira se se tshwanang. Le fa go ntse jalo, o se ka wa iphora, ga go kgonege gore o se ka wa tsaya letlhakore mo kgannyeng eno. Tsela e o dirang dilo ka yone e tla bontsha gore a o dumalana le go kgoba Modimo ga ga Satane kgotsa o dumalana le phetolo ya ga Jehofa. O tla tlhopha efe?
Jehofa O a Go Kgathalela!
11 A Jehofa o amiwa ke dilo tse o di tlhophang mo botshelong? A batho ba ba setseng ba itshupile ba ikanyega ga ba a lekana gore a ka kgona go fetola Satane? Ke boammaaruri gore Diabolo o rile ga go na ope yo o direlang Jehofa ka go bo a mo rata, e leng tatofatso e go setseng go supilwe gore ke maaka. Le fa go ntse jalo, Jehofa o batla gore o nne mo letlhakoreng la gagwe mo kgannyeng eno ya bolaodi ka gonne o a go kgathalela. Jesu o ne a re: “Ga se selo se se eletsegang mo go Rre yo o kwa legodimong gore mongwe wa ba bannye bano a nyelele.”—Mathaio 18:14.
12 Eleruri Jehofa o kgatlhegela tsela e o e tlhophang. Sa botlhokwa le go feta ke gore se o se tlhophang se a mo ama. Baebele e tlhalosa sentle gore Jehofa o na le maikutlo a a amiwang ke ditiro tse di molemo kgotsa tse di bosula tse batho ba di dirang. Ka sekai, fa Baiseraele ba ne ba tsuologa gantsintsi, Jehofa o ne a ‘utlwa botlhoko.’ (Pesalema 78:40, 41) Pele ga Morwalela wa motlha wa ga Noa, fa “bosula jwa motho bo ne bo le bogolo,” Jehofa o ne a “utlwa botlhoko mo pelong.” (Genesise 6:5, 6) Akanya fela gore seno se kayang. Fa o tlhophile tsela e e sa siamang, o ka utlwisa Mmopi wa gago botlhoko. Seno ga se reye gore Modimo o bokoa kgotsa o laolwa ke maikutlo. Se raya gore o a go rata e bile o amegile ka se se tla diragalang ka wena. Mme fa o dira se se siameng, pelo ya ga Jehofa e a ipela. Ga a itumelele fela gore o tla kgona go fetola Satane, mme o itumelela gape le gore jaanong o ka kgona nna Moduedi wa gago. Mme ke sone se a batlang go nna sone. (Bahebera 11:6) A bo Jehofa Modimo e le Rre yo o go ratang jang ne!
Go Ribolola Matlotlo mo Dikwalong
Dirisa Mekgele ya Semoya go Galaletsa Mmopi wa Gago
Akanya kafa Jehofa a ileng a bopa lobopo ka teng. Fa Jehofa a ne a bua mafoko a a reng “ga nna maitseboa ga ba ga nna moso,” o ne a kgaoganya dinako tsa popo ka go farologana ga tsone. (Genesise 1:5, 8, 13, 19, 23, 31) Mo tshimologong ya nako nngwe le nngwe ya popo, o ne a itse sentle gore mokgele wa gagwe kgotsa boikaelelo jwa gagwe ke eng ka letsatsi leo. Mme Modimo o ne a kgona go diragatsa boikaelelo jwa gagwe jwa go bopa dilo. (Tshenolo 4:11) Tlhogo ya lotso e bong Jobe o ne a re: “Moya [wa ga Jehofa] o na le keletso, mme o tla e diragatsa.” (Jobe 23:13) A bo go tshwanetse ga bo go ile ga kgotsofatsa Jehofa jang ne fa a ne a bona “sengwe le sengwe se a se dirileng” mme a bo a re “se molemo tota”!—Genesise 1:31.
Gore re tle re fitlhelele mekgele e re e ipeetseng, le rona re tshwanetse ra eletsa thata go e fitlhelela. Ke eng se se tla re thusang gore re eletse thata go dira jalo? Tota le ka nako ya fa lefatshe le ne le tobekane fela le kgakgabetse, Jehofa o ne a kgona go bonela pele gore le tla felela le ntse jang—e le selo se sentle mo lefaufaung, se se tla mo galaletsang le go mo tlotlomatsa. Ka mo go tshwanang, le rona re ka godisa keletso ya rona ya go fitlhelela se re batlang go se dira ka go tlhatlhanya ka diphelelo le melemo ya mekgele ya rona. Ke se Tony wa dingwaga di le 19 a neng a se dira. Ga a ise a ko a lebale kafa a neng a ikutlwa ka teng fa a ne a etetse ofisi ya lekala ya Basupi ba ga Jehofa ya kwa Yuropa Bophirima ka lekgetlho la ntlha. Go tloga ka nako eo, Tony o ne a ipotsa potso e e reng, ‘Go nna mo lefelong le le ntseng jalo le go direla mo go lone go tla nna jang?’ Tony ga a ise a ko a tlogele go akanya gore go ka nna ga direga gore a ye kwa lefelong leno, mme o ne a tswelela a leka go fitlhelela mokgele oo. A bo a ne a itumela jang ne fa kopo ya gagwe ya go direla kwa lekaleng e ne e amogelwa dingwaga di se kae moragonyana!
DECEMBER 11-17
MATLOTLO A A MO LEFOKONG LA MODIMO | JOBE 25-27
“Motho yo o Nang le Boleo a ka Kgona go Ikanyega”
it-1-E 1210 ¶4
Go Ikanyega
Jobe. Jobe o ne a tshela morago ga gore Josefa a tlhokafale le mo nakong ya ga Moshe. O ne a itsege e le ‘monna yo o siameng e bile a se na molato; a boifa Modimo e bile a tlhoile se se bosula.’ (Jobe 1:1) Go a bonala gore Satane ga a itumelele go bona batho ba ikanyega mo go Jehofa, re bona seno fa Jehofa a ne a botsolotsa Satane ka Jobe. Satane o ne a bua maaka ka Jobe, a re o obamela Jehofa fela ka ntlha ya dilo tse Jehofa a neng a mo direla tsone. Ka jalo, Satane o ne a re fa Jobe a ka latlhegelwa ke sengwe le sengwe se a nang le sone o ne a tla tlogela go ikanyega mo go Jehofa. Jehofa o ne a letlelela gore Satane a leke Jobe. Mme morago ga gore Jobe a latlhegelwe ke sengwe le sengwe se a neng a na le sone, tota le bana ba gagwe, leano la ga Satane le ile la itaya se fololetse. (Jobe 1:6–2:3) Go tswa foo, Satane o ne a re Jobe o ikemiseditse go itshokela teko nngwe le nngwe fa e le gore botshelo jwa gagwe bo ne bo se mo kotsing. (Jobe 2:4, 5) Morago ga moo, o ne a itewa ka bolwetse jo bo botlhoko mme mosadi wa gagwe o ne a mmolelela gore a tlogele go ikanyega mo go Jehofa. Gape ditsala tsa ga Jobe di ne tsa mo atlhola di bo di mmolelela maaka ka tsela e Jehofa a ikutlwang ka ene. (Jobe 2:6-13; 22:1, 5-11) Jobe o ne a ba araba jaana: “Ke tla tswelela ke ikanyega mo Modimong go fitlha ke swa! Ke tla tswelela ka tshiamo ya me, mme ga nkitla ke e tlogela; pelo ya me e ka se mpone molato fa fela ke sa ntse ke tshela.” (Jobe 27:5, 6) Fa Jobe a ne a ikanyega mo go Jehofa o ne a bontsha gore Satane ke ramaaka.
Tswelela o Ikanyega mo go Jehofa!
3 Batlhanka ba Modimo ba ka bontsha jang gore ba a ikanyega? Ka go rata Jehofa ka pelo yotlhe ba bo ba bontsha seo ka go dira dilo tse di mo itumedisang ka metlha. Akanya kafa lefoko leno le dirisiwang ka gone mo Baebeleng. Mo Baebeleng lefoko la Sehebera le le ranotsweng e le “boikanyegi” le kaya selo se se itekanetseng, se se se nang bogole le se se feletseng. Ka sekai, Baiseraele ba ne ba ntshetsa Modimo ditlhabelo ka diphologolo mme Molao o ne o re diphologolo tseo ga di a tshwanela go nna le bogole bope. (Lefi. 22:21, 22) Ba ne ba sa tshwanela go ntsha setlhabelo ka phologolo e e se nang leoto, tsebe, leitlho kgotsa e e lwalang. Jehofa o ne a batla gore ba ntshe phologolo e e itekanetseng, e e se nang bogole le e e sa lwaleng. (Mal. 1:6-9) Re a tlhaloganya gore ke eng fa Jehofa a ne a batla diphologolo tse di ntseng jalo ka gonne le rona fa re reka sengwe, e ka tswa e le leungo, buka kgotsa thulusu, ga re batle leungo le le bodileng, buka e e gagogileng kgotsa thulusu e e sa berekeng sentle. Re batla se se siameng le se se berekang sentle. Ka tsela e e tshwanang, Jehofa o batla gore re mo rate e bile re ikanyege mo go ene ka pelo yotlhe.
4 A seno se raya gore motho yo o ikanyegang ga a dire diphoso? Kana e bile, re ka tswa re akanya gore re dira diphoso tse dintsi. Akanya ka mabaka a mabedi a go bo seno se se boammaaruri. Sa ntlha, Jehofa ga a tlhome mogopolo mo diphosong tsa rona. Baebele ya re: “Fa nkabo o lebelela ditlolo, wena Jah, Jehofa, ke mang yo o neng a ka ema?” (Pes. 130:3) Jehofa o a itse gore re na le boleo e bile re dira diphoso, ka jalo, o re itshwarela a gololesegile. (Pes. 86:5) Sa bobedi, Jehofa o a itse gore go na le dilo dingwe tse re sa kgoneng go di dira, ka jalo, ga a lebelela gore re dire dilo tse di tla re palelang. (Bala Pesalema 103:12-14.) Ka jalo, re ka ikanyega jang mo go Jehofa ka pelo yotlhe?
5 Go rata Jehofa go re thusa gore re ikanyege. E re ka re rata Modimo e bile re ineetse mo go ene, re tshwanetse go ikanyega mo go ene ka pelo yotlhe. Fa re tswelela re mo rata le fa re lebane le mathata, re tla bo re bontsha gore re a ikanyega. (1 Ditir. 28:9; Math. 22:37) Akanya ka Basupi ba bararo ba re buileng ka bone kwa tshimologong. Ke eng fa ba ile ba dira se ba se dirileng? A mosetsana yole ga a batle go ja monate le bana ba bangwe kwa sekolong? A mosimane yole o itumelela go tlhabiwa ke ditlhong kwa bodireding? A rre yole wa lelapa o batla go latlhegelwa ke tiro? Nnyaa, le e seng! Ba ile ba dira se ba se dirileng ka gonne ba itse melao ya ga Jehofa e bile ba batla go mo itumedisa. E re ka ba rata Jehofa, pele ba dira tshwetso, ba akanya pele ka se se tla mo itumedisang. Ka go dira jalo, ba bontsha gore ba a ikanyega.
Go Ribolola Matlotlo mo Dikwalong
Re Rulagantswe go Dumalana le Lefoko la Modimo
3 Popo e bontsha gore Modimo ke Morulaganyi yo mogolo go ba gaisa botlhe. Baebele ya re: “Jehofa ka boene o thaile lefatshe ka thata ka botlhale. O tlhomamisitse magodimo ka temogo.” (Dia. 3:19) Re itse “dintlha fela tsa ditsela tsa [Modimo],” gape re ‘utlwile go le gonnye fela ka ga gagwe.’ (Jobe 26:14) Le fa re itse go le gonnye fela ka dipolanete, dinaledi le masagaripa, tshedimosetso eno e re thusa go lemoga gore dilo tseno di rulagantswe ka matsetseleko. (Pes. 8:3, 4) Masagaripa a na le dinaledi di le dimilionemilione mme tsotlhe di tsamaya ka tsela e e rulaganeng. Tota e bile, dipolanete di dikologa letsatsi ka tsela e e rulaganeng fela jaaka dikoloi tse di ikobelang melao ya tsela! Eleruri, thulaganyo eno e e jesang kgakge e re e bonang mo lobopong ke bosupi jwa gore Jehofa ‘yo o dirileng magodimo’ le lefatshe ‘ka tlhaloganyo kgotsa ka botswerere,’ o tshwanelwa ke gore re mmake, re ikanyege mo go ene e bile re mo obamele.—Pes. 136:1, 5-9.
DECEMBER 18-24
MATLOTLO A A MO LEFOKONG LA MODIMO | JOBE 28-29
“A o Tshwana le Jobe?”
Bontsha Bopelonomi Jwa Lorato Mo go Ba ba Bo Tlhokang
19 Dipego tsa Baebele tse re tlotlileng ka tsone, gape di gatelela ntlha ya gore bopelonomi jwa lorato bo tshwanetse go bontshiwa batho ba ba sa kgoneng go itirela dilo dingwe. Aborahame o ne a tlhoka tirisanommogo ya ga Bethuele gore a kgone go tsweletsa losika lwa gagwe pele. Jakobe o ne a tlhoka thuso ya ga Josefa gore setopo sa gagwe se isiwe kwa Kanana. Mme Naomi o ne a tlhoka thuso ya ga Ruthe gore a tsholelwe moruaboswa. Aborahame, Jakobe le Naomi ba ne ba ka se ka ba kgona go dira dilo tseno kwantle ga gore ba thusiwe. Le gompieno bopelonomi jwa lorato bo tshwanetse gore segolobogolo bo bontshiwe ba ba bo tlhokang. (Diane 19:17) Re tshwanetse go etsa tlhogo ya lotso Jobe, yo o neng a tlhokomela “yo o bogisiwang a goa a kopa thuso, le mosimane yo o se nang rraagwe le ope fela yo o se nang mothusi” mmogo le “yo o tla tlogang a nyelela.” Gape, Jobe ‘o ne a itumedisa pelo ya motlholagadi’ mme a nna ‘matlho mo go yo o foufetseng le dinao mo go yo o tlhotsang.’—Jobe 29:12-15.
it-1-E 655 ¶10
Diaparo
Go le gantsi diaparo di dirisetswa go tshwantshetsa dilo tse di farologaneng. Diaparo dingwe tse di rileng di ka tlhaola gore motho o direla (bereka) kae kgotsa o tshegetsa mokgatlho ofe. Go ntse fela jalo ka diaparo tse go buiwang ka tsone mo Baebeleng, diaparo dingwe di ka tshwantshetsa tshwetso e motho a e dirang le dilo tse a di dirang go dumalana le tshwetso eo. Seno se bonala mo sekaing se Jesu a ileng a se dira sa seaparo sa lenyalo. (Mat 22:11, 12) Mo go Tshenolo 16:14, 15, Jesu Keresete o ile a re tlhagisa ka kotsi ya go sa tlhome mogopolo mo dilong tsa botlhokwa tse di direlwang Modimo le gore re se ka ra iphitlhela re apotse diaparo tse di re tlhaolang gore re batlhanka ba ba ikanyegang ba ga Jehofa. Ka gonne fa re sa latele kgakololo eno re ka nna mo kotsing ka nako ya ‘ntwa ya letsatsi le legolo la Modimo Mothatayotlhe.’
Leina Lebe Seromo
Ga re a ka ra itlhophela maina a rona fa re ne re tsholwa. Le fa go ntse jalo, ke rona fela re ka kgonang go itlhophela gore re itirela leina le le ntseng jang. (Diane 20:11) Ke eng o sa ipotse jaana: ‘Fa go ne go ka kgonega gore Jesu kgotsa baaposetoloi ba nneye leina, ba ne ba tla nnaya leina lefe? Ke leina lefe le le tshwanelang le le neng le tla tlhalosa nonofo e ke nang le yone e e tlhomologileng kgotsa tsela e ke itsegeng ka yone?’
Potso eno e tlhoka go akanyediwa thata. Ka ntlha yang? Kgosi Solomone yo o botlhale o ne a kwala jaana: “Go tshwanetse ga tlhophiwa leina go na le dikhumo tse dintsi.” (Diane 22:1) Eleruri fa re na le leina le le molemo kgotsa re itsege sentle mo lefelong le re nnang mo go lone, re na le sengwe se se botlhokwa thata. Le fa go ntse jalo, se se botlhokwa le go feta ke gore fa re itirela leina le le molemo le Modimo, re tla nna le letlotlo le le nnelang ruri. Ka tsela efe? Modimo o solofetsa gore o tla kwala maina a ba ba mmoifang mo ‘bukeng ya gagwe ya kgakologelo’ mme ba tla nna le tsholofelo ya botshelo jo bo sa khutleng.—Malaki 3:16; Tshenolo 3:5; 20:12-15.
Go Ribolola Matlotlo mo Dikwalong
Nyenya—Go go Siametse!
A ruri go nyenya go kgona go fetola seemo? Ebu, a o sa ntse o gakologelwa kafa o neng wa ikutlwa o nametsega kana o wela makgwafo ka teng fa motho mongwe a ne a go gasa ka monyenyo? Kana a o sa ntse o gakologelwa kafa o neng o tshogile gongwe e bile o ikutlwa o ilwa ka teng fa mongwe a ne a sa nyenye le wena? Ebu, go nyenya go kgona go fetola seemo. Go ama motho yo o nyenyang le yo go nyenywang le ene. Jobe wa Baebele o ne a bua jaana ka baba ba gagwe: “Ke ne ke nyenya le bone—mme ba ne ba sa dumele—mme ba ne ba ka se fedise go phatsima ga sefatlhego sa me.” (Jobe 29:24, NW) “Go phatsima” ga sefatlhego sa ga Jobe go ka tswa go kaya boipelo kana tsela e a neng a itumetse ka yone.
DECEMBER 25-31
MATLOTLO A A MO LEFOKONG LA MODIMO | JOBE 30-31
“Jobe o Ile a Dira Gore a Nne a Itshwere Sentle”
Faposa Matlho a Gago mo Dilong Tse di se Nang Mosola!
8 Bakeresete ba boammaaruri le bone ba ka tlhotlhelediwa ke keletso ya matlho le ya nama. Ka jalo, Lefoko la Modimo le re kgothaletsa go ikgalemela fa go tliwa mo dilong tse re di lebang le tse re di eletsang. (1 Bakor. 9:25, 27; bala 1 Johane 2:15-17.) Monna yo o thokgameng Jobe o ne a lemoga kafa go bona le go eletsa di amanang thata ka teng. O ne a re: “Ke dirile kgolagano le matlho a me. Ka jalo nka ela kgarebane tlhoko jang?” (Jobe 31:1) Ga se fela gore Jobe o ne a ka se kgome mosadi ka tsela e e ka felelang ka gore a dire boitsholo jo bo sa siamang le ene mme gape o ne a ka se letle tlhaloganyo ya gagwe gore e akanye ka gone. Jesu o ne a gatelela gore motho o tshwanetse go boloka tlhaloganyo ya gagwe e le phepa a sa akanye ka boitsholo jo bo sa siamang fa a ne a re: “Mongwe le mongwe yo o nnang a lebile mosadi mo a nnang le kgotelo ka ntlha ya gagwe, o setse a dirile boaka le ene mo pelong ya gagwe.”—Math. 5:28.
Akanyetsa “Bokhutlo Jwa Morago ga Moo”
Pele ga o simolola go tsamaya mo tseleng e e ntseng jalo, ipotse jaana, ‘Tsela eno e nkisa kae?’ Go akanya fela ka diphelelo tsa tshwetso e o batlang go e tsaya go ka go thusa gore o se ka wa tsaya tsela e e ka nnang le matswela a a botlhoko. Bolwetse jwa AIDS le malwetse a mangwe a a tshelanwang ka tlhakanelodikobo, go ima o sa batle, go senya mpa, go thubega ga malapa le go nna le segakolodi se se molato, ke dingwe tsa dilo tse di senyang botshelo jwa batho ba ba itlhokomolosang matshwao a a ba kaelang tsela e ba tshwanetseng go tshela ka yone. Moaposetoloi Paulo o ne a tlhalosa sentle gore go tla direga eng ka batho ba ba dirang boitsholo jo bo sa siamang. Ga “ba na go rua bogosi jwa Modimo.”—1 Bakorintha 6:9, 10.
Basha—Kaelwang ke Lefoko la Modimo
15 O akanya gore boikanyegi jwa gago mo Modimong bo tla lekwa leng thata—fa o le nosi kgotsa fa o na le batho ba bangwe? Boammaaruri ke gore fa o le kwa sekolong kgotsa kwa tirong, o nna o ntshitse matlho dinameng. O nna o etse tlhoko sengwe le sengwe se se ka tsenyang bomoya jwa gago mo kotsing. Fa o iketlile, ke teng mo go nnang motlhofo gore o tlole melao ya Modimo ya boitsholo.
16 Ke eng fa o tshwanetse go ikemisetsa go ikobela Jehofa le fa o le nosi? Se lebale seno: O ka itlhophela gore a o batla go utlwisa Jehofa botlhoko kgotsa o batla go ipedisa pelo ya gagwe. (Gen. 6:5, 6; Dia. 27:11) Jehofa o amiwa ke dilo tse o di dirang ka gonne ‘o a go kgathalela.’ (1 Pet. 5:7) O batla gore o mo reetse gore o solegelwe molemo. (Isa. 48:17, 18) Jehofa o ne a utlwa botlhoko fa batlhanka bangwe ba gagwe ba kwa Iseraele wa bogologolo ba ne ba itlhokomolosa kgakololo ya gagwe. (Pes. 78:40, 41) Mme gone, o ne a rata moporofeti Daniele fela thata, ke gone ka moo moengele a ileng a mmitsa “monna yo o rategang thata.” (Dan. 10:11) Ka ntlha yang? Daniele o ne a nna a ikanyega mo Modimong e seng fela fa a le mo bathong mme gape le fa a le nosi.—Bala Daniele 6:10.
Go Ribolola Matlotlo mo Dikwalong
Go Nna le Bokgoni Jwa go Reetsa ka Tsela e e Bontshang Lorato
Ditsala tsa monna yo o neng a bidiwa Jobe di ne di utlwile Jobe a bua makgetlho a ka nna lesome. Le fa go ntse jalo, Jobe o ne a bolela jaana: “E kete go ka bo go ne go na le mongwe yo o ntheeditseng!” (Jobe 31:35) Ke ka ntlha yang fa a ne a bua jalo? Ka gonne go mo reetsa ga bone go ne go sa mo gomotse ka gope. Ba ne ba se na sepe le Jobe e bile ba sa batle go tlhaloganya kafa a ikutlwang ka gone. Tota ba ne ba se na kutlwelobotlhoko. Mme gone moaposetoloi Petere o gakolola jaana: “Nnang le mogopolo o o tshwanang lotlhe, lo bontshe go utlwela ba bangwe botlhoko, lo na le lorato lwa bokaulengwe, lo le pelotlhomogi ka bonolo, lo le boikokobetso mo mogopolong.” (1 Petere 3:8) Re ka bontsha jang gore re utlwela ba bangwe botlhoko? Tsela e nngwe ke ka go bontsha gore re amega ka maikutlo a ba bangwe le go leka go tlhaloganya tsela e ba ikutlwang ka yone. Go akgela ka tsela e e bontshang gore o mo utlwela botlhoko o re, “seo se tshwanetse sa bo se go utlwisitse botlhoko” kana “o tshwanetse wa bo o ne wa ikutlwa o sa tlhaloganngwa sentle” ke tsela e nngwe ya go bontsha gore re amega ka ba bangwe. Tsela e nngwe gape ke ka go tlhalosa se motho a neng a se bua ka mafoko a rona e le go bontsha gore re tlhalogantse se a neng a se bua. Go reetsa ba bangwe ka lorato go raya go se ele tlhoko fela mafoko a motho a a buang mme gape go ela tlhoko le maikutlo a motho yoo a a bontshang.