Go Ise go ye Kae—Batho Botlhe ba Tla Nna le Botsogo jo bo Itekanetseng!

“KGOPOLO ya batho ba sa tlhole ba lwala . . . e tletsetletse gone jaanong,” go ne ga bega jalo makasine wa dikgang wa Sejeremane wa Focus. Mme gone, kgopolo eno ga e ntšha. Fa botshelo jwa batho bo ne bo simolola, Mmopi o ne a sa ikaelela le e seng gore batho ba lwale. Boikaelelo jwa gagwe ka batho e ne e se gore “batho botlhe ba lefatshe ba nne le selekanyo se se kgotsofatsang sa boitekanelo.” (Mokwalo o o sekameng ke wa rona.) Mmopi wa rona o ne a ikaeletse gore mongwe le mongwe a itekanele ka botlalo!

Ka jalo, ke ka ntlha yang fa rotlhe re tshwenngwa ke bolwetse? Baebele e re bolelela gore Jehofa Modimo o ne a dira batsadi ba batho botlhe, e bong Adame le Efa, ba itekanetse. Fa a sena go wetsa popo ya gagwe, “Modimo a bona sengwe le sengwe se a se dirileng mme, bona! se bo se le molemo tota.” Mmopi wa rona yo o lorato ga a ise a ke a ikaelele gore botshelo jwa batho bo aparelwe ke bolwetse le loso. Mme e rile fa Adame le Efa ba tlhopha go tswa mo tseleng e ba neng ba e beetswe, ba wela mo boleong. Diphelelo tsa boleo jwa ga Adame ke loso, lo lo neng lwa fetisediwa mo bathong botlhe.—Genesise 1:31; Baroma 5:12.

Jehofa ga a ka a latlha batho gone fela foo. Le gone ga a ka a tlogela boikaelelo jwa gagwe jwa kwa tshimologong ka bone le lefatshe. O itsise mo Baebeleng yotlhe boikaelelo jwa gagwe jwa go busetsa batho ba ba kutlo kwa boemong jwa bone jwa kwa tshimologong jwa go itekanela sentle. Fa Morwa Modimo Jesu Keresete a ne a le mo lefatsheng, o ne a supa maatla a Modimo a go fodisa malwetse. Ka sekai, Jesu o ne a fodisa bofofu, lepero, bosusu, bolwetse jwa go tlala metsi, go ngatega le go swa ditokololo.—Mathaio 4:23, 24; Luke 5:12, 13; 7:22; 14:1-4; Johane 9:1-7.

Go ise go ye kae Modimo o tla laela Kgosi ya gagwe ya Bomesia e bong Jesu Keresete gore a laole merero ya batho ba lefatshe. Kafa tlase ga tsamaiso ya gagwe, boporofeti jwa ga Isaia bo tla diragadiwa: “Ga go na monni ope yo o tla reng: ‘Ke a bobola.’ Batho ba ba nnang mo lefatsheng ba tla bo ba itshwaretswe tlolo ya bone.” (Isaia 33:24) Seno se tlile go diragadiwa jang?

Re lemoga gore moporofeti o kwala ka batho ba ba ‘itshwaretsweng tlolo ya bone.’ Ka jalo, selo sa ntlha se se bakileng bolwetse—boleo jo batho ba bo ruileng—bo tla fedisiwa. Jang? Molemo wa setlhabelo sa thekololo sa ga Jesu o tla dirisiwa ka botlalo mo bathong ba ba kutlo, ka go dira jalo o tlosa se se bakang bolwetse le loso. Go tla nna le maemo a paradaise mo dikhutlong tsotlhe tsa lefatshe. Moaposetoloi wa Mokeresete e bong Johane o ne a kwala jaana: “[Modimo] o tla phimola dikeledi tsotlhe mo matlhong a bone, mme loso lo tla bo lo seyo, le fa e le khutsafalo le fa e le selelo le fa e le botlhoko di tla bo di sa tlhole di le gone. Dilo tsa pele di fetile.” Seo se tloga se diragadiwa!—Tshenolo 21:3, 4; Mathaio, kgaolo 24; 2 Timotheo 3:1-5.

Go Nna Tekatekano

Gone jaanong jaana, bolwetse bo sa ntse bo tshwenya dimilionemilione tsa batho. Ka jalo, ke ga tlholego fela gore batho ba tshwenyege ka botsogo jwa bone le ka botsogo jwa baratiwa ba bone.

Gompieno, Bakeresete ba anaanela thata maiteko a ba tsa kalafi. Ba tsaya dikgato tse di tshwanetseng tsa gore ba itekanele kgotsa ba nne ba ntse ba itekanetse. Le fa go ntse jalo, tsholofetso ya Baebele ya isagwe e e se nang bolwetse e re thusa go nna tekatekano malebana le seno. Botsogo jo bo itekanetseng ga bo kitla bo nna teng go fitlha Kgosi ya Bomesia e tsaya marapo. Jaaka re bone, tota le diphitlhelelo tse di di gaisang tsotlhe ga di a dira gore ba tsa kalafi ba kgone go kgetla apole e e monate go di gaisa tsotlhe kwa godimodimo mo setlhareng—botsogo jo bo itekanetseng jwa batho botlhe.

Mokgele wa gore “batho botlhe ba lefatshe ba nne le selekanyo se se kgotsofatsang sa boitekanelo” o tla tloga o fitlhelelwa. Mme ga o kitla o fitlhelelwa ke mokgatlho wa lekgotla la Ditšhaba Tse di Kopaneng kgotsa ke World Health Organization kgotsa barulaganyi ba tikologo kgotsa ba ba dirang diphetogo tsa loago kgotsa dingaka. Jesu Keresete ke ene fela a tla fitlhelelang mokgele oo. A bo go tla bo go ipedisa jang ne fa batho ba tla bo kgabagare ba ‘golotswe mo go nneng batlhanka ba go bola mme ba nne le kgololesego e e galalelang ya bana ba Modimo’!—Baroma 8:21.

[Ditshwantsho mo go tsebe 10]

Mo lefatsheng le lesha la Modimo batho botlhe ba tla itekanela ka botlalo