Kgang ya ga Moshe e Tsosa Dikganetsano

GO NA le dilo di le dintsi tse gantsi Bajuda, Bakeresete le Bamoseleme ba ileng ba ganetsana ka tsone. Mme le fa madumedi ano a ile a nna le dilo tse a ganetsanang ka tsone, go na le sengwe se a tshwanang ka sone: a tlotla monna yo go tweng ke Moshe thata. Bajuda ba mo tsaya e le “morutisi yo o gaisang barutisi botlhe ba Bajuda”—mosimolodi wa setšhaba sa Bajuda. Bakeresete ba mo tsaya e le moetapele wa ga Jesu Keresete. Bamoseleme ba tsaya Moshe e le mongwe wa baporofeti ba bone ba ntlha le ba ba itsegeng thata.

Ka jalo, Moshe ke mongwe wa banna ba ba botlhokwa thata mo hisitoring ya batho. Le fa go ntse jalo, mo lobakeng lwa dingwaga di feta lekgolo, bakanoki le baruti ba ile ba tsosa dikganetsano malebana le Moshe. Ba le bantsi ga ba ganetse fela gore Moshe o ne a dira dikgakgamatso e bile o ne a etelela Baiseraele pele go tswa kwa Egepeto, mme gape ba ganetsa kgang ya gore Moshe o kile a nna teng. Buka ya ga Jonathan Kirsch ya Moses—A Life ya re: “Selo se le sengwe fela se re ka se buang ka monna yo o neng a itsege e le Moshe ke gore mongwe yo o tshwanang le motho yono yo o tlhalosiwang mo Baebeleng a ka tswa a ile a tshela mo motlheng mongwe o o sa itsiweng le kwa lefelong lengwe le le sa itsiweng bogologolo tala, mme a ka tswa a simolotse go tsietsa batho ka boammaarurinyana jo ka bonya ka bonya bo neng jwa simolola go nna dithuto le ditumelo tsa setso mo makgolong a a ntseng a feta a dingwaga, go fitlha monna yono e nna motho yo re balang ka ene mo Baebeleng yo o itsegeng thata le yo kgang ya gagwe e tsositseng dikganetsano.”

Kgang eno e ka lebega e utlwala fa motho a sa akanye thata ka yone. Ka sekai, batshwayadiphoso ba bolela gore go na le bosupi jwa baithutamarope jo bo tlhomamisang gore batho ba go buiwang ka bone mo Baebeleng ba ba jaaka Kgosi Jehu wa Iseraele ba kile ba nna teng, mme ga go na bosupi bope jwa baithutamarope jo bo tlhomamisang gore Moshe o kile a nna teng. Le fa go ntse jalo, seno ga se bosupi le e seng jwa gore kgang ya ga Moshe ke tlhamane. Batho ba ba belaelang dilo ba kile ba bolela gore batho bangwe ba go buiwang ka bone mo Baebeleng, ba ba jaaka Kgosi Beleshasare wa Babelona le Kgosi Saragone wa Asiria le bone ke ditlhamane—go fitlha moragonyana fa baithutamarope ba tlhomamisa gore ba kile ba nna teng.

Mokwadi Jonathan Kirsch o re gakolola jaana: “E re ka go se na masalela a a lekaneng a dilo tsa baithutamarope tsa Baiseraele ba go buiwang ka bone mo Baebeleng, ga go gakgamatse go bo Moshe a sa umakiwe mo bukeng epe kwantle ga Baebele e bile seo ga se fedise kgang.” Go ya ka Kirsch, bangwe ba bolela gore ga go lebege Moshe e ne e le motho fela yo o ikakanyeditsweng ka gonne “pego eno ya botshelo e na le dintlha di le dintsi le metlotlo e e kwadilweng, mme e raraane thata . . . , mo go ka se kang ga direga gore e bo e ikakanyeditswe fela.”

Le fa o ka tswa o le modumedi kgotsa o se ene, o ka tswa o itse ditiragalo tse dikgolo tsa botshelo jwa ga Moshe: motlotlo wa gagwe le Modimo kwa setlhatshaneng se se tukang, Khudugo ya Baiseraele go tswa mo bokgobeng kwa Egepeto le go kgaoganngwa ga Lewatle le Lehibidu. Mme gone, a go na le lebaka la go dumela gore ruri dilo tseno di ile tsa direga? Kgotsa a kgang ya ga Moshe ke tlhamane fela? Setlhogo se se latelang se tla tlotla ka dipotso tseno tse di kgatlhang.