Fa Korila ya Lesea E ne E Lela

KA MOKWADI WA TSOGANG! KWA CAMEROON

Pitchou, korila e e namagadi, e ne ya tsholelwa kwa sekgweng sa bogare jwa Afrika. Fa Pitchou a ne a le mo e ka nnang ngwaga, batsomi ba ne ba bolaya mmaagwe le maloko otlhe a mangwe a setlhopha sa gagwe sa dikorila go di ja. E re ka Pitchou a ne a le monnye thata gore nama ya gagwe e rekisiwe, o ne a se ka a bolawa mme a rekisiwa go nna seruiwa. Le fa go ntse jalo, Pitchou o ne a lwala mme a nnela go lela.

PITCHOU ke nngwe fela ya masea a dikorila a mantsi a batsadi ba tsone ba ileng ba bolawa. Go na le dilo tse dintsi tse di bakang seemo se se hutsafatsang seno. Nngwe ya tsone ke go rekisiwa ga nama ya diphologolo tsa sekgwa ka tsela e e seng kafa molaong. E re ka diresetšhurente di le dintsi di batla go dira madi a mantsi le batho bangwe ba batla dinama tse di sa tlwaelegang, batsomi ba porofeshenale ba phuruphutsa dikgwa bosigo le motshegare. Mme ka nako e tshwanang, motho yo o rekang le go rekisa o tsamaisa kgwebo e e dirang madi a mantsi mme e se kafa molaong ya go rekisa diphologolo le nama ya tsone.

Se sengwe se se akarediwang mo go seno ke go remiwa ga ditlhare tse dintsi thata. Fa go senngwa dikgwa, diphologolo di latlhegelwa ke legae la tsone, mo di iphitlhang gone mo di jelang gone le mo di godisang bana ba tsone gone. Mo godimo ga moo, go bonala fa ditiro tse pedi tseno di rotloetsana. Jang? Sa botlhokwa, ditsela tse mo go tsone go remilweng ditlhare di dira gore go nne motlhofo gore batsomi ba tsene mo dikgweng tseo, mo go nnang motlhofo gore diphologolo tse ka nako eo di tlhakaneng tlhogo mme e bile gantsi di se na mo di nnang gone di tlhaselwe. Dilo tse dingwe di akaretsa go ata ga palo ya batho, go tlhokega ga poroteine le go oketsega ga ditoropo tse di golang, botegeniki jo bo botoka jwa go tsoma diphologolo, dintwa le go oketsega ga dibetsa. Ka ntlha ya seo, palo ya dikorila le mefuta e mengwe ya diphologolo e nna e ntse e tsamaela mo go nyeleleng, mme seno se dira gore go nne le se go tweng ke bolwetse jwa dikgwa tse di se nang sepe. Mme e ka tswa e se jone fela bothata joo. Jang? Ka sekai, ka go thusa go anamisa peo, diphologolo di na le seabe se segolo go thusa gore diphologolo le ditshedinyana tse dinnye tse di mo tikologong di tswelele di tshela mo sekgweng. Ka jalo, fa fauna (diphologolo) di sa tlhole di le gone, flora (dimela) le tsone di ka amega.

Le fa go ntse jalo, polao e ntse e tswelela. Mo dikarolong dingwe tsa kwa Afrika Bophirima, mo go nngwe fela ya nako ya dingwaga di le lesome, palo ya dikorila dingwe e ile ya wela kwa tlase ka nngwesomeng ya se e neng e le sone. Bomankge ba diphologolo tsa naga ba kwa Cameroon ba re: “Fa go tsoma go go seng kafa molaong go ntse go tswelela, go ise go ye kae go tla bo go sa tlhole go na le dikorila mo sekgweng.”a

Go Sireletsa Dikhutsana

Go tsibogela seemo seno se se utlwisang botlhoko, ditlhopha tse di sireletsang diphologolo tse di jaaka Setheo sa Limbe sa Diphologolo Tsa Naga se se kwa tlase ga Mount Cameroon kwa Afrika Bophirima e e kwa borwa jwa Sahara, di thusa go sireletsa mefuta ya diphologolo e e mo kotsing. Kwa setheong seno sa Limbe, baeti ba ka kgona go bona dikorila, mofuta wa ditshwene tsa di-chimpanzee, di-mandrill le mefuta e mengwe e le 13 ya dikorila le mefuta e mengwe ya diphologolo. Mo dingwageng tsa bosheng jaana setheo seno se ile sa tlhokomela mo e ka nnang diphologolo di le 200 tse e leng dikhutsana le tse di se nang mo di nnang teng, se di tlamela ka legae le le babalesegileng, dijo le tlhokomelo ya kalafi. Seabe se sengwe se setheo seno se nang le sone ke go ruta baeti ba bantsi ba ba tswang kwa Cameroon, dinaga tse di gaufi, le batho ba ba fetang mo e ka nnang 28 300 go ralala lefatshe mo ngwageng mongwe wa bosheng ka ga go sireletsa tlhago.

Seno se re busetsa gape mo go Pitchou. E re ka batho ba ba neng ba e bona ba ne ba amiwa ke selelo sa yone, ba ne ba reka korila e nnye eno mo batsoming mme ba e isa kwa setheong seno. Fa korilanyana eno e goroga, e ne ya tlhatlhobiwa ka botlalo kwa bookelong jwa setheo. Mo godimo ga go hutsafala thata, e ne e gotlhola, e feletswe ke metsi mo mmeleng, e na le bothata jwa phepelotlase, letshololo, le dintho mo letlalong. E re ka e ne e na le bothata jwa letlalo, e ne ya bidiwa Pitchou e go ya ka puo nngwe ya lefelo leo e kayang “marontho.” Ka boitumelo Pitchou o ne a tsibogela kalafi eno sentle mme a se ka a tlhoka go ariwa, e leng selo se setheo seno se ka kgonang go se dira fa go tlhokega.

Jaaka fa go tlwaelegile ka diphologolo tse di fitlhang mo setheong seno, malatsi a ntlha a le 90 Pitchou o ne a bolokiwa a le nosi kwa thoko. Morago ga foo, o ne a kopana le dikorila tse dingwe tse 11 mo lefelong le le kwa ntle le le kampeletsweng le le tshwanang le tikologo ya tsone ya tlholego ya sekgwa. Maloko a a berekang mo setheong seno a ne a itumela thata fa a bona dikorila tse dingwe tse dikgolwane di itsalanya le motlabosheng. Seno ke selo se se tlwaelegileng mme ka ntlha ya seo, ka bonako fela Pitchou o ne a nna karolo ya setlhopha.

Kamano e e gaufi e e lorato gare ga diphologolo le batho ba ba di tlhokometseng e dira gore go nne le kamano e e nonofileng fa gare ga bone. Fa moeti a bona dilo tse di dirwang mo setheong seno go ka mo thusa gore a tlhaologanye boikarabelo jo Modimo a bo fileng batho malebana le kafa ba tshwanetseng go itshwara ka teng, fa a ne a laela banyalani ba ntlha gore ba laole lefatshe le diphologolo.—Genesise 1:28.

Go Tla Diragala Eng ka Dikhutsana Tseno?

Boikaelelo jo bogolo jwa thulaganyo ya setheo seno ke go busetsa gape dipholologo tseno kwa sekgweng. Le fa go ntse jalo, ga se kgetsi e potlana. Gantsi diphologolo tse di tlwaetseng go tlhokomelwa ke batho ga di kgone go tshela kwantle ga bone. Mme gape di mo kotsing ya gore di nne name e e tla jewang ke mongwe. Dinaga di le mmalwa tsa mo Afrika di ile tsa dumela go sireletsa mafelo a e leng melelwane e e kgabaganngwang le go tokafatsa taolo mo mafelong a a leng teng. Re solofela gore dithulaganyo tseo di tla dira gore go nne motlhofo go tlogela diphologolo tse di se nang batsadi go boela kwa sekgweng le go thusa go sireletsa e seng fela dikorila mme gape le diphologolo tsotlhe tsa naga mo kgaolong eo.

Mme sengwe le sengwe se supa gore dilo tse di thulanang le seno—bopelotshetlha, lehuma, go oketsega ka bonako ga baagi le go rengwa ga ditlhare—di tla tswelela di le kotsi mo dikorileng le mo diphologolong tse dingwe. Felix Lankester wa Setheo sa Limbe sa Diphologolo Tsa Naga a re, fa tshireletsego e e oketsegileng e sa tle ka bonako, “mefuta e e farologaneng ya diphologolo tsa naga e tla nyelela ka bonako.”

A bo e le masetlapelo jang ne! Mme ke masetlapelo a magolo le go feta go bona batho ba na le bothata jwa phepelotlase le go bona bana ba ba nang le dimpa tse di budulogileng le matlho a a tletseng dikeledi ba swa ka ntlha ya go tlhoka dijo. Ga go na pelaelo gore bothata jwa ga Pitchou bo gatelela seemo se se utlwisang botlhoko sa lefatshe lotlhe—segolobogolo go sa lekalekane le tshiamololo ya lone.

Se se itumedisang ke gore Mmopi ga a itlhokomolose se se diragalang mo lefatsheng. Go ise go ye kae, o tla fedisa tsone dilo tse di bakang bosetlhogo, pogo le go fedisiwa ga ditshedi mme o tla dira gore go nne le kutlwano e e tla nnelang ruri fa gare ga ditshedi tsotlhe.—Isaia 11:6-9.

[Ntlha e e kwa tlase]

[Ditshwantsho mo go tsebe 22, 23]

Pitchou pele ga fa a nna le botsogo jo bo siameng le morago ga foo

[Setshwantsho mo go tsebe 23]

“Red-eared guenon”

[Setshwantsho mo go tsebe 23]

Tshwene ya “drill” e tlhokomela lesea la yone

[Setshwantsho mo go tsebe 24]

Botseno jwa setheo sa Limbe

[Setshwantsho mo go tsebe 24]

Go tlhokometswe Bolo, korila nngwe ya khutsana

[Motswedi wa Setshwantsho mo go tsebe 23]

All photos pages 22 and 23: Limbe Wildlife Centre, Cameroon

[Motswedi wa Setshwantsho mo go tsebe 24]

Both photos: Limbe Wildlife Centre, Cameroon