Ditiragalo Tsa Lefatshe

◼ Dipatlisiso tse di feletseng tsa boitekanelo jwa mefuta mengwe ya dikorale e e dirang matlapa di bontsha gore diperesente di le 32,8 tsa tse di tlhophilweng “di mo kotsing e kgolo ya go nyelela” ka ntlha ya go fetoga ga tlelaemete kgotsa go tshwenngwa ke batho.—SCIENCE, U.S.A.

◼ Mo baneng ba ba fetang 2 000 ba ba nang le bothata jwa go hema ba ba tlhatlhobilweng mo lephateng lengwe la bana la kokelo ya kwa Athena, kwa Gerika “go fitlhetswe gore diperesente dingwe di le 65 di ne tsa hema [motsoko] fa mongwe wa batsadi kgotsa boobabedi ba ne ba goga.”—KATHIMERINI—ENGLISH EDITION, GREECE.

◼ “Go bonala re se na tharabololo epe e e tshwanelang ya nako e khutshwane kgotsa e telele ya mathata ano a a masisi a a jaaka: ditlhwatlhwa tse di tlhatlogang tsa oli, go tlhatloga ga ditlhwatlhwa tsa dilo, . . . matshosetsi a go wela tlase ga ikonomi . . . , le masetlapelo a tlholego a a nnang a ipoeletsa a a bontshang kafa re sa sireletsegang ka teng.”—LLUÍS MARIA DE PUIG, PRESIDENT OF THE PARLIAMENTARY ASSEMBLY OF THE COUNCIL OF EUROPE.

◼ Kwa Poland, diperesente di le 17 tsa basimane le di le 18 tsa basetsana ba ile ba lekeletsa diokobatsi fa ba le dingwaga di le 15.—ŻYCIE WARSZAWY, POLAND.

Ntwa Magareng ga Ditau le Batho

Lokwalopaka lwa kwa Cape Town lwa Africa Geographic lo bolela gore, e re ka palo ya batho mo Afrika e oketsega, mafelo a diphologolo a a fokotsega, mme seno se baka “ntwa e e maswe gangwe le gape magareng ga batho le diphologolo.” Ditau ke tsone tse segolobogolo “go bonalang di tsaya batho e le sengwe se di ka se bolayang.” Ka sekai, kwa Tanzania, ditau di bolaile bobotlana batho ba le 70 ngwaga mongwe le mongwe fa e sa le ka 1990. Lokwalopaka lono lo bega gore mo mabakeng mangwe, ditlhopha tsa ditau “di tlhasela thata batho, go tswa mo mathuding a a kwa pele a matlwana a bone di bo di thuba marulelo a tlhaga le mabota a mmu a a sa nonofang.”

Go Epololwa ga Difala Tsa Bogologolo Tsa Kwa Egepeto

Baithutamarope ba Yunibesithi ya kwa Chicago ba ba berekang kwa borwa jwa Egepeto ba epolotse difala di le supa tsa dijo tsa ditlhaka, e leng tse dikgolo thata tse di itsiweng kwa nageng eo. Dilo tsa bogologolo tse di fitlhetsweng gaufi le lefelo leo di thusitse baithutamarope gore ba kgone go lemoga gore difala tseo di bopilwe magareng ga dingwaga tsa 1630 le 1520 B.C.E. Fa e le gore matlha ao a nepile, go raya gore difala tseno di ne di le teng ka nako ya ga Moshe. Difala tseno tse di kgolokwe tse di dirilweng ka mmu, tsa bophara jwa dimetara di le 5,5 go ya go 6,5 mme gongwe bobotlana di le boleele jwa dimetara di le 7,5 di ne di dirisiwa ke puso go nna lefelo la go boloka le go aba dijo. Pego ya Yunibesithi eno e fitlhetse gore mafelo a a ntseng jalo a ne a “dira jaaka bobolokelo jwa dijo tse dintsi tse di neng di tswa mo mokgatsheng wa noka ya Nile tse di neng di dirisiwa ke puso. E re ka ba ne ba dirisa dijo tsa ditlhaka e le madi, seno se ne se dira gore Bofaro ba nne le taolo e ntsi.” Pego eno e tswelela ka gore, “e re ka dijo tsa ditlhaka di ne di dirisiwa e le madi, difala tseno di ne di dirisiwa jaaka dibanka le kwa ba neng ba bona dijo gone.”

Pampiri e e Thata Jaaka Tshipi

Babatlisisi ba kwa Sweden ba Royal Institute of Technology ba simolotse mokgwa wa go dira pampiri go tswa mo go cellulose ya logong e e kgonang go boloka maatla a ditlhalenyana tsa lone. Mokgwa o o tlwaelegileng wa go thuga logong go dira pampiri o senya ditlhalenyana tse dinnye tsa cellulose ya logong mme seno se dira gore di se ka tsa nna thata. Mme setlhopha sa babatlisisi sa kwa Sweden se kgonne go thuga tšhotlho ya logong ka ensaeme mme ba bo ba aroganya ka iketlo ditlhalenyana tse dinnye tsa cellulose mo metsing ba dirisa motšhine wa go thuga. Fa ditlhalenyana tseno tse di sa senyegang di ntshiwa mo metsing, di a momagana di bo di dira pampiri e e thata go gaisa tshipi e e popota le tshipi ya go aga.