Dilo Tsa Maitirelo—Bothata Jwa Lefatshe Lotlhe

Kwa bofelong jwa lekgolo la bo18 la dingwaga, banna ba ne ba bolawa ka go tsenngwa mo metsing a a belang ka ntlha ya molato ono kwa Fora. Go simologa ka 1697 go fitlha ka 1832 e ne e le molato o motho a o atlholelwang go bolawa kwa Engelane, gape go dira jalo go ne go tsewa jaaka leano la go diga puso. Maesemane a a fetang 300 a ne a kalediwa ka ntlha ya gone, fa dipalo tse dingwe tsa batho tse di sa bolelwang di ne tsa isiwa botshwarwa kwa koloneng ya kwa Australia gore ba atlholwe ka go bereka bokete.

PUSO ya United States, e ile ya atlholela ba ba dirileng molato oo dingwaga tse di fitlhang kwa go tse 15 mo dikgolegelong tsa feterale ka dingwaga tse di fetang 130. Mo godimo ga moo, go ile ga okediwa ka gore ba atlholwe gore ba duele diketekete tsa diranta. Go tla go fitlha gompieno, batho ba santse ba atlholelwa loso ka ntlha ya gone kwa Russia le kwa China.

Go sa kgathalesege gore ditšhaba tse dintsi di otlhaela molato ono botlhoko jang, o ntse o tswelela pele. Le e leng go tshaba loso ga go a ka ga kgoreletsa maano a go huma ka bonako a batho ba ba nang le bokgoni jo bo tlhokiwang jwa botegeniki. Badiredibagolo ba dipuso ba akabetse. Ba bolela gore, “go bona se se ka thibelang seno go tla nna thata, jaaka go sa bolo go nna go pala ka makgolo a dingwaga.”

Go dira dilo tsa maitirelo! Nngwe ya borukhutlhi jwa bogologolo mo hisitoring. Mo bofelong jwa lekgolo leno la bo20 la dingwaga, e ile ya nna bothata jwa lefatshe lotlhe, mme bo ntse bo oketsega. Robert H. Jackson, moatlhodi wa Kgotlatshekelo ya Makgaolakgang ya kwa United States, o ne a bolela jaana ka gone: “Go dira dilo tsa maitirelo ga se molato o o dirwang ka phoso, kgotsa ka go tlhoka kitso le fa e le ka go tsewa ke maikutlo, lefa e le ka ntlha ya go bo motho a humanegile thata. Ke bokebekwa jo bo dirwang ka botlhale ke motho yo o nang le bokgoni jwa botegeniki yo o dirisang madi a mantsi go reka didirisiwa.”

Ka sekai, madi a kwa Amerika, a dirwa kwantle ga molao go dikologa lefatshe ka bontsi go gaisa. Mmueledi wa Treasury Department (Lephata la Matlotlo) o ne a bolela jaana: “Madi a United States ga se one fela madi a batho ba a ratang thata mo lefatsheng. Gape ke one a batho ba kgonang go a itirela motlhofo thata.” Se se neng sa akabatsa goromente wa Amerika ke gore madi a mantsi a dipampiri a maitirelo a dirwa ka kwantle ga United States.

Akanya ka kelotlhoko: Makasine wa Time o ne wa bega gore ka 1992, didolara di le dimilione tse 30 (diranta di le dimilione tse 109) tsa madi a maitirelo di ne tsa tshwarwa kwa moseja. Makasine oo o ne wa bega jaana: “Palogotlhe ya ngogola e ne ya tshwara didolara di le dimilione tse 120 [diranta di le dimilione tse 435] mme e solofetswe gore e fete palo eo ka 1994. Gantsi madi ao a dirisiwa fela a sa lemogiwe.” Dipalo tseno ga di fe tshedimosetso e e tletseng. Baitse ba dumela gore didolara tsa maitirelo tse di dirisiwang ka kwa ntle ga United States di ka tswa di le dintsi mo di ka tshwarang dimilione tsa didolara di le dikete di le lesome (dimilione di le dikete di le 36 tsa diranta).

E re ka dinaga tse dintsi di rata madi a Amerika—le e leng go feta madi a tsone—e bile ka gore ga a thata go a itirela, ditšhaba tse dintsi le ditlhopha tsa dinokwane di a a itirela. Kwa Amerika Borwa, barekisi ba diokobatsi ba kwa Colombia ga ba bolo go itirela madi a kwa Amerika ka dingwaga di le dintsi gore ba oketse lotseno lwa bone lwa madi a ba a bonang ka bonokwane. Jaanong, dinaga dingwe tsa Botlhabagare di na le seabe se segolo mo kgwebong ya go dira dilo tsa maitirelo ya lefatshe lotlhe, go ne ga bega jalo U.S.News & World Report. Makasine oo o ne wa oketsa ka gore nngwe ya dinaga tseo “e dirisa mekgwa e e raraaneng thata ya go gatisa e e tshwanang le e e dirisiwang ke U.S. Treasury Department.” “Ka lebaka la seo, [e] ka itirela madi a $100 a dipampiri a boferefere a a ka se lemogiweng a a bidiwang ‘madi a dipampiri a maemo a a kwa godimo.’”

Batho ba kwa Russia, China le dinaga tse dingwe tsa Asia le bone ba itirela madi a mantsi a maitirelo—a gantsi e leng a kwa United States. Go belaelwa gore diperesente tse 50 tsa madi a United States a a dirisiwang kwa Moscow gompieno ke a maitirelo.

Morago ga Ntwa ya kwa Kgogometsong, ka 1991, fa go ne go dirisiwa dimilione di le makgolokgolo tsa didolara tsa United States, “badiri ba dibanka tsa ditšhabatšhaba ba ne ba gakgamadiwa thata ke go fitlhela gore diperesente tse 40 tsa madi a dipampiri a $100 e ne e le a maitirelo,” go ne ga bolela jalo Reader’s Digest.

Fora e na le mathata a yone a madi, fela jaaka dinaga tse dingwe tse dintsi tsa Yuropa. Go itirela madi ga se bothata jwa kwa Amerika fela, jaaka ditšhaba tse dingwe go dikologa lefatshe di ka supa.

Go Itirela Dilo go Tlhofofaditswe

Go tla go fitlha dingwaga di sekae tse di fetileng go ne go tlhokega badiri ba sephiri—bataki, baseti le bagatisi ba ba itseng tiro ya bone sentle—mo go neng go tlhoka diura tse dintsi go dirwa ka kelotlhoko gore go kgonwe go dira madi a tshwanang le a setšhaba sepe fela, mo ba neng ba felela ba dirile madi a a sa tshwaneng sentle le a mmatota. Lefa go ntse jalo, gompieno, ka go na le metšhine ya difotokopi ya mebalabala ya botegeniki jwa maemo a a kwa godimo, metšhine e e gatisang ya leisara e e gatisang matlhakore a mabedi le metšhine e e bonegang setshwantsho, e o ka nnang le yone kwa ofising kana kwa gae, go a kgonega gore mongwe le mongwe a itirele madi a a tshwanang le ape fela a a a batlang ka botegeniki jono.

Re mo motlheng o dilo di itirelwang fela mo godimo ga tafole! Dilo tse pele di neng di tlhoka bokgoni jwa baseti le bagatisi ba ditswerere jaanong di ka kgona go itirelwa ke motho mongwe le mongwe yo o berekang mo ofising le batho ba ba nang le dikhomputara kwa magaeng a bone. Dithulaganyo tsa go gatisa tsa dikhomputara tse di jang madi a a kwa tlase ga diranta tse 18 000, jaanong di ka dira madi a maitirelo a e leng gore le baitse ba ba rutetsweng tiro ba ka palelwa ke go a lemoga. Seno se ka raya gore motho yo o tlhokang madi tota a ka se ka a tsaya matsapa a go ya kwa motšhineng o o ntshang madi kwa bankeng ka go itirela madi a gagwe—ka bontsi jo a bo tlhokang! Mekgwa eno e setse e le didirisiwa tse di maatla tsa batho ba ba itirelang dilo mo motlheng wa gompieno. U.S.News & World Report e ne ya kwala jaana: “Dikebekwa tseno tse di botlhale di nna di ntse di atlega fela mme ga di tshwarwe, mme letsatsi lengwe di tla nna kotsi thata mo mading a dinaga tse di nonofileng tsa lefatshe.”

Ka sekai, kwa Fora, diperesente tse 18 tsa madi a selekanyo sa di-franc di le dimilione tse 30 (dimilione tse 18 tsa diranta) tsa madi a maitirelo a a neng a gapiwa ka 1992 a ne a dirilwe mo metšhineng ya mo diofising. Modiredimogolo wa Banque de France o leba seno se se kotsi fela mo tsamaisong ya ikonomi mme gape se ka dira gore batho ba se ka ba ikanya puso. O ne a bua jaana a hutsafetse: “Fa batho ba utlwa gore motho o ka kgona go itirela madi a a siameng a pampiri ka tegenoloji e batho ba bantsi ba nang le yone, ba simolola go belaela.”

Ka go dira maiteko a go emisa madi a maitirelo kwa Amerika le mo dinageng tse dingwe, go dirwa madi a masha a dipampiri, e bile mo dinageng tse dingwe madi a masha a dipampiri a setse a dirisiwa. Ka sekai, setshwantsho sa ga Benjamin Franklin se se mo mading a Amerika a pampiri a $100, se tla okediwa ka halofo mme se tla sutelediwa ka disentimetara tse pedi go ya ka fa molemeng. Reader’s Digest e ne ya bega jaana: “Go tla dirwa diphetogo tse dingwe tse 14 fa go setiwa go tsenngwa dilo tsa sephiri tse di thibelang go dira madi a maitirelo.” Go santse go akanyediwa le diphetogo tse dingwe tse dintsi tse di tshwanang le matshwao a a bonalang fela fa a lebaganngwa le lesedi le dienke tse di fetolang mebala fa o a sekamisa ka ditsela tse di farologaneng.

Fora e na le lobakanyana e ntse e tsenya dilo tse disha tse di thibelang go itirela madi fa e dira madi a dipampiri, mo go solofelwang gore go tla kgoreletsa batho ba ba dirang madi a maitirelo ka selekanyo se se rileng. Lefa go ntse jalo, mmueledi wa Banque de France o dumalana gore “go santse go sena mokgwa ope wa tegenoloji o o ka kgoreletsang batho ba ba ka nnang ba dira dilo tsa maitirelo ka botlalo, mme,” o ne a oketsa jaana, “jaanong re kgona go tsenya dilo tse di kgoreletsang mo mading ka boone gore go dira madi a maitirelo e nne tiro [e e seng motlhofo] le e e batlang madi a mantsi thata.” O tlhalosa dilo tseno tse di kgoreletsang jaaka “kgato e kgolo e e sireletsang mo bathong ba ba dirang dilo tsa maitirelo.”

Jeremane le Great Britain di na le lobaka di ntse di dira diphetogo tsa go sireletsa madi a tsone ka go tsenya ditlhale tse di logelwang mo teng ga madi a bone gore go nne thata go leka go itirela madi a a tshwanang le one. Madi a pampiri a $20 a Canada a na le mothalo o o khutlonnè o o phatsimang o o bidiwang sedirisiwa se se thibelang go itirela madi o o bonwang fela ka matlho, se se ka se kang sa dirwa mo metšhineng ya difotokopi. Australia e ne ya simolola go dira madi a polasetiki a banka ka 1988 gore ba tsenye dilo dingwe mo go one tsa go a sireletsa tse di ka se dirweng mo pampiring. Finland le Austria di dirisa ditshipi tse di tshesane mo mading a bone a dipampiri. Tseno di a galalela gape di fetola mmala jaaka holokerama. Lefa go ntse jalo, balaodi ba puso ba boifa gore batho ba ba dirang dilo tsa maitirelo ga ba na go salela kwa morago gore ba dire diphetogo dingwe gore ba kgone go tswelela ka tiro ya bone ya bonokwane—go sa kgathalesege gore go dirwa maiteko ape a go baakanya, maiteko a bone a go dira dilo dingwe tse disha a ka nna a felela a sa dira jaaka go diragetse mo nakong e e fetileng. Modiredimogolo wa Lephata la Tsa Matlotlo o bolela jaana: “Go tshwana le polelwana ya bogologolo e e reng, o aga lebota la dikgato tse 8, mme basimane ba dinokwane bone ba dira lere ya dikgato tse 10.”

Go gatisa madi a maitirelo ke botlhajana bo le bongwe fela jwa motho yo o dirang dilo tsa maitirelo, jaaka ditlhogo tse di latelang di tla bontsha.

[Mafoko a a mo go tsebe 24]

Mekgwa ya go gatisa go dirisiwa khomputara e ja madi a a kwa tlase ga diranta tse 18000 jaanong e ka kgona go dira madi a maitirelo a e leng gore le baitse ba ba rutetsweng tiro eo ba ka nna ba fitlhela go le thata gore ba kgone go a lemoga