Bukanyana Ya me E Pinki

Jaaka go boletse Cynthia Newell

FA KE ne ke le dingwaga di le supa, mosetsana mongwe yo o neng a le mo beseng ya sekolo e ke neng ke tsamaya ka yone kwa Shreveport, Louisiana, kwa U.S.A., o ne a nnaya bukanyana e pinki e e nang le setlhogo se se reng Go Reetsa Morutisi yo Mogolo. O ne a mpolelela gore o tla e nnaya ka disente di le 50. O ne a ya le nna gae mme ra bala mmogo dipeni di le 50.

Ke ne ke rata bukanyana e pinki eo thata. Ka bonako morago ga go e amogela, ke ne ka lwala mme ka robala kwa kokelong. E le go nkgomotsa, ba lelapa la gaetsho ba ne ba mpalela go tswa mo bukeng ya me e ke e ratang thata. Le fa go ntse jalo, fa ke ntse ke gola, ke ne ka fokotsa go bala bukanyana e pinki eo, e re ka e ne e kwaletswe bana thata. Buka eo e ne e nthutile dithuto tse di botlhokwa mme ke ne ke tlhoka go tlhaloganya dilo botoka. Ke ne ka swetsa go ya kwa kerekeng e e farologaneng beke nngwe le nngwe ke batla dikarabo tsa Baebele malebana le dipotso tse ke neng ke na le tsone. Le fa go ntse jalo, ga ke a bona ditlhaloso tse di nkgotsofatsang.

Ka nako ya fa ke ne ke setse ke le kwa sekolong se segolwane, bodumedi bo ne bo sa tlhole bo le botlhokwa mo go nna, le fa gone ke ne ke sa ntse ke batla go nna le kitso ya Baebele e bile ke bala Baebele ya me ka metlha. Ka letsatsi lengwe ke ne ka lemoga gore mongwe yo ke neng ke na le ene mo tlelaseng ga a dire maikano a setšhaba. Ke ne ka mmotsa ka gone mme o ne a re, “Ke setse ke diretse Jehofa maikano, ka jalo nka ikanela Modimo jang ka ba ka ikanela le folaga?” A bo seo se ne se utlwala jang ne! ‘Mme gone Jehofa ke mang?’ Ke ne ka ipotsa jalo.

Ngwana yo ke neng ke tsena le ene mo tlelaseng o ne a araba potso nngwe le nngwe e ke neng ke e botsa a dirisa Baebele. Ke ne ka ipotsa jaana: ‘O kgonne jang go ithuta dilo tseno tsotlhe? Re a lekana ka dingwaga; le fa go ntse jalo o itse sengwe le sengwe ka Baebele!’ O ne a tlhalosa jaana: “Ke ithuta Baebele kwa Holong ya Bogosi.” Ke ne ka dumela ka bonako fa a ne a ntaletsa go nna teng kwa pokanong ka Sontaga. Ke ne ke setse ke ile kwa kerekeng nngwe le nngwe mo toropong, mme ka tsela nngwe ga ke a ka ka ya kwa Holong ya Bogosi ya Basupi ba ga Jehofa. Ka Sontaga eo, ke ne ke itse gore ke bone lefelo le le rutang boammaaruri jo bo tswang mo Baebeleng.

Morago ga pokano ke ne ka ya kwa khaontareng ya dibuka, mme mo shelefong e e kwa godimo ke ne ka bona bukanyana ya me e pinki! Go ne go setse go fetile dingwaga di le lesome fa e sa le ke fiwa buka eo ke mosetsana mongwe mo beseng, ka jalo, ke ne ke lebetse gore ke ne ke e filwe ke mang. Mme jaanong ke ne ke gakologelwa—e ne e le Nancy, ene mosetsana yo o neng a ntaleditse go tla kwa pokanong eo!

Morago ga foo, ke ne ka simolola go nna le thuto ya beke le beke ya Baebele mme ka gatela pele ka bonako. Ke ne ke ithutile go le gontsi jaana mo bukanyaneng ya me e pinki mo e leng gore ke ne ka tlhaloganya ka bonako kitso e ke neng ke e bona mo thutong ya Baebele. Go ise go ye kae ke ne ka ineela mo go Jehofa mme ka kolobediwa ka 1985 ke le dingwaga di le 18. Ka nako eo, Nancy o ne a fudugetse kwa Florida mme re ne re sa tlhole re na le kgolagano epe.

Morago ga dingwaga di le mmalwa ke ne ka nyalwa. Ka 1991, nna le monna wa me e bong Drew re ne ra simolola bodiredi jwa nako e e tletseng re le babulatsela mo torotswaneng nngwe kwa botlhaba jwa Texas. Ke ne ke sa itse gore go diragetse eng ka Nancy. Mme bosigo bongwe fa ke ntse ke bala Tora ya Tebelo ya December 1, 1992, ke ne ka goa ka re: “Ke bone Nancy! Ke bone Nancy!” O ne a le mo setshwantshong sa batho ba ba neng ba sa tswa go aloga mo sekolong sa barongwa sa Gileade. Ene le monna wa gagwe e bong Nick Simonelli, ba ne ba abetswe kwa Ecuador, kwa Amerika Borwa.

Ka 2006 nna le monna wa me re ne ra ikwadisetsa go nna baithaopi ba ba thusang mo diporojekeng tsa go aga tsa dinaga di sele tsa Basupi ba ga Jehofa. A bo re ne ra itumela thata jang ne fa re ne re utlwa gore kabelo ya rona ya ntlha e tla nna porojeke ya go oketsa moago wa lekala kwa Ecuador! Ka letsatsi la me la ntlha kwa lekaleng la Ecuador, ke ne ka bona Nancy a tsena! Go diragetse fela gore ka letsatsi leo a bo a etetse kwa lekaleng. Re ne ra bonana mme ra tlamparelana—re ne re kopane gape dingwaga di le 32 morago ga gore ke amogele bukanyana ya me e pinki! A bo ke leboga Jehofa jang ne go bo ke ile ka amogela buka eo le ka mosetsanyana yo o neng a nnaya yone!

[Lebokoso/Ditshwantsho mo go tsebe 23]

DI AMILE MATSHELO A BATHO BA LE DIMILIONE

Ka 2003, morago ga gore buka ya Go Reetsa Morutisi yo Mogolo e nne teng ka dingwaga di le 32, go ne ga gatisiwa kgatiso ya yone e e tsosolositsweng. E na le setlhogo se se reng Ithute mo Morutising yo Mogolo. Gompieno jaana, go gatisitswe palogotlhe ya dikhopi tsa dibuka tseno tse di nang le dithuto tsa ga Jesu tse di fetang dimilione di le 65 ka dipuo tse di fetang 100. O ka iponela khopi ya buka ya Ithute mo Morutising yo Mogolo mo go mongwe wa Basupi ba ga Jehofa yo o mo lefelong la lona.

[Ditshwantsho mo go tsebe 23]

Ditshwantsho: Fa re ne re itsane re le bana

Cynthia

Nancy

Setshwantsho se se kwa morago: Dingwaga moragonyana, kwa lekaleng la Ecuador