Se Lebale go re Ke a Leboga!

O FELELEDITSE leng go amogela molaetsa o o kwadilweng wa ditebogo? O feleleditse leng go o romela?

Mo lefatsheng leno la ditlhaeletsano tsa dikhomputara, melaetsa e e kwadilweng ka seatla ya ditebogo e setse e le selo se se bonwang sewelo. Le fa go ntse jalo, go re “ke a leboga” ka go kwalela batho molaetsa ke tsela e e kgethegileng ya go ba itsise gore o leboga molemo o ba go o diretseng. Fa tlase fano ke dingwe tsa dikakantsho tsa kafa o ka dirang jalo ka gone.

1. Kwala molaetsa ka seatla go bontsha gore o tswa mo go wena.

2. Dirisa leina la motho yo o batlang go mo leboga.

3. Fa e le gore o amogetse mpho, e umake mme o bolele gore o ikaeletse go e dirisa jang.

4. Leboga motho yoo gape kwa bofelong jwa molaetsa.

Molaetsa wa go leboga o o kwadilweng ka seatla o itumedisa motho yo o o amogelang.

Ka jalo, mo nakong e e tlang fa motho a go amogela sentle, a go direla sengwe se se molemo, kgotsa a go fa mpho, bontsha gore o anaanela maiteko a gagwe. Se lebale go re ke a leboga!

[Lebokoso/Ditshwantsho mo go tsebe 28, 29]

Rakgadi Mary yo o rategang, #2

Ke go leboga fela thata ka tshupanako e e nang le alamo! #3 E re ka ke na le bothata jo bogolo jwa go selwa, ke setse ke simolotse go e dirisa. Ke itumeletse go go bona beke e e fetileng mme ke solofela gore o gorogile sentle kwa gae. Re lebeletse pele go go bona gape mo nakong e e tlang.

Ke go leboga gape ka mpho e ke neng ke e tlhoka! #4

Setlogolo sa gago,

John

[Setshwantsho]

#1

[Lebokoso mo go tsebe 29]

DINTLHA TSE O KA DI DIRISANG

● O se ka wa umaka madi a o a neilweng jaaka mpho ka tlhamalalo. Ka sekai, go na le go umaka ka tlhamalalo gore o filwe bokae, o ka nna wa re: “Ke lebogetse mpho ya gago ya bopelotshweu. Ke ikaeletse go e dirisetsa . . . ”

● Akaretsa fela tshedimosetso e e amanang le mpho le molaetsa wa gago wa go e leboga. Eno ga se nako ya go tlhalosa thata ka malatsi a gago a boikhutso kgotsa ka go ya ga gago kwa bookelong bosheng.

● O se ka wa umaka mathata ape a o nnileng le one ka mpho eo. Ka sekai, go tla bo go sa siama go kwala jaana: “Ke leboga ka hempe e o e mphileng—mme gone ga e ntekane!”

[Lebokoso mo go tsebe 29]

Baebele e re kgothaletsa go nna batho ba ba bontshang moya wa go leboga. (Luke 17:11-19) E re kgothaletsa go ‘rapela Modimo re sa kgaotse’ mme e oketsa jaana: “Lebogang ka ga dilo tsotlhe.”—1 Bathesalonika 5:17, 18.