‘Oku Mau Talagofua ki he Otuá i he Tagatá’
ʻI heʻene taʻu 17, ko Adam naʻe kau ia ʻi he kau ikuna ʻe toko tolu ʻo ha feʻauhi naʻe fakapaʻanga ʻe he Mesiume Fakamanatu Tāmate Fakatokolahi U.S. Ko kinautolu naʻa nau kau mai mo haʻanau meʻá—ʻa ia ko e meimei toko 500 fakakātoa—naʻa nau ngāueʻaki ʻa e fakatātā pe ko e faitohi ke fakahāhaaʻiʻaki ʻa e loto-toʻa ʻi he malumalu ʻo e fakafeʻātungia faka-Nasí. Ko Adam ko e taha ia ʻo e Kau Fakamoʻoni ʻa Sihová, pea naʻá ne fili ke faʻu ha fakatātā ʻaki ʻa e pepa mo e tupenu ʻa ia te ne fakatātaaʻi ʻa e fakafili naʻe fehangahangai mo e kau mēmipa ʻo e lotu ʻoku kau ki aí ʻi he malumalu ʻo e pule faka-Nasí. Ko e fakatātaá, ko e lau ia ʻa Adam, naʻe fakahaaʻi ai, ʻikai ko e foʻi pe mamahi, ka ko e fiefia he naʻe ikuna ʻa e Kau Fakamoʻoni ʻa Sihová ʻi he ʻohofi ʻe he pule fakamamahi ko iá. ʻOku hā ai ʻa e kiʻi taʻahine. Ko e hā hono ʻuhingá? “Ke fakahaaʻi naʻa mo e fānaú naʻa nau nofoʻaki mālohi ai pē ʻi he fakatanga faka-Nasí,” ko e lau ia ʻa Adam.
ʻOku ʻiloa lahi ko e lolotonga ʻa e kuonga faka-Nasí, naʻe fakafisi ʻa e Kau Fakamoʻoni ʻa Sihová ke salute kia Hitilā pe poupou ki heʻene faʻahi fakapolitikalé. Ko ʻenau tuʻú ʻoku fakahaaʻi ia ʻi he tuliki toʻomataʻu ki ʻolunga ʻo e fakatātā ʻa Adam. ʻOku hiki ai ha tohi naʻe ʻoatu ki he puleʻanga Siamané ʻi ʻOkatopa 7, 1934, ʻe he fakatahaʻanga kotoa ʻo e Kau Fakamoʻoni ʻa Sihová. ʻI hono konga, ʻoku pehē ʻe he tohí: “ʻOku ʻi ai ʻa e fepaki hangatonu ʻi he vahaʻa ʻo hoʻo laó mo e lao ʻa e ʻOtuá, pea, ʻi he muimui ki he taki ʻa e kau ʻapositolo faitōnungá, ‘oku totonu e mau talagofua ki he Otuá i he tagatá,’ pea ko e meʻa eni te mau faí. (Ngāue 5:29, PM) . . . Koeʻuhi ʻoku hokohoko atu ho puleʻangá mo hono kau ʻōfisá ʻi hoʻo feinga ke fakamālohiʻi kimautolu ke talangataʻa ki he lao māʻolunga taha ʻo e ʻunivēsí, ʻoku ueʻi ai kimautolu ke ʻoatu he taimi ko ení ha fakatokanga te mau talangofua, ʻi heʻene kelesí, ki he ʻOtua ko Sihová pea falala kakato kiate Ia ke fakahaofi kimautolu mei he fakafeʻātungiá mo e kau fakafeʻātungia kotoa pē.”
ʻOku laukauʻaki ʻe Adam ʻa hono tofiʻa fakalaumālié. “ʻOku tui mālohi ʻa e Kau Fakamoʻoni ʻa Sihová ke ʻoua ʻe fai ha kovi ki honau kaungā faʻahinga ʻo e tangatá pea ki hono ʻoatu ʻa e lotú ʻo ʻikai ki ha toe taha ka ki he ʻOtuá, neongo kapau ʻoku ʻuhinga eni ko e mate,” ko ʻene laú ia. Ko e tuʻunga taʻetoeueʻia ʻo e Kau Fakamoʻoni ʻa Sihová ʻoku tapua mai ia ʻi he ʻuluʻi kaveinga ʻo e fakatātā ʻa Adam: “Te Mau Talangofua ki he ʻOtuá ʻi he Tangatá!”