Līpooti ʻa e Kau Fanongonongo ʻo e Puleʻangá
Iku ʻa e Kātakí ki he Tāpuaki ʻa e ʻOtuá ʻi Malauī
KO Siosifá ko ha sevāniti anga-tonu ia ʻa Sihova. (Hepelu 11:22) Ko ha toe tangata foki ia naʻe tuʻu-ki-muʻa ʻi he kātakí. Neongo naʻe lavakiʻi ia ʻe hono fanga tokouá tonu, fakatau atu tuʻo ua ke nofo pōpula, pea lī ki pilīsone ki mui ai ʻi he ngaahi tukuakiʻi loi, naʻe ʻikai ke loto-mafesi ai ʻa Siosifa. ʻI hono kehé, naʻá ne kātekina ʻi he anga-kātaki ʻa e ngaahi taʻu ʻo e mamahí, ʻo tatali anga-fakatōkilalo ki he tāpuaki ʻa Sihová.—Senesi 37:23-28, 36; 39:11-20.
ʻOku pehē pē mo e ʻahó ni, kuo tatali anga-kātaki ʻa e Kau Fakamoʻoni ʻa Sihova ʻi Malauií ki he tāpuaki ʻa e ʻOtuá. ʻI he taʻu ʻe 26, naʻe kātekina ai ʻe he Kau Fakamoʻoni Kalisitiane ko ʻení ʻa e ngaahi fakataputapui fakapuleʻangá, fakafepaki kakaha, mo e ngaahi fakamamahi lahi. Ka kuo huhuʻi ʻa ʻenau kātakí!
ʻI he taimi naʻe mapuna hake ai ʻa e fakatangá ʻi Malauī ʻi he 1967, naʻe toko 18,000 nai ʻa e kau malanga ʻo e Puleʻangá. Fakaʻuta atu ki he fiefia ʻa e Kau Fakamoʻoní, ʻi heʻenau ʻilo naʻe kamataʻaki ʻa e taʻu fakangāue ʻo e 1997, ha tumutumu foʻou ko e kau malanga ʻe toko 38,393—ʻo tokolahi ange ʻaki ʻe ia ʻa e liunga ua ʻi he tokolahi ko ia ʻi he kamata ʻo e fakataputapuí! ʻIkai ngata aí, ko e kau maʻu ʻo e ngaahi Fakataha-Lahi Fakavahe “Kau Talafekau ʻo e Melino Fakaʻotuá” ʻe 13 naʻe fai ʻi Malauií ne tupulaki ia ʻo laka hake ʻi he toko 117,000. Kuo tāpuakiʻi moʻoni ʻe Sihova ʻa ʻenau tuí mo e kātakí.
Ko ha fakatātā ʻo e tāpuaki ko ʻení ko e meʻa naʻe hokosia ʻi he kiʻi tamasiʻi taʻu 14 ko hono hingoá ko Machaka. ʻI he taimi naʻe tali ai ʻe Machaka ha tuʻuaki ange ke ako ʻa e Tohitapú mo e Kau Fakamoʻoni ʻa Sihová, naʻe hoko ʻo loto-mamahi ʻaupito ʻa ʻene ongo mātuʻá. Naʻá na pehē ange: “Kapau ʻokú ke loto ke hoko ko ha Fakamoʻoni, kuo pau ke ke mavahe mei ʻapi.” Kae kehe, naʻe ʻikai ke fakalotosiʻi ia ʻe he fakamanamana ko ʻení mei he hoko atu ʻa ʻene akó. Ko hono olá, naʻe faʻao ʻe he ongo mātuʻa ʻa Machaka ʻa hono valá kotoa. Naʻe hanga leva ʻe he fanga tokouá ʻo fakatau ange ʻa hono vala. ʻI he taimi naʻe ʻilo ai ki he meʻá ni ʻa e ongo mātuʻa ʻa Machaka, naʻá na tala ange kiate ia: “Kapau ʻoku teu ʻa e Kau Fakamoʻoní ke tokoniʻi koe, kuo pau ke ke mavahe, pea ʻalu ʻo nofo mo kinautolu.” Hili ʻene fakakaukauʻi lelei ʻa e meʻá, naʻe mavahe leva ʻa Machaka mei ʻapi, pea naʻe ʻave ia ʻe ha fāmili Fakamoʻoni ʻi he fakatahaʻanga honau feituʻú ke nau nofo.
Naʻe loto-mamahi lahi ai ʻa e ongo mātuʻa ʻa Machaka ʻo na fakapapau ke hiki mei he feituʻú koeʻuhi ke na fakaʻehiʻehi ai mei ha toe fetuʻutaki mo e Kau Fakamoʻoní. Ko e moʻoni, naʻe mamahi lahi ʻa Machaka ʻi he meʻá ni, ka naʻá ne maʻu ʻa e fiemālie lahi ʻi he taimi naʻe fetalanoaʻaki ai mo ia ʻa e fanga tokouá ʻi he Sāme 27:10, ʻa ia ʻoku pehē ai: “Neongo ʻe liʻaki au ʻe heʻeku tamai mo ʻeku faʻe, ʻe fakahoko au ʻe Sihova kiate ia pe.”
Naʻe molū hifo ʻi ha taimi ʻa e tuʻunga ʻo e ongo mātuʻa ʻa Machaka, peá ne pehē ke toe foki ki ʻapi. ʻOku hā mahino ko e fakapapau ʻa hona fohá ke tauhi ʻa Sihová naʻe maongo mālohi ia kiate kinaua, koeʻuhi he naʻá na loto foki mo kinaua ke ako Tohitapu mo e Kau Fakamoʻoni ʻa Sihová! Naʻá na toe maʻu foki ʻa e ʻaho kotoa ʻe tolu ʻo e Fakataha-Lahi Fakavahe “Kau Talafekau ʻo e Melino Fakaʻotuá,” ʻa ia naʻe ueʻi ai kinaua ʻi he hili iá ke na fakahā: “Ko e moʻoni, ko e kautaha ʻeni ʻa e ʻOtuá.”
ʻIo, ʻe hoko nai ʻa e fakafepakí ko ha ʻahiʻahi lahi, ka ʻoku ʻikai ke foʻi ai ʻa e kau talafekau mateaki ʻa e ʻOtuá ia. ʻOku nau tutui loto-toʻa atu, ʻi he ʻiloʻi “ʻoku tupu mei he mamahi ʻa e kataki; pea mei he kataki, ʻa e lava ʻo e ʻahiʻahi [“tuʻunga fakahōifua,” NW].” (Loma 5:3, 4) ʻOku lava moʻoni ke fakapapauʻi ʻe he Kau Fakamoʻoni ʻa Sihova ʻi Malauií ʻoku iku ʻa e kātakí ki he tāpuaki ʻa e ʻOtuá.