Ko e ʻAʻeva ʻi he ʻAlunga ʻo Sihová ʻOku Mohu Fakakoloa
KUO faifai ange peá ke fononga ʻi he ʻotu moʻungá? Kapau ko ia, ngalingali naʻá ke ongoʻi ʻo hangē ʻokú ke ʻi he tumuʻaki ʻo e māmaní. He fakafiefia ē ke mānavaʻaki ʻa e ʻea maʻá, ke vakai atu ki he mamaʻó pea ke nōfoʻi ʻi hono fakaʻofoʻofa fakanatulá! Mahalo ko e ngaahi loto-moʻua fakaʻaho ʻi ʻapí naʻe hā ʻikai loko mahuʻinga ia.
Ki he kakai tokolahi tahá ko e ngaahi ʻeveʻeva peheé ʻoku siʻi pe tātātaha ia, ka ʻo kapau ko ha Kalisitiane ʻosi fakatapui koe, kuó ke ʻosi ʻaʻeva nai ʻi ha taimi ʻi ha konga fonua māʻolunga—ʻi ha ʻuhinga fakalaumālie. Hangē ko e tokotaha-tohi-saame ʻo e kuonga muʻá, ʻoku ʻikai ha veiveiua kuó ke lotu: “ʻEiki, fakaʻilo mai ho ngaahi founga; ako kiate au ho ngaahi ʻalunga.” (Sāme 25:4) ʻOkú ke manatuʻi pe naʻe anga-fēfē ʻa hoʻo ongoʻí ʻi he taimi naʻá ke fuofua ʻalu hake ai ki he moʻunga ʻo e fale ʻo Sihová pea kamata ke ʻaʻeva ʻi hono ngaahi potu māʻolungá? (Maika 4:2; Hapakuke 3:19) ʻOku ʻikai toe veiveiua, naʻe vave ke ke fakatokangaʻi ko e ʻaʻeva ʻi he ngaahi ʻalunga māʻolunga ko eni ʻo e lotu maʻá naʻe ʻoatu ai ʻa e maluʻanga mo e fiefia kiate koe. Naʻe kamata ke ke hokosia ʻa e ongoʻi ʻa e tokotaha-tohi-sāmé: “Oku monuia ae kakai oku nau iloʻi ae ogoogo fakafiefia: te nau aeva, E Jihova, i he māma o ho fofoga.”—Sāme 89:15, PM.
Kae kehe, ʻi he taimi ʻe niʻihi, ko e kau fononga ʻi he feituʻu moʻungaʻiá kuo pau ke nau fāinga mo e ngaahi foʻi tahake lōloa mo māʻolungá. ʻOku kamata ke langa honau vaʻé, pea ʻoku nau hoko ʻo ongosia. Ko kitautolu foki ʻoku lava ke tau hokosia ʻa e ngaahi faingataʻa ʻi heʻetau ngāue fakaʻotuá. Ki muí ni, kuo hoko nai ʻo kiʻi fakaongosia ʻa ʻetau laká. ʻE lava fēfē ke tau toe maʻu mai ʻetau longomoʻuí mo ʻetau fiefiá? Ko ha fuofua sitepu, ke ʻiloʻi ʻa e tuʻunga aoniu ʻo e ngaahi founga ʻa Sihová.
Ngaahi Lao Māʻolunga ʻa Sihová
Ko e ngaahi founga ʻa Sihová ʻoku ‘māʻolunga ia ʻi he ngaahi founga ʻa e tangatá,’ pea ko ʻene lotú kuo ‘fokotuʻu ʻi he ngaahi moʻungá, pea mahiki hake ia ʻi he ngaahi foʻi maʻolungá.’ (Aisea 55:9, NW; Maika 4:1) Ko e poto ʻo Sihová “ko e poto ʻoku mei ʻolunga.” (Semisi 3:17) Ko ʻene ngaahi laó ʻoku māʻolunga ia ʻi he ngaahi lao kehe kotoa pē. Ko e fakatātaá, ʻi ha taimi ʻa ia naʻe fai ai ʻe he kau Kēnaní hano feilaulauʻi anga-fakamamahi ʻo e fānaú, naʻe ʻoange ai ʻe Sihova ki he kau ʻIsilelí ʻa e ngaahi lao ʻa ia naʻe ʻi ha tuʻunga māʻolunga fakaeʻulungaanga pea fakaʻilongaʻiʻaki ʻa e manavaʻofá. Naʻá ne tala kia kinautolu: “Oua naa ke tokaga koeuhi koe mata oe majiva, be fakaabaaba koeuhi koe mata oe eiki. . . . Koe muli . . . e tatau ia moe toko taha kuo tubu iate kimoutolu, bea te ke ofa kiate ia o hage ko hoo ofa kiate koe.”—Livitiko 19:15, 34, PM.
ʻI he senituli ʻe taha nima ki mui ai, naʻe ʻomai ai ʻe Sīsū ha ngaahi fakatātā lahi ange ʻo e ‘lao fakaʻeiʻeiki’ ʻa Sihová. (Aisea 42:21, NW) ʻI he Malanga he Moʻungá, naʻá ne tala ki heʻene kau ākongá: “Mou ʻofaʻi homou ngāhi fili, pea hufia ʻa kinautolu ʻoku nau fakatangaʻi kimoutolu. Koeʻuhi ke mou hokosi hoʻomou Tamai ʻoku ʻi Hevani.” (Mātiu 5:44, 45) “Ko ia ʻilonga ha meʻa ʻoku mou loto ke fai ʻe he kakai kiate kimoutolu, fai pehe foki kiate kinautolu,” ko ʻene tānakí atu ia. “He ko e Lao ia mo e Tohi Palofita.”—Mātiu 7:12.
Ko e ngaahi lao māʻolunga ko ení ʻoku ʻi ai hono ola ʻi he loto ʻo e kakai ongongofuá, ʻi hono ueʻi kinautolu ke nau faʻifaʻitaki ki he ʻOtua ʻoku nau lotu ki aí. (Efeso 4:32 [Efeso 5:1, PM]; 1 Tesalonaika 2:13) Fakakaukau atu ki he liliu naʻe hoko ʻi he tuʻunga ʻo Paulá. ʻI heʻetau fuofua fanongo ʻo kau kiate iá, naʻá ne “fakavaʻevaʻe hono fakapōngi” ʻo Sitīvení mo ne “haveʻi ʻa e siasi.” ʻI ha ngaahi taʻu siʻi pē ki mui, naʻá ne fai fakaalaala ai ki he kau Kalisitiane ʻi Tesalonaiká ʻo hangē “ha fefine toutama ʻa ia ʻoku ne tauhi siʻene fanau aʻana.” Ko e akoʻi fakaʻotuá naʻá ne liliu ʻa Paula mei ha tokotaha fakafepaki ki ha Kalisitiane anga-ʻofa. (Ngāue 8:1, 3; 1 Tesalonaika 2:7) Naʻá ne houngaʻia moʻoni ʻi he hoko ʻo oʻi ʻa hono angaʻitangatá ʻe he akonaki ʻa Kalaisí. (1 Timote 1:12, 13) ʻE lava fēfē ʻe ha houngaʻia tatau ke ne tokoniʻi kitautolu ke tau hanganaki ʻaʻeva ʻi he ngaahi ʻalunga māʻolunga ʻo e ʻOtuá?
ʻAʻeva Loto-Houngaʻia
ʻOku fiefia ʻa e kau fonongá ʻi he ngaahi ʻata fakaholomamata ʻoku ʻomai ʻe he fonua māʻolungá. ʻOku nau toe ako ke nōfoʻi fiefia ʻi he fanga kiʻi meʻa iiki ʻi he tafatafaʻaki halá, hangē ko ha foʻi maka ʻoku kehe, ko ha matalaʻiʻakau fakaʻofoʻofa pe ko e kilofi ʻo ha monumanu kaivao. ʻI he tuʻunga fakalaumālié, ʻoku fiemaʻu ke tau tokanga ki he ngaahi pale—lahi mo e siʻi—ʻoku hoko mai ʻi he ʻaʻeva mo e ʻOtuá. Ko e tokanga ko ení ʻe lava ke ne ʻai ke tau laka longomoʻui ai pea liliu ha lue fakaongosia ki ha lue fakaivimoʻui. Te tau fakaongo atu ai ʻa e lea ʻa Tēvitá: “Ke ke fakatokagaʻi au keu fanogo ki hoo aloofa i he bogibogi; he oku ou falala kiate koe: fakailo mai kiate au ae hala aia oku totonu keu alu ai.”—Sāme 143:8, PM.
Ko Mary, ʻa ia kuo ʻaʻeva ʻi he ngaahi taʻu lahi ʻi he ʻalunga ʻo Sihová, ʻokú ne pehē: “ʻI heʻeku vakai ki he fakatupu ʻa Sihová, ʻoku ʻikai ngata pē ʻi heʻeku sio ai ki hono sīpinga fihí ka ko e ʻulungaanga fakamāfana ʻo e ʻOtuá. Pe ko ha manu, foʻi manupuna, pe ko ha ʻinisēkite, ko kinautolu taki taha ko ha kiʻi foʻi māmani ia, ʻoku fonu ʻi he ngaahi meʻa fakamānako. Ko e fiefia tatau ʻoku hoko mai mei he ngaahi moʻoni fakalaumālie ʻa ia ʻoku hoko ʻo hā māʻalaʻala ange ʻi he faai mai ʻa e ngaahi taʻú.”
ʻE lava fēfē ke tau fakalolotoʻi ʻetau houngaʻiá? Ko ha tafaʻaki ʻe taha, ke ʻoua ʻe fakamaʻamaʻaʻi ʻa e meʻa kuo fai ʻe Sihova maʻatautolú. “Lotu taʻetuku,” ko e tohi ia ʻa Paulá. “Fakafetaʻi ʻi he meʻa kotoa pe.”—1 Tesalonaika 5:17, 18; Sāme 119:62.
Ko e ako fakafoʻituituí ʻoku tokoni ia ki ha laumālie houngaʻia. Naʻe naʻinaʻi ʻe Paula ki he kau Kalisitiane Kolosé: “Ke mou aeva ia [Kalaisi Sīsū] . . . [ʻo] mou tubulekina ai i he fakafetai.” (Kolose 2:6, 7, PM) Ko hono lau ʻa e Tohitapú pea fakalaulauloto ki he meʻa ʻoku tau laú ʻoku fakaivimālohiʻi ai ʻetau tuí pea tohoakiʻi ai kitautolu ke ofi ange ki he Faʻu-Tohi ʻo e Tohitapú. ʻI hono ngaahi pēsí kotoa ko e ngaahi koloa ia ʻe lava ke ne ueʻi kitautolu ke tau “tubulekina ai i he fakafetai.”
Ko e tauhi kia Sihova fakataha mo hotau fanga tokouá ʻoku toe faingofua ange ai ʻa e halá. Naʻe pehē ʻe he tokotaha-tohi-sāmé ʻo kau kiate ia: “Ko e kaumeʻa au ʻo e kakai kotoa ʻoku ʻapasia atu.” (Sāme 119:63) Ko e niʻihi ʻo hotau ngaahi mōmeniti fakafiefia tahá ʻoku fakamoleki ia ʻi he ngaahi ʻasemipilī faka-Kalisitiané pe ko ha ngaahi taimi kehe ʻa ia ʻoku tau feohi ai mo hotau fanga tokouá. ʻOku tau ʻiloʻi ko hotau fāmili faka-Kalisitiane mahuʻinga ko ia ʻi māmani lahí ʻoku ʻi aí ni ia koeʻuhi ko Sihova pea mo ʻene ngaahi founga māʻolungá.—Sāme 144:15e.
Tuku kehe ʻa e houngaʻiá, ko e ongoʻi ʻoku ʻi ai ha fatongiá te ne fakaivimālohiʻi kitautolu ke tau hanganaki laka ki muʻa ʻi he ngaahi ʻalunga māʻolunga ʻo Sihová.
ʻAʻeva mo e Ongoʻi ʻo ha Fatongia
Ko e kau fononga ʻoku nau ongoʻi ʻoku ʻi ai ha fatongiá ʻoku nau ʻiloʻi ʻa e fiemaʻu ke laka tokanga kapau ʻoku fiemaʻu ke nau fakaʻehiʻehi mei he hoko ʻo molé pe ko e hē ʻo fuʻu ofi ki he ngaahi lilifa fakatuʻutāmakí. ʻI he tuʻunga ko e faʻahinga ʻoku maʻu ʻa e fili tauʻatāiná, ʻoku fakaʻatā mai ai ʻe Sihova ha tuʻunga feʻunga ʻo e tauʻatāiná pea mo e fai ha meʻá. Ka ko e tauʻatāina ko iá ʻoku fiemaʻu ki ai ʻa e ongoʻi ʻoku ʻi ai ʻa e fatongia ʻi heʻetau fakahoko hotau ngaahi ngafa faka-Kalisitiané.
Ko e fakatātaá, ʻoku falala mai ʻa Sihova ki heʻene kau sevānití ke nau fakahoko totonu honau ngaahi fatongiá. ʻOku ʻikai te ne fokotuʻu mai ʻa e lahi ʻo e ivi mo e taimi ʻoku totonu ke tau fakamoleki ʻi he ngaahi ngāue faka-Kalisitiané pe ko e lahi ʻoku totonu ke tau tokoni fakapaʻanga ʻakí pe ʻi he ngaahi founga kehé. ʻI hono kehé, ko e lea ʻa Paula ki he kau Kolinitoó ʻoku ngāueʻaki ia kia kitautolu kotoa: “Ke taki taha fai ki he meʻa kuo ne tuʻutuʻuni ʻi hono loto.”—2 Kolinito 9:7; Hepelu 13:15, 16.
Ko e fatongia ʻo e foaki faka-Kalisitiané ʻoku kau ai ʻa hono vahevahe atu ʻo e ongoongo leleí ki he niʻihi kehé. ʻOku tau toe fakahaaʻi ai ʻoku tau alafalalaʻanga ʻi hono fai ha tokoni fakapaʻanga ki he ngāue ʻo e Puleʻangá ʻi māmani lahí. Ko Gerhardt, ko ha mātuʻa, ʻokú ne fakamatala ki heʻene fakalahi mo hono uaifí ʻo toe lahi ange ʻa ʻena tokoní hili ia ha ʻaʻahi ki ha ʻasemipilī ʻi ʻIulope Hahake. “Naʻá ma sio ki hotau fanga tokoua ʻi aí ʻoku fuʻu siʻisiʻi ʻaupito ʻa e meʻa ʻoku nau maʻú ʻi ha tuʻunga fakamatelie; ka neongo ia ʻoku nau fakahoungaʻi lahi ʻa ʻetau ngaahi tohi faka-Tohitapú,” ko ʻene fakamatalá ia, “ko ia naʻá ma fakapapauʻi ʻokú ma loto ke foaki ʻa e poupou lahi taha te ma malavá ki hotau fanga tokoua masiva ʻi he ngaahi fonua kehé.”
Fakatupulekina ʻEtau Kātakí
Ko e lue ʻi he fonua māʻolungá ʻoku fiemaʻu ki ai ʻa e ivi matuʻuekina. ʻOku fakamālohisino ʻa e kau fonongá ʻi heʻenau malava ke fai peheé, pea ko e tokolahi ʻoku nau fai ha kiʻi lue nounou ke teuteuʻi ai kinautolu ki he ngaahi fononga lōloá. ʻI he tuʻunga tatau, naʻe fokotuʻu mai ʻe Paula ke tau hanganaki femoʻuekina ʻi he ngaahi ngāue fakateokalatí koeʻuhi ke tauhi maʻu ai ʻetau moʻui lelei fakalaumālié. Ko e faʻahinga ʻoku nau fakaʻamu ke “aeva o tāu moe Eiki” pea ke “fakamalohi” kinautolú naʻe pehē ʻe Paula, ʻoku totonu ke nau “fua lahi i he gaue lelei kotoabe.”—Kolose 1:10, 11, PM.
ʻOku tokoni ʻa e fakaueʻilotó ki he kātaki ʻa e tokotaha fonongá. Anga-fēfē? Ko e hanganaki tokangataha ki ha taumuʻa hā maʻalaʻalá, hangē ko ha moʻunga ʻoku mamaʻo, ʻoku ʻi ai hono mālohi fakaueʻiloto. Pea ʻi he taimi ʻoku aʻu ai ʻa e tokotaha fonongá ki he ngaahi fakaʻilonga ʻoku tuʻu ʻi he vahaʻá, ʻoku malava ke ne fua mei ai ʻa ʻene hoko atu ki heʻene taumuʻa fakaʻosí. ʻI heʻene sio atu ki he mamaʻo kuó ne ʻosi fononga mai aí, ʻokú ne ongoʻi fiemālie.
ʻI he tuʻunga tatau, ko ʻetau ʻamanaki ki he moʻui taʻengatá ʻokú ne poupou mo fakaʻaiʻai kitautolu. (Loma 12:12) Lolotonga ia, ʻi heʻetau ʻaʻeva ʻi he ngaahi hala ʻo Sihová, ʻoku tau maʻu ʻa e lavameʻa ʻi hono fokotuʻu pea aʻusia leva ʻa e ngaahi taumuʻa faka-Kalisitiané. Pea ko ha fiefia ē ʻoku tau ongoʻí ʻi heʻetau hanga atu ki he ngaahi taʻu ʻo e ngāue faitōnungá pe vakai ki he ngaahi liliu kuo tau fai ʻi hotau angaʻitangatá!—Sāme 16:11.
Ke lavaʻi ha vahaʻa lōloa pea tolonga ʻa e iví, ʻoku ngaʻunu ʻa e kau lué ʻi ha foʻi vave pau. ʻI he tuʻunga tatau, ko ha founga-tuʻumaʻu lelei ʻoku kau maʻu pē ai ʻa e maʻu fakatahá mo e malaʻe ngāué te ne tauhi kitautolu ke tau hanganaki ngaʻunu tōtōivi atu ki heʻetau taumuʻá. Ko ia, naʻe fakalototoʻaʻi ʻe Paula ʻa e kaungā Kalisitiané: “Ke fou atu ai pe ʻi he hala pe ko ia.”—Filipai 3:16.
Ko e moʻoni, ʻoku ʻikai te tau lue tokotaha ʻi he ngaahi ʻalunga ʻo Sihová. “Ke tau fetokangaʻaki, ke fefakaʻaiʻaiʻaki ʻa kitautolu ki he feʻofaʻaki mo e ngaue lelei,” ko e tohi ia ʻa Paulá. (Hepelu 10:24) Ko e feohi fakalaumālie leleí te ne ʻai ke faingofua ange ai ke tauhi maʻu ʻa e vave ʻo e laká ʻi heʻetau ʻaʻeva fakataha atu mo e kau kaungātuí.—Palovepi 13:20.
Ko e fakaʻosí, pea ko e mahuʻinga tahá ia, kuo pau ke ʻoua ʻaupito naʻa ngalo ʻia kitautolu ʻa e mālohi ʻoku foaki ʻe Sihová. Ko e faʻahinga ʻa ia ko honau mālohí ʻoku ʻia Sihová te nau “alu i he malohi ki he malohi.” (Sāme 84:5, 7, PM) Neongo kuo pau ʻi ha ngaahi taimi ke tau fou ʻi ha konga fonua tokakovi, ʻi he tokoni ʻa Sihová ʻe malava ke tau fakahoko ia.