Fiefia ʻi he “Ikuna mo e Lamí”
ʻI HA tohi naʻá ne fai ʻi he 1971, naʻe lave ai ʻa Carey W. Barber ki hono ʻuluaki taʻu ʻe 50 ʻo e ngāue ki he ʻOtua moʻoní ʻo ne pehē: “Ko e ngaahi taʻu ko eni ʻi he ngāue ʻa Sihová kuo makehe atu ʻene leleí. Ko e feohi mo ʻene kakaí; ko e malu mei he kau faikovi ʻo e māmani ʻo Sētané; ko e ʻamanaki ʻo e ikuna mo e Lamí, ʻa Sīsū Kalaisi; pea mo e fakamoʻoni ʻo e ʻofa ʻa Sihová ʻoku nau kau fakataha ki hono ʻomai ʻa e melino fakafiefia mo e fiemālie ʻi loto ʻa ia ʻokú ne maluʻi ʻa e lotó mo ʻomai ʻa e ʻamanaki papau ʻo e ikuna fakaʻosí.”
ʻI he taʻu ʻe ono ki mui aí, ko Tokoua Barber, ko ha Kalisitiane pani ʻe he laumālié, naʻe kamata ke ngāue ko ha mēmipa ʻo e Kulupu Pule ʻo e Kau Fakamoʻoni ʻa Sihová. ʻI he ngāue ai ʻi he lolotonga ʻa e taʻu ʻe 30 hono hokó, naʻá ne hokohoko hanga atu ki he “ikuna mo e Lamí.” Naʻá ne aʻusia ia ʻaki hono fakamoʻoniʻi ʻene faitōnungá ʻo aʻu ki heʻene mate ʻi hono taʻu 101 ʻi he Sāpate, ʻEpeleli 8, 2007.—1 Kolinito 15:57.
Naʻe fāʻeleʻi ʻa Carey Barber ʻi ʻIngilani ʻi he 1905, pea naʻe papitaiso ʻi Winnipeg, Kānata, ʻi he 1921. Taʻu ʻe ua mei ai, ko ia mo hono tokoua māhangá, ko Norman, naʻá na hiki ki Brooklyn, Niu ʻIoke, ke tokoni ai ki ha foʻi ngāue foʻou. ʻI he taimi ko iá, naʻe teu ai ʻa e kakai ʻa Sihová ke kamata ngaohi ʻenau ngaahi tohi pē ʻa kinautolu ki hono fakamafola atu ʻa e ongoongo lelei ʻo e Puleʻangá “ki mamani katoa.” (Mātiu 24:14) Ko e taha ʻo e ngaahi muʻaki ngāue naʻe vaheʻi kia Tokoua Barber ko hono fakalele ha kiʻi fale pulusi tohi. Naʻe kau ʻi he ngaahi meʻa naʻe pulusí ʻa e ngaahi fakamatala nounou fakalao ki he ngaahi hopo fakalao naʻe ʻave ki he Fakamaauʻanga Lahi ʻAmeliká. ʻI he faai atu ʻa e taimí, naʻe ngāue ai ʻa Tokoua Barber ʻi he Potungāue Ngāué, ʻo tokangataha ki he ngaahi meʻa ʻa e fakatahaʻangá pea mo e ngāue fakamalanga takatakai ʻi he fonuá.
ʻI hono maʻu ʻa e puipuituʻa ko iá, naʻe taau ʻaupito ai ʻa Tokoua Barber ʻi he taimi naʻe vaheʻi ai ia ʻi he 1948 ke ne hoko ko ha faifekau fefonongaʻakí, ʻo ʻaʻahi ki he ngaahi ʻasemipilī mo e ngaahi fakatahaʻanga kotoa ʻi he tafaʻaki fakahihifo ʻo ʻAmeliká. Naʻá ne pehē naʻe tautefito ʻene fiefiá ʻi heʻene ʻi tuʻa ʻo maʻu ha ʻea foʻou ʻi he ngāue fakamalanga ki he kakaí. Naʻe hoko ʻa e ngāué ni ke fetuʻutaki lahi ai ʻa Tokoua Barber mo e fanga tokoua pea mo e fanga tuofāfine tokolahi. Ko ʻene ʻatamai māsilá mo ʻene faivelenga ʻi he ngāue fakafaifekaú naʻe fakamoʻoniʻi naʻe ʻaonga ʻaupito ia ʻi heʻene kau ki mui ki he kalasi hono 26 ʻo e Akoʻanga Tohi Tapu Taua Leʻo ko Kiliatí. ʻI he lolotonga ʻo e teemi akó, naʻá ne hoko ai ʻo maheni mo ha kaungāako mei Kānata, ko Sydney Lee Brewer. ʻI he hili ʻa e maʻu tohi fakamoʻoni akó naʻá na mali pea fai ʻena hanimuní ʻi heʻena kiʻi fononga nounou ke ngāue ki he ngaahi fakatahaʻanga ʻi he feituʻu ko Chicago, Illinois. Naʻe fakamoʻoniʻi ko Tuofefine Barber ko ha hoa ʻaonga mo ha matavai tuʻumaʻu ia ʻo e poupou ki hono husepānití he lolotonga ʻa e hongofuluʻi taʻu ʻe ua ʻo ʻena ngāue fakataha ʻi he ngāue fakafaifekau fefonongaʻakí.
Ko e faʻahinga naʻa nau feʻiloaki mo Tokoua Barber pea mo ʻiloʻi ia ʻi he lolotonga ʻo hono ngaahi hongofuluʻi taʻu ʻi he tuʻunga ko ha ʻovasia fakavahe pe fakasēketí pe ʻi he lolotonga ʻo e taʻu ʻe 30 naʻá ne ngāue mo fononga holo ai ʻi he tuʻunga ko ha mēmipa ʻo e Kulupu Pulé te nau manatua fuoloa ʻene ngaahi malangá mo ʻene ngaahi fakamatala longomoʻuí. ʻOku tau maʻu ʻa e makatuʻunga ke fiefia ai ʻi heʻene “ikuna mo e Lamí.”