Ko ha Fokotuʻutuʻu Mātuʻaki Mahuʻinga
ʻOKU ʻi ai ʻeku fokotuʻutuʻu mātuʻaki mahuʻinga. Tuku muʻa ke u fakamatala angé ki he meʻa naʻá ne tataki au, ko ha faʻē Sipeini kei talavou, ke u fai ai ʻa e fokotuʻutuʻu ko iá.
Naʻe ʻikai ke maʻu ʻa e melinó mo e feʻofoʻofaní ʻi he ʻapi ʻo ʻeku ongo mātuʻá. Naʻe ongoʻi lōmekina moʻoni homau fāmilí ʻi he taimi ne mate ai ʻa hoku kiʻi tuongaʻane taʻu faá ʻi ha fakatamaki fakamamahi. Ko e tahá, ko e ʻulungāanga kovi ʻa ʻeku tamaí naʻe faingataʻa ai hono maʻu ʻe heʻeku faʻeé ha fiefia lahi ʻi he nofo malí. Ka neongo iá, naʻe ʻikai ke hanga ʻe he faingataʻa ko iá ʻo taʻofi ʻa ʻeku faʻeé mei hono uhuʻi ʻa e ngaahi ʻulungāanga ʻoku mahuʻingá kiate au mo hoku tuongaʻane lahí.
ʻI he faai atu ʻa e taimí, naʻe mali leva hoku tuongaʻané pea pehē kiate au foki. Taimi siʻi mei ai, ne puke ʻeku faʻeé ʻi he kanisaá ʻone mate ai. Kae ki muʻa ke maté, naʻá ne tuku ha koloa maʻa kimaua.
Naʻe talanoa ange kiate ia ʻe ha taha ʻo hono ngaahi mahení, fekauʻaki mo e ʻamanaki Fakatohitapu ki he toetuʻú peá ne tali lelei ke kamata ha ako Tohi Tapu. ʻI he ofi ke ne maté, naʻá ne maʻu ha ʻamanaki mei he pōpoaki Fakatohitapu ko iá pea naʻe tokoniʻi ai ia ke ne maʻu ʻa e fiefiá.
ʻI heʻema vakai ki he ola lelei kiate ia ʻa e pōpoaki Fakatohitapú, naʻá ku kamata ako ai foki mo hoku tuongaʻané ki he Folofola ʻa e ʻOtuá. Naʻá ku papitaiso leva ko e taha ʻo e Kau Fakamoʻoni ʻa Sihová ʻi ha māhina ʻe taha ki muʻa ia pea fāʻeleʻi mai ʻeku tama fika uá, ko ha kiʻi taʻahine fakaʻofoʻofa ʻa ia naʻá ma fakahingoa ko Lucía.
Naʻe mahuʻinga ʻaupito kiate au ʻa e ʻaho ʻo ʻeku papitaisó. Ko e ʻuhinga ʻuluakí he kuó u tuku atu au maʻa Sihova, ʻi heʻeku fakatapui ke tauhi kiate ia ʻo taʻengata. Ko e ʻuhinga hono uá leva ke u vahevahe atu ʻeku tuí ki hoku fohá kaeʻumaʻā ʻeku tama ʻofeiná.
Ne vave hono fakahohaʻasi ʻa e ʻuhinga hono ua ʻo ʻeku fiefiá. ʻI he taʻu fā ʻo Lucía, naʻe kamata ke ne maʻu ha langa kete lahi ʻaupito. Hili hono fai ha ngaahi sivi, naʻe pehē ʻe he toketā faifakaʻatá ʻoku ʻi ai ha foʻi ngungu ʻi hono ʻaté hangē hono lahí ko ha foʻi molí. Naʻe fakamatala leva ʻa e toketaá ko Lucía ʻokú ne maʻu ha foʻi ngungu fakatupu kanisā ʻa ia ʻoku vave ʻene tupú. Naʻe kamata leva ʻa e fāinga ʻa Lucía mo e kanisaá ʻo aʻu ki ha taʻu ʻe fitu, ʻa ia naʻe kau ai e ngaahi taimi nofo falemahaki ʻi ha ngaahi ʻaho lahi.
Ko ha Laumālie Feilaulauʻi-Kita
Lolotonga ʻo e ngaahi taʻu faingataʻá ni, ne fakalototoʻaʻi maʻu pē au ʻe he ngaahi fāʻofua māfana mo e ngaahi ʻuma fakafiemālie naʻe fai mai ʻe Lucía. Naʻe maongo foki ki he kau ngāue ʻi he falemahakí ʻa e founga siʻene fekuki mo e mahakí. Naʻá ne vēkeveke maʻu pē ke ngāue mo e kau neesí, ʻo tokoni kia kinautolu ki hono tufaki ʻo e iōketí, inú, mo e ngaahi meʻa kehé ki he fānau ko ia naʻa nau tākoto he ngaahi loki ʻi he falemahakí. Naʻe aʻu pē ʻo ʻoange ʻe he kau neesí kia Lucía ha kiʻi kote hinehina pea mo hono pine ne pineʻi ʻo fakahaaʻi ai ia ko ha “neesi tokoni.”
“Naʻe malave ki hoku lotó ʻa Lucía,” ko e manatu ia ʻa ha fefine ngāue ʻi he falemahakí. “Ko e kiʻi taʻahine longomoʻui, poto ʻi he filioʻi, pea naʻe manako ki he tā valivalí. Naʻá ne maʻu ʻa e mahino pea matuʻotuʻa, ʻo mātuʻaki fakamatuʻotuʻa.”
Naʻe maʻu ʻe Lucía ʻa e mālohi mo e nonga mei he Folofola ʻa e ʻOtuá. (Hep. 4:12) Naʻá ne tuipau ʻi he māmani foʻoú, “ʻe ʻikai toe ai ha mate, pea ʻe ʻikai toe ai ha mamahi, pe ha tangi, pe ha ongosia,” hangē ko ia ʻoku talaʻofa mai ʻe he Folofola ʻa e ʻOtuá. (Fkh. 21:4) ʻI heʻene mahuʻingaʻia ʻi he niʻihi kehé, naʻá ne mateuteu ʻi he taimi kotoa pē ke vahevahe atu ʻa e pōpoaki Fakatohitapú. Naʻe tokoniʻi ʻa Lucía ʻe heʻene ʻamanaki papau ki he toetuʻú ke ne kei ʻūkuma ʻene ngaahi ongoʻí pea mata fiefia neongo e ʻikai ha toe ʻamanaki lelei ki hono puké. (Ai. 25:8) Naʻá ne tauhi maʻu ʻa e fakakaukau ko iá ʻo aʻu ki he ʻaho naʻe mate ai ʻi he kanisaá.
Ko e ʻaho ia naʻá ku fai ai ʻa e fokotuʻutuʻu mātuʻaki mahuʻingá ni. Naʻe ofi ke mate ʻa Lucía. Naʻá ma taki taha hono ongo nimá mo ʻene tamaí pea naʻá ku fanafana hifo leva, “Fiemālie, heʻikai te u liʻaki koe, mānava māmālie pē. ʻI hoʻo ʻā haké, te ke moʻui lelei ʻaupito. ʻE ʻikai te ke toe mamahiʻia, pea te u ʻi ai foki mo au.”
Ko ia ai, kuo pau ke u fai ki heʻeku fokotuʻutuʻu ko iá. ʻOku ou ʻiloʻi ko e taimi ʻo e tatali ki heʻene toetuʻú ʻoku ʻikai ke faingofua. Ka ʻoku ou ʻiloʻi foki kapau te u tatali anga-kātaki kia Sihova pea tauhi maʻu ʻeku anga-tonú kiate ia, te u ʻi ai ʻi he taimi ʻe toetuʻu mai ai ʻa Lucía.
Faʻifaʻitakiʻanga ʻa Lucía
Ko e faʻifaʻitakiʻanga ʻo e loto-toʻa ʻa Lucía, pehē ki he ngaahi tokoni maʻongoʻonga ʻa e fakatahaʻangá, naʻe maongo lahi ia ki hoku husepānití, ʻa ia naʻe ʻikai ke ʻi he tui tatau foki mo au. ʻI he ʻaho naʻe mate ai ʻa Lucía, naʻá ne tala mai kiate au ʻe toe fakakaukau lelei ange. Hili ha ngaahi uike mei ai, naʻá ne kole ki ha mātuʻa ʻi he fakatahaʻangá ke na ako Tohi Tapu. Fuoloa siʻi, ne kamata leva ke maʻu ʻe hoku husepānití ʻa e ngaahi fakatahá kotoa. ʻI he tokoni ʻa Sihová naʻe tuku leva ʻene ifi tapaká, ʻa e meʻa naʻe ʻikai te ne lava ʻo fai ki muʻá.
Kuo teʻeki ke māngalongalo atu e loto-mamahi ʻoku ʻiate au ʻi he mate ʻa Lucía, ka ʻoku ou fakamālō lahi kia Sihova ki he faʻifaʻitakiʻanga kuo tuku mai ʻe Lucía. ʻOku ou ongoʻi fiemālie pē mo hoku husepānití ʻi he ʻamanaki fakaofo ko ia ʻo e toetuʻú, ʻo ma faʻa ʻunaloto atu ki he taimi ko ia te ma toe sio ai kia Lucía—ʻene longomoʻuí, hono kiʻi mata fuopotopotó mo ʻene malimali kae malomi hono kiʻi kouʻahé.
Naʻe toe maongo ki he tokotaha ʻi homau feituʻú ʻa e meʻa fakamamahi naʻe hoko ki heʻeku tamá. ʻI ha pongipongi Tokonaki naʻe ʻuha, naʻe aʻu ange ai ki homa ʻapí ha fefine ʻa ia ko hono fohá naʻe ʻalu ki he ako tatau naʻe ako ai ʻa Lucía. Ne siʻi mate hono foha taʻu 11 ʻi he mahaki tatau pē. ʻI heʻene ʻiloʻi e meʻa naʻe hoko kia Lucía, ne kumi ange leva e fefiné ki homau ʻapí. Naʻá ne fieʻilo ki he anga ʻeku fekuki mo e mate ko ia ʻa Lucía ʻo ne fokotuʻu mai ke ma faʻu ha kulupu ke tokoniʻi ʻaki ʻa e ngaahi faʻē ʻoku nau ʻi he tuʻunga meimei tatau.
Naʻá ku fakamatala ange ʻoku fakatuʻunga ʻeku ongoʻi fiemālié ʻi he taha ʻo e ngaahi talaʻofa ʻa e Tohi Tapú, ʻa ia ʻoku māʻolunga ange ia ʻi ha toe meʻa ʻe lava ʻe ha tangata ʻo fakaʻali mai. Naʻe mata tokanga ʻa e fefiné ni ʻi he taimi naʻá ku lau atu ai ʻa e lea ʻa Sīsū naʻe tohi ʻi he Sione 5:28, 29. Naʻá ne tali ke fai ha ako Tohi Tapu pea vave leva ʻene kamata ke ongoʻi ʻa e “melino ʻa e ʻOtuá ʻa ia ʻoku māʻolunga ʻi he fakakaukau kotoa pē.” (Fili. 4:7, NW) ʻI he taimi ʻoku faʻa fai ai ʻema ako Tohi Tapú, ʻokú ma kiʻi mālōlō ka ma fakalaulauloto atu ki he taimi te ma ʻi he māmani foʻoú ai, ʻo talitali mai ʻa e faʻahinga naʻá ma ʻofa aí ʻi he toetuʻú.
ʻIo, kuo tuku mai ʻe he taimi nounou ʻo e moʻui ʻa Lucía ha faʻifaʻitakiʻanga lelei tuʻuloa. Naʻe fakafāʻūtahaʻi ʻe heʻene tuí homau fāmilí ʻi he tauhi ki he ʻOtuá, pea ʻokú ne toe langaʻi hake ai ʻeku fakapapau ke u kei tuʻu mālohi ai pē ʻi he tuí. Ko kitautolu kotoa kuo mole atu ha tau ngaahi ʻofaʻanga ʻa ia ʻe toe fokotuʻu mei he maté, ʻoku ʻi ai ha fokotuʻutuʻu mātuʻaki mahuʻinga ke tau fai ki ai.
[Fakatātā ʻi he peesi 20]
Palataisí ʻi hono tā fakatātā ʻe Lucía