Maʻu Tohi Fakamoʻoni Ako Hono 127 ʻi Kiliatí
Fekauʻi Atu ʻa e Kau Misinalé “ki he Ngataʻanga ʻo Māmani”
NAʻE fekauʻi ʻe Sīsū ʻa ʻene kau ākongá ke nau hoko ko e kau fakamoʻoni ʻo aʻu “ki he ngataʻanga ʻo māmani.” (Ngāue 1:8) ʻOku fakakaukau fakamātoato ʻa e Kau Fakamoʻoni ʻa Sihová ki he fekau ko iá.
Ko hono moʻoní, ʻi he taʻu ʻe 65 kuohilí, kuo tokoni ai ʻa e kau misinale kuo akoʻi ʻi he Akoʻanga Tohi Tapu Taua Leʻo ko Kiliatí ʻi he takimuʻa ʻi he ngāue fakamalanga ko ení ʻi he fonua ʻe 200 tupu. ʻI he Tokonaki ʻo Sepitema 12, 2009, naʻe maʻu tohi fakamoʻoni ako ai ha toe toko 56 ʻo e kau faifekau taukei hili ʻenau ako ʻi he māhina ʻe nima ʻi he akoʻanga misinale ʻoku tuʻu ʻi Patterson, Niu ʻIoke, ʻAmelika.
Mālohi ʻo e Fakakaukaulotó
Ko Stephen Lett, ko ha mēmipa ʻo e Kulupu Pule ʻo e Kau Fakamoʻoni ʻa Sihová mo e sea ʻo e polokalama maʻu tohi fakamoʻoni akó, naʻá ne malanga ki he kalasí ʻi he kaveinga “Ngāueʻaki Fakapotopoto Hoʻo Fakakaukaulotó.” Naʻá ne ʻuluaki fakatokanga ki he kau maʻu tohi fakamoʻoni akó fekauʻaki mo e founga ʻe fā ke ʻoua ʻe ngāueʻaki ai ʻenau fakakaukaulotó. Ko e ʻuluaki poini eni ʻe tolú: (1) ʻOua ʻe fakakaukauloto ʻe lava ke ʻomai ʻe he meʻa fakamatelié ha maluʻi tuʻuloa; (2) fakaʻehiʻehi mei he fakakaukauloto ki he ngaahi tōʻonga taʻetāú; mo e (3) fakaʻehiʻehi mei he hohaʻa tōtuʻa, ʻo fakakaukauloto atu ki ha kovi ʻe hoko nai ʻi he ʻapongipongí. (Palovepi 18:11; Mātiu 5:28; 6:34) ʻI he fekauʻaki mo e poini hono tolú, naʻe pehē ai ʻe he tokotaha-malangá ko ha tokotaha hohaʻa tōtuʻa ʻokú ne fakatahaʻi mai ʻa e loto-moʻua ʻaneafí ki he loto-moʻua ʻo e ʻaho ní pea toe kakapa atu ke toe ʻomai ʻa e loto-moʻua ʻapongipongí ki he ʻahó ni. “Ko ha kavenga mamafa ia ke fua,” ko e lau ia ʻa Tokoua Lett. Ko e hā ʻa e poini hono faá? Naʻe fakatokanga ki he kalasí ke ʻoua ʻe fakakaukauloto atu naʻe lelei ange ʻenau moʻuí ki muʻa ke nau kamata ʻi heʻenau vāhenga-ngāue fakamisinalé. Ko e fai peheé ʻe fakatupunga ai ke mole ʻenau fiefia te nau ala maʻu ʻi honau feituʻu foʻoú.
Naʻe fakalototoʻaʻi leva ʻe Tokoua Lett ʻa e kalasí ke nau ngāueʻaki ʻenau fakakaukaulotó ʻi he founga pau ʻe fā. Naʻá ne pehē: (1) Tomuʻa sio ki he ngaahi tuʻunga ʻa ia ʻe lava ke fakatuʻutāmaki fakalaumālie pe fakaesinó, pea kalofi ʻa e fakatamakí; (2) sioloto ki he ngaahi tuʻunga ʻokú ke lau ʻi he Tohi Tapú, pea fakakaukauloto atu ʻokú ke kau ʻi he meʻa ʻoku hokó; (3) fakakaukauloto atu ko e tokotaha taki taha ʻokú ke lea ki ai ʻi ho vāhenga-ngāue foʻoú ʻe malava ke hoko ko ha tokotaha lotu kia Sihova; mo e (4) fakatupulekina ʻa e kaungāongoʻi ʻaki ʻa e fakakaukauloto atu ʻokú ke ʻi he tuʻunga ʻo e faʻahinga ʻokú ke malanga ki aí.—Palovepi 22:3.
Mahuʻinga Hono Akoʻi ʻa e Niʻihi Kehé
Ko David Splane, ko ha mēmipa ʻo e Kulupu Pulé, naʻá ne fakahoko ʻa e kaveinga “Tuku Ia ki ha Kau Tangata Ala-Falalaʻanga,” makatuʻunga ʻi he 2 Timote 2:2. ʻI he taimi naʻe fakahinohinoʻi ai ʻe he ʻapositolo ko Paulá ʻa Tīmote ke ne akoʻi ʻa e kau tangata alafalalaʻangá, ko e taumuʻa ʻa Paulá ke ʻoua ʻe ngata pē ʻi hono akoʻi ʻe Tīmote ʻa e kau tangatá ni ke nau fakapapauʻi ʻa e moʻoní ka ke toe fakalototoʻaʻi kinautolu ke nau akoʻi ʻa e niʻihi kehé. Naʻe pehē ʻe he tokotaha-malangá ki he kalasí ʻoku ʻi ai ha fiemaʻu lahi ʻo ha kau tangata ke nau takimuʻa ʻi he ngaahi ngāue faka-Kalisitiané. Ko e taimi fē pea ʻe anga-fēfē hono akoʻi ʻa e faʻahinga ko ení? Naʻe fakalototoʻaʻi ʻe Tokoua Splane ʻa e kalasí ke nau kamata akoʻi ʻa e kau tangatá ni ʻi he ʻuluaki taimi pē ʻoku kamata ako Tohi Tapu ai mo kinautolu ʻa e kau misinalé.
ʻOku lava fēfē ke akoʻi papau ʻe he kau misinalé ʻa e kau ako Tohi Tapú ke nau hoko ko e faʻifaʻitakiʻanga alafalalaʻanga ki he niʻihi kehé? Naʻe fakahaaʻi ʻe he tokotaha-malangá ha ngaahi founga. ʻOku fiemaʻu ke akoʻi kinautolu ʻe he kau misinalé ke nau teuteu lelei ki heʻenau lēsoni ako Tohi Tapu fakafoʻituituí. Pea ʻi he kamata ke maʻu ʻe he kau akó ʻa e ngaahi fakataha ʻa e fakatahaʻangá, ʻoku fiemaʻu ke nau ako ʻa e founga ke teuteu ai ʻia kinautolu ʻa e fakamatala makatuʻunga he Tohi Tapú kuo lāulea ki ai ʻi he ngaahi fakatahá. “Kapau ʻoku ʻikai lava ha taha ʻo ako ʻiate ia pē ʻa e Tohi Tapú,” ko e fakaʻuhinga ia ʻa e tokotaha malangá, “heʻikai ʻaupito malava ke ne akoʻi ʻa e niʻihi kehé.” Naʻe toe pehē ʻe Tokoua Splane ʻe lava ke tokoniʻi ʻe he kau misinalé ʻa e faʻahinga foʻoú ke nau tauhi-taimi, ke nau tokoniʻi fakapaʻanga ʻa e ngāue fakamalangá, pea ke nau talangofua ki he faʻahinga ʻoku nau lolotonga takimuʻá. Naʻá ne pehē ko e founga lelei taha ke akoʻi ai ʻa e ngaahi lēsoni ko ení ko hono fokotuʻu ha faʻifaʻitakiʻanga lelei.
Monū ʻo e Hoko ko e Kau Fakamoʻoní
Ko Guy Pierce, ko ha mēmipa foki ia ʻe taha ʻo e Kulupu Pulé, naʻá ne malanga ʻi he kaveinga makatuʻunga ʻi he lea ʻa Sīsū ʻoku hiki ʻi he Ngāue 1:8, “Te Mou Hoko ko ʻEku Kau Fakamoʻoni.” Naʻá ne fakamanatu ki he kalasí ʻi he ʻuluaki senituli T.S., naʻe mole ai mei he puleʻanga ʻIsilelí ʻa e monū ʻo e hoko ko e kau fakamoʻoni kia Sihová. Naʻe ʻoange ʻa e monū ko iá ki ha puleʻanga naʻe tupu mei ai ʻa e fua ʻo e Puleʻangá. (Mātiu 21:43) Naʻe fakamoʻoniʻi ko e puleʻanga ko iá ʻa e fakatahaʻanga ʻo e kau Kalisitiane paní. Naʻe lave ʻa e tokotaha malangá ki he lea ʻa e ʻapositolo ko Pitá, ʻa ia naʻá ne pehē ko e “kakai maonioni” ʻo e kau Kalisitiane paní te nau “fakaha” ʻa e lelei lahi ʻo Sihová. (1 Pita 2:6-9, PM) Ko ia naʻe ʻikai pehē ʻe Sīsū ia ʻe hoko ʻa e kau Kalisitiané ko e kau fakamoʻoni pē kiate ia ʻo ʻikai te nau kei hoko ko e kau fakamoʻoni ʻa Sihova. He ko ē, ko Sīsuú ʻoku ui ia “ko e Fakamoʻoni Falalaʻanga.” (Fakahā 1:5; 3:14) Ko e Fakamoʻoni tuʻu-ki-muʻa ia ʻa Sihová pea ko e faʻifaʻitakiʻanga ke tau muimui ai.—1 Pita 2:21.
ʻI he ʻahó ni, ko e tala ange ia ʻe he tokotaha-malangá ki he kalasí, ko e lea ʻa Sīsū ʻi he Ngāue 1:8 kuo ʻi ai hono ʻuhinga lahi ange. Ko e hā hono ʻuhingá? Kuo fakahoko ai ha maka-maile mahuʻinga ʻi he kikité, hangē ko ia naʻe hiki ʻi he Fakahā 11:15! Kuo fokotuʻu ʻa e Puleʻanga faka-Mīsaia ʻo e ʻOtuá. ʻI he taimí ni, ʻi ha founga moʻoni, ʻoku fakahoko ai ʻa e ngāue fakamoʻoní ʻo aʻu “ki he ngataʻanga ʻo māmani.” (Ngāue 1:8) Naʻe fakamamafaʻi ʻe Tokoua Pierce ko e kau misinalé ʻoku nau faifakamoʻoni fekauʻaki mo Sihova mo hono Puleʻangá, ʻo ʻikai fekauʻaki mo kinautolu pe fekauʻaki mo ʻenau founga moʻui ki muʻá, anga fakafonuá pea mo honau fonuá. Naʻá ne fakaʻaiʻai ʻa e kalasí ke nau akoʻi ʻa e “tokolahi taha ʻe ala lavá ʻi he taimi ko ia ʻoku toé.”
Meʻa Mahuʻinga Kehe ʻo e Polokalamá
Ko Alex Reinmueller, ko ha tokotaha tokoni ki he Kōmiti Pulusí, naʻá ne malanga ʻi he kaveinga “ʻE ʻOatu ʻe Sihova kia Koe ʻa e Loto-Toʻa.” Naʻá ne pehē kapau ʻe falala ʻa e kau misinalé ki he mālohi ʻo Sihová, te Ne tokoniʻi kinautolu ke nau ʻiloʻi honau mālohingá, tali ʻa honau ngaahi vaivaiʻangá, fehangahangai mo ʻenau ilifiá, pea ʻoange ki he ʻOtuá ʻenau lelei tahá.
Ko e toko ua ʻo e kau faiako ʻi he Potungāue Ako Fakateokalatí, ko Sam Roberson mo William Samuelson, naʻá na toe malanga ki he kau akó. Naʻe malanga ʻa Tokoua Roberson ʻi he kaveinga “ʻOku Ou ʻIate Koe,” makatuʻunga ʻi he Aisea 41:10. Naʻá ne pehē ʻe maʻu ʻe he kau misinalé ʻa e fiefia lahi. ʻE toe ʻi ai foki mo ʻenau ngaahi palopalema. ʻE lava ke nau fekuki mo ia kapau te nau faʻifaʻitaki kia Tuʻi Tēvita, ʻa ia naʻá ne tangi ʻo ui ki heʻene Tamai ʻofá ʻi he lotu. (Sāme 34:4, 6, 17, 19) Ko e malanga ʻa Tokoua Samuelson naʻe fakamamafaʻi ai ʻa e fiemaʻu ke hokohoko atu hono fakatupulekina ʻa e malava fakaefakakaukaú. Ko e kau misinale ʻoku nau fai peheé ʻoku nau malava ai ke fakaʻehiʻehi mei he fakafeangai ʻi he founga ʻikai lelei ki he lea taʻeʻofa ʻoku fai maí pea ʻoku ʻikai te nau ʻita vave.—Palovepi 2:10, 11.
Ko Jim Mantz, ko ha tokotaha tokoni ki he Kōmiti Faitohí, naʻá ne fakaʻekeʻeke ha mēmipa ʻo e Kōmiti Vaʻa mei he Lepupilika ʻo Siōsiá, ko ha tokotaha mei Honitulasi, mo ha mēmipa ʻo ha Kōmiti Fakafonua mei he Lepupilika ʻo Tasikisitaní. Ko e fanga tokoua taukei ko ení naʻa nau ʻoange ki he kau misinalé ʻa e faleʻi ki he founga ke fakakaumeʻa ai ki he kakai ʻe malava ke nau hoko ʻo fakafepakí ʻaki ʻenau “ikuna ʻa e kovi ʻaki ʻa e lelei.” (Loma 12:21) Ko Mark Noumair, ko ha toe faiako ʻi he kalasí, naʻá ne fakahoko ha fetalanoaʻaki longomoʻui fekauʻaki mo e ngaahi hokosia ʻi he malangá naʻe maʻu ʻe he kau akó lolotonga ʻenau ako ʻi Kiliatí. Ko e kongá naʻe ʻi ai hono kaveinga fakatupu-fakakaukau “ʻIo, ʻE Lava Fēfē Ke U Tokoni?”
Naʻe fakaʻosi ʻe he seá ʻa e polokalamá ʻaki ʻene lave ki he lea mei he foʻi hiva foʻou “Sio Kiate Koe ʻi he Taimi ʻe Foʻou Ai ʻa e Meʻa Kotoa Pē.” Naʻe mavahe ʻa e toko 6,509 naʻe ʻi aí ʻoku nau fakapapauʻi ange ke nau faifakamoʻoni ai pē fekauʻaki mo Sihova mo hono ʻAló ʻo au “ki he ngataʻanga ʻo māmani.”
[Saati/Mape ʻi he peesi 31]
ʻŪ FIKA ʻO E KALASÍ
8 lahi ʻo e fonua naʻe fakafofongaʻí
56 kau akó
28 ngaahi hoa malí
33.6 ʻavalisi ʻo e taʻumotuʻá
18.3 ʻavalisi ʻo e taʻu talu mei he papitaisó
13.6 ʻavalisi ʻo e taʻu he ngāue fakafaifekau taimi-kakató
[Mape]
(Sio ki he tohi ki he fakamatala kakato)
Naʻe vaheʻi ʻa e kalasí ki he fonua ʻe 22 ʻoku fakahaaʻi ʻi laló
VĀHENGA-NGĀUE FAKAMISINALE
SAMAIKA
NIKALĀKUĀ
KOSITĀ LIKA
PANAMĀ
PELŪ
SILI
HAITI
KULASAO
KIANA
KŌTEVUĀ
POLIVIA
PALAKUEI
SĒPIA
ʻALIPĒNIA
LEP. TEMO. ʻO KONGO
MOLOTOVA
ʻIUKANITĀ
PULUNITĪ
TENISANIA
MOSEMIPĪKI
NEPOLO
KEMIPŌTIA
[Fakatātā ʻi he peesi 31]
Kalasi Maʻu Tohi Fakamoʻoni Ako Hono 127 ʻo e Akoʻanga Tohi Tapu Taua Leʻo ko Kiliatí
Ko e ngaahi ʻotú ʻoku fakafika ia mei muʻa ki mui, pea ko e ngaahi hingoá ʻoku fakahokohoko ia mei he toʻohemá ki he toʻomataʻú ʻi he ʻotu taki taha.
(1) Marshall, T.; Prudent, L.; Mashburn, A.; Rosenström, S.; Testa, A.; Takeyama, M.; Sisk, M.
(2) Grooms, K.; Miura, S.; Camacho, M.; Rozas, S.; Burch, M.; Meza, I.; Young, G.; Geraghty, S.
(3) Bonilla, C.; Knaller, D.; Parrales, R.; Hotti, S.; Takada, A.; Tournade, M.; Sopel, C.
(4) Miura, Y.; Parrales, K.; Prudent, K.; Colburn, S.; Willis, L.; Vääränen, A.; Sisk, B.; Takada, R.
(5) Grooms, J.; Vääränen, M.; Geraghty, B.; Stackhouse, R.; Wilson, A.; Bonell, E.; Camacho, D.; Meza, R.; Bonell, M.
(6) Takeyama, S.; Testa, G.; Colburn, T.; Mashburn, C.; Willis, W.; Tournade, L.; Burch, J.; Stackhouse, J.
(7) Wilson, J.; Young, J.; Marshall, E.; Rozas, M.; Knaller, J.; Hotti, N.; Rosenström, A.; Sopel, J.; Bonilla, O.