Sio ki he Huafá ʻi he Teleʻá

ST. MORITZ. ʻOku anga-maheni ʻaki ʻa e fanongo ki he hingoa ko iá? Mahalo pē, koeʻuhí ko ha feituʻu mālōlō ʻeveʻeva ʻiloa ia ʻi he Teleʻa Engadine ʻi Suisalani. Ka ko St. Moritz ko e taha pē ia ʻo e feituʻu kuó ne tohoakiʻi ʻa e kakaí ʻi he taʻu lahi ki he teleʻa fakaʻofoʻofa ko ení ʻa ia ʻoku tuʻu ʻi he uhouhonga ʻo e ngaahi ʻotu moʻunga tumuʻaki sinoú ʻi he tuliki fakatongahahake ʻo Suisalaní ofi ki he kauʻāfonua ʻo ʻĪtalí. Ko e tuʻuʻanga foki ia ʻo e Paʻake Fakafonua ʻo Suisalaní, ʻa ia ko e fakaʻofoʻofa fakanatula ʻo e feituʻú mo e ʻakau mo e fanga manu kehekehe lahí ʻoku fakahīkihikiʻi ai ʻa hotau Tokotaha-Fakatupu Maʻongoʻongá, ʻa Sihova. (Sāme 148:7-10) Ka ʻoku pehē pē mo e ngaahi toetoenga talatukufakaholo ʻi he vaeuaʻanga ʻo e senituli hono 17.

Ko ha fakaikiiki makehe ʻi he ngaahi fale lahi ʻi he teleʻa ko ení te ne puke nai hoʻo tokangá. ʻOku ʻikai tātātaha ke ʻiloʻi ʻa e huafa ʻo e ʻOtuá ʻoku tohi-tongi ʻi muʻa ʻi he falé, hangē ko e matapā lahi ʻi muʻá. ʻI he ngaahi senituli kuohilí, ko e meʻa tukufakaholo ia ke teuteuʻi ʻa e tafaʻaki ki tuʻa ʻo e ngaahi falé ʻaki ʻa e ngaahi tohi-tongi, pe ʻoku valiʻi ʻi ha funga meʻa, tongi ʻi ha sima, pe tā tongitongi ʻi ha maka. ʻI hení ʻe lava ke ke sio ai ʻi ha fakatātā ʻo ha fale ʻi he kolo ko Bever. Ko e liliu eni ʻo e tohi-tongí: “ʻI he taʻu 1715. Ko Sihová ko e kamataʻanga, pea ko Sihová ko e ngataʻanga. Ko e ngaahi meʻa kotoa pē ʻoku mei he ʻOtuá, pea ʻoku ʻikai ha meʻa ʻe taʻekau ai ia.” ʻIo, ko e fakaʻilonga motuʻá ʻoku fakakau tuʻo ua ai ʻa e huafa fakafoʻituitui ʻo e ʻOtuá.

ʻE lava ke ke sio ai ʻi ha toe tohi-tongi motuʻa ange ʻi he kolo ko Madulain. ʻOku pehē ʻi he fakaʻilongá ni: “Sāme 127. Ka ʻikai langa ʻe Sihova ʻa e falé, ko e ongosia ʻa e kau langá ko e kulanoa pē. Lucius Rumedius. ʻI he taʻu 1654.”

Ko e hā ʻoku ʻi ai ai ʻa e ngaahi fakaʻaliʻali fakahāhā pehē ʻo e huafa fakaʻotuá ʻi he teleʻa ko ení? ʻI he foki ki he kuonga ʻo e Fakalelei-Lotú, naʻe pulusi ai ʻa e Tohi Tapú ʻi he lea faka-Lomenisī, ko ha lea tefito faka-Latina ʻoku leaʻaki ʻi Engadine. Ko hono moʻoní, ko e ʻuluaki tohi ia naʻe liliu ki he lea ko iá. ʻI hono ueʻi ʻe he meʻa naʻa nau lau ʻi he Folofola ʻa e ʻOtuá, naʻe tohi-tongi ai ʻe he kakai tokolahi ʻo e feituʻú ʻi he tafaʻaki ki tuʻa ʻo honau ngaahi falé ʻo ʻikai ko honau hingoá pē kae toe pehē foki ki he ngaahi lea mei he Tohi Tapú naʻe kau ai ʻa e huafa fakafoʻituitui ʻo e ʻOtuá.

ʻIo, aʻu mai ki he ʻahó ni, ko e ngaahi tohi-tongi ko ení ʻoku kei fanongonongo atu ai ʻa e huafa ʻo Sihová mo fakahīkihikiʻi ia ʻi he ngaahi senituli hili hono muʻaki tohi ʻi he ngaahi falé. Ko e kau ʻaʻahí ʻo tatau pē mo e kakai ʻoku nofo ʻi he teleʻa ko ení ʻoku talitali lelei kinautolu ke nau ako lahi ange fekauʻaki mo e ʻOtua fakaofo ko Sihová, ʻaki ʻenau ʻaʻahi ki ha toe fale ʻe taha ʻa ia ʻoku hā ai hono huafá—ko e Fale Fakatahaʻanga ʻo e Kau Fakamoʻoni ʻa Sihová ʻi Bever.

[Picture Credit Line on page 7]