Fakatolonga Mai ʻa e Ngaahi Meʻa Mahuʻinga mei Hotau Kuohilí

KO E kakai ʻa Sihová ʻoku nau maʻu ha tofiʻa fakalaumālie fakakoloa ʻaupito. Ko e lēkooti fakatoʻoaloto ʻo e tofiʻa ko iá ʻe lava ke maʻu ia ʻo ʻikai ngata pē ʻi he ʻū tohí ka mei he ngaahi tā, ngaahi faitohi, ngaahi talanoa fakafoʻituitui, mo e ngaahi ngāue fakameaʻa ʻoku felāveʻi mo ʻetau lotú, ko ʻetau ngāue fakamalangá pea mo hotau hisitōliá. Ka ko e hā e ʻaonga ʻo hono fakatolonga mai ʻa e fakamatala peheé mo fakatotoloʻi ʻa hotau kuohilí? Sai, ko e ngaahi ʻuluʻi fāmili ʻi ʻIsileli ʻo e kuonga muʻá naʻe pau ke nau fakaʻilo ki honau ngaahi fohá ʻa e ngaahi lao mo e ngaahi ngāue fakaofo ʻa Sihová koeʻuhi ke nau lava ai ʻo “tuʻu ʻia Elohimi ʻenau falala.”—Saame 78:1-7.

Ko e fakatotolo ki he tauhiʻanga lēkōtí kuo fuoloa ʻene fakahoko ha ngafa ʻi hono fakahoko ʻa e taumuʻa ʻa Sihová. Hangē ko ení, ʻi he taimi naʻe feinga ai ʻa e kau fakafepakí ke taʻofi ʻa e ngāue ʻi he temipale ʻi Selusalemá, ko ha fakatotolo fakaʻofisiale ʻo e ngaahi lēkooti ʻi he ngaahi tauhiʻanga lēkooti ʻi he kolomuʻa Mītia ko ʻAkametá naʻe fakahaaʻi ai ha tohi naʻe tuku atu ʻe Tuʻi Kōlesi ʻo fakamafaiʻi ʻa e langa ko iá. (ʻĒsela 6:1-4, 12) Ko ia ai, naʻe toe langa ʻa e temipalé ʻi he fehoanaki mo e finangalo ʻo e ʻOtuá. Ko e ngaahi maʻuʻanga lēkōtí naʻe toe ngāueʻaki ia ʻe he tokotaha-tohi Kōsipeli ko Luké, ʻa ia naʻá ne “fakatotoloʻi ʻa e ngaahi meʻa kotoa pē mei he kamataʻangá ʻo tonu.”—Luke 1:1-4.

ʻOku mahuʻingaʻia ʻaupito ʻa e Kulupu Pulé ʻi hotau hisitōlia fakateokalatí. ʻI he fakamatala ki he fiemaʻu ke fakatolonga, tauhi pea tuku atu hotau tofiʻa fakalaumālié, naʻe pehē ʻe he mēmipa ʻe taha ʻo e Kulupu Pulé, “Ke ʻiloʻi ʻa e feituʻu ʻoku tau ʻalu ki aí, kuo pau ke tau ʻiloʻi ʻa e feituʻu kuo tau haʻu mei aí.” Ki he taumuʻa ko iá, kuo fokotuʻu ki muí ni ha Potungāue Tauhiʻanga Lēkooti ʻi he ʻuluʻi ʻapitanga ʻi māmaní ʻi Brooklyn, Niu ʻIoke, pea ʻoku ʻi he malumalu ʻo e tataki ʻa e Kōmiti Faitohí.

KO ʻETAU “NGAAHI TĀ ʻO E FANGA TOKOUÁ” MO E “NGAAHI MEʻA TUKUFAKAHOLO”

ʻI he ʻalu ʻa e taimí, ʻoku mole atu ai ʻa e kuohilí, pea ko e tokolahi taha ʻo kitautolú ngalingali ʻoku tau fakaʻamu naʻa tau tauhi ha lēkooti fakafāmili fakafoʻituitui kakato ange. ʻI he Potungāue Tauhiʻanga Lēkōtí, ʻoku lolotonga fakahoko ai ha ngāue tōtōivi ke fakatolonga ʻo tauhi hotau tofiʻa fakakoloa mo tupulakí. Ko e ngaahi tā kuo tauhi fakalelei ʻi he Tauhiʻanga Lēkōtí ʻe lava ke vakai ki ai ko ha konga ia ʻo ʻetau “ngaahi tā ʻo e fanga tokouá.” Ko ʻetau ʻū tohi ki muʻá, ngaahi talanoa fakalotofiefia fakafoʻituituí, mo e ngaahi meʻa ʻoku tauhi fakamanatu mahuʻingá ʻoku toe kau ia ʻi he ngaahi meʻa mahuʻinga ʻoku tuku ʻi he Tauhiʻanga Lēkōtí. Ko e ngaahi meʻa hangē ko e “ngaahi meʻa tukufakaholo” ʻoku fakamaama ai kitautolu fekauʻaki mo hotau tofiʻa fakateokalatí pea tokoniʻi kitautolu ke tau fakatuʻotuʻa atu fakataha mo e tuipau ki he kahaʻu ʻo hotau fāmili fakalaumālié.

ʻOku mau fakaafeʻi atu ke mou kumi ki he Potungāue Tauhiʻanga Lēkōtí fakafou ʻi he tafaʻaki foʻou “Fakamatala Mahuʻinga Fekauʻaki mo Hotau Kuohilí.” ʻE hā ia ʻi he taimi ki he taimi ʻi he pulusinga ako ʻo e Taua Leʻo. Ko e fakatātaá, ʻi ha ʻīsiu ka hoko mai, ʻoku mau palani ke pulusi ai ha fakatātā kuo fakataumuʻa ke tali ai ʻa e ngaahi fehuʻi ko ení: Ko e hā ha Kato ʻAveʻanga Tohi Fakavaʻe? Naʻe ngāueʻaki ia ʻe hai? Naʻe ngāueʻaki ia ʻanefē, pea ki he taumuʻa ko e hā?

ʻI he hangē ha ngaahi tā fakamanatu ʻo e fanga tokouá, ko e tānekina Tauhiʻanga Lēkōtí ʻoku tala mai ai ʻa e meʻa lahi fekauʻaki mo kitautolu mo ʻetau fanga kui fakalaumālié—fekauʻaki mo e tui mo e loto-toʻa ʻa e faʻahinga kuo nau mole atu ki muʻa ʻia kitautolú, fekauʻaki mo e fiefia mo e ngaahi pole ʻo e tauhi ki heʻetau Tamai ʻofa fakahēvaní, pea fekauʻaki mo e tataki ʻa e ʻOtuá mo e poupou taʻemamotu ʻa hono kakaí. (Teu. 33:27) ʻOku mau tuipau ʻe tāpuakiʻi ʻe Sihova ʻa e ngaahi feinga hokohoko ke fakatolonga ʻa hotau hisitōlia fakalaumālié koeʻuhi ke tau fāʻūtaha ai pē pea fakaivimālohi ke fakahoko ʻa hono finangaló.

[Puha/Fakatātā ʻi he peesi 31]

Ko ha Vakai Ofi Ange

Lolotonga ʻa e teuteu ʻo e ʻū tohi faka-Kalisitiané, ngaahi DVD, mo e ʻū fakamatala kehe makatuʻunga he Tohi Tapú, ko ʻetau kau hiki tohí, kau ʻātí, kau fakatotoló, mo e niʻihi kehé ʻoku nau ngāueʻaki ʻa e ngaahi koloa ʻi he maʻuʻanga lēkōtí. Ko ia ai, ko e Potungāue Tauhiʻanga Lēkōtí ʻoku nau tokanga lahi pea fou ʻi ha ngaahi sitepu ʻaonga ke fakatahatahaʻi ʻo fakatolonga ha ngaahi fakamatala fakahisitōlia lahi mei he ngaahi maʻuʻanga fakamatala hangē ko e ngaahi ʻōfisi vaʻá, ngaahi potungāue ʻi Pētelí, ngaahi fakatahaʻangá, faʻahinga tāutaha, mo e ngaahi kautaha fakamāmaní. Vakai angé ki he fakamatala fakanounou ko eni ʻo e ngāué:

Tānaki Mai mo ʻAnalaiso: ʻOku hokohoko atu ʻa hono tānaki mai ʻa e ngaahi meʻa makehe ki he tānekina Tauhiʻanga Lēkōtí. Ko e lahi ʻo e ngaahi meʻá ni ʻoku foaki anga-ʻofa ia pe ʻoange ʻe he faʻahinga tāutaha ʻa ia ko honau ngaahi fāmilí kuo ʻi ai honau lēkooti ʻo e faitōnunga ʻi he ngāue he ngaahi hongofuluʻi taʻu kia Sihová. ʻI hono ʻanalaiso mo fakahoa ʻa e fakamatala peheé ʻoku tokoni ia ke fakalahi ai ʻetau mahinoʻi ʻa hotau hisitōliá mo e faʻahinga ko ia naʻa nau moʻui mai aí.

ʻAi ʻo ha Katiloka: Ko e tānekina ʻi he Potungāue Tauhiʻanga Lēkōtí ʻoku faʻuʻaki ia ʻa e ngaahi meʻa ʻe laui afe, ko e niʻihi ai ʻoku laka hake ʻi ha senituli ʻa honau motuʻá. ʻOku nau ʻi he fōtunga, lahi, mo e faʻunga kehekehe pea kuo pau ke ʻai fakalelei ia ʻi ha katiloka ke ngāueʻaki ʻi he kahaʻú.

Fakaleleiʻi mo Fakatolonga: Ko e ʻū tohi mo e ngaahi ngāue fakameaʻa maumaungofuá ʻoku monomono ia pea fakatolonga ʻo ngāueʻaki ʻa e ngaahi founga fakalelei fakapalōfesinale. Ko e ngaahi fakamatala, ngaahi tā, ngaahi ongoongo, ngaahi filimi, mo e ngaahi hikí ʻoku ʻai ki he komipiutá. ʻOku lava ai ke lau fakaʻilekitulōnika ke fakaʻehiʻehi ai mei he ala ki he ngaahi muʻaki fakamatalá pe ko e ngaahi meʻa kehe ʻoku mahuʻinga fakahisitōliá.

Tauhi mo Toe Maʻu Mai: Ko e ngaahi fakamatala ʻi he tauhiʻanga lēkōtí ʻoku tauhi ia ʻi ha founga maau mo malu ke taʻofi ai ʻa ʻenau molé pea ke maluʻi ia mei he maumau mei he māmá mo e hauhaú. ʻOku faʻu ha maʻuʻanga fakamatala fakakomipiuta ko ha tokoni ʻi he fakatotoló pea toe maʻu mai ai ʻa e ngaahi meʻa mahuʻinga ko eni mei hotau kuohilí.

[Fakatātā ʻi he peesi 32]

1. Fakatātā ki he “Tulama-ʻAta ʻo e Fakatupú.” 2. Lēsisita ʻo e tukuhaú. 3. Kā mo e meʻa fakaongo leʻo-lahi. 4. Takafi ʻo e Watch Tower ʻo ʻEpeleli 15, 1912. 5. Fanongonongo e tuku pilīsone ʻo J. F. Rutherford. 6. Maika ʻa e WBBR. 7.Kalamafoni. 8. Faʻoʻanga tohi. 9. Nouti fakafoʻituitui. 10.Mākoni kia J. F. Rutherford.