Tokoniʻi ʻa e Kaungātui Kuo Veté—Anga-Fēfē?

Ko ha fefine ʻokú ne fakafiemālieʻi ha tuofefine Kalisitiane kuo vete mali

Mahalo ʻokú ke ʻiloʻi ha taha kuo vete. ʻOku hoko iá koeʻuhí ko e veté ʻoku hokolahia ʻaupito. ʻI he taimi ʻoku vete ai ʻa e kakaí, kuo pau ke nau fekuki mo e ngaahi ongoʻi mamahi. Te nau ongoʻi ʻita, fakaʻiseʻisa, siva ʻa e ʻamanakí mo mā nai. Naʻe pehē ʻe ha tokoua ʻe taha: “ʻI he taimi naʻá ma vete aí, naʻe taʻofi au ʻe hoku uaifi ki muʻá mei he sio ki heʻeku ongo kiʻi tamaiki fefiné. Naʻe ʻai ai ke u ongoʻi ʻoku ʻikai toe tokanga mai ha taha kiate au pea naʻa mo Sihova kuo pau pē kuó ne liʻaki au. Naʻe honge ifo ʻa e moʻuí. ʻI he faai atu e taimí, naʻá ku toki ʻiloʻi ʻa e hala ʻa ʻeku fakakaukaú.”

Hili ha vete, ʻoku toe ongoʻi nai ʻe he niʻihi ko e fanga tokoua mo e fanga tuofāfine ʻi he fakatahaʻangá ʻoku ʻikai ke nau toe tokanga ange kia kinautolu pe mahinoʻi ʻenau ngaahi ongoʻí. ʻOku nau fakakaukau nai ko e niʻihi kehé ʻoku nau fakamāuʻi pe fakaʻehiʻehi meia kinautolu. Ka ki mui ange, ʻi he feʻunuʻaki ʻa e faʻahinga veté ki honau ngaahi tuʻungá, te nau ongoʻi nai ko e niʻihi kehé ʻoku nau fakahāhā moʻoni ʻa e ʻofa lahi mo mahinoʻi kinautolu.

ONGOʻI TAʻELATA MO E LIʻEKINA

Neongo te tau fai nai hotau lelei tahá ke tokoni ki ha tokoua pe tuofefine kuo vete, te ne kei ongoʻi taʻelata pē nai mo liʻekina ʻi he taimi ʻe niʻihi. ʻOku pehē ʻe ha tuofefine naʻa mo e hili atu e taʻu ʻe valu ʻene veté, ʻokú ne kei ongoʻi pē he taimi ʻe niʻihi ʻoku ʻikai ʻofaʻi ia mo kei ongoʻi mamahi pē. ʻI he ngaahi taimi peheé, ʻokú ne loto pē ke nofo toko taha ʻo tangi.

ʻOku mahuʻinga ki he faʻahinga kuo veté ke ʻoua te nau tōʻongaʻaki hono fakamavaheʻi kinautolu. (Pal. 18:1) ʻI he taimi tatau, ʻoku fiemaʻu ke nau tokanga ke ʻoua ʻe tōʻongaʻaki ʻa e kumi fakafiemālie mei ha fefine pe tangata. ʻI hono fai ení ʻe taki atu ki ha ngaahi ongoʻi fakaemanako taʻetotonu.

ʻI he taimi ʻoku ongoʻi taʻelata, liʻekina, mo loto-hohaʻa ai ki he kahaʻú ʻa hotau fanga tokoua mo e fanga tuofāfine kuo veté, ʻoku tau loto ke feinga ke mahinoʻi ʻenau ngaahi ongoʻí pea fai ʻa e meʻa te tau lavá ke tokoniʻi kinautolu, ʻi he faʻifaʻitaki kia Sihová. (Saame 55:22; 1 Pita 5:6, 7) ʻE lava ke tau fakapapauʻi te nau houngaʻia ʻi he tokoni ʻoku tau ʻoatu kiate kinautolu ʻi he tuʻunga ko ha ngaahi kaumeʻa moʻoni.—Pal. 17:17; 18:24.

KO E HĀ ʻE LAVA KE KE FAI KE TOKONÍ?

ʻE lava ke ke hoko ko ha matavai ʻo e poupou ʻoku mātuʻaki fiemaʻú? Ko e hā ʻe lava ke ke fai ke tokoni ki ha tokotaha kuó ne ongoʻi hangē ko e faʻahinga naʻe toki lave ki ai ʻi he kupu ko ení? Fakakaukau ki he meʻa ʻoku leaʻaki ʻe he Tohi Tapú, pea fakatokangaʻi ʻa e founga kuo fai ai ʻe he kau Kalisitiane mateakí ʻa e tokoni ʻaongá.

Hoko ko ha tokotaha fanongo lelei. (Pal. 16:20, 23)

Hili ha vete, ʻe loto nai ʻa e niʻihi ke talanoa fekauʻaki mo e meʻa naʻe hokó, pea ʻikai loto nai ʻa e niʻihi. Ko ia ʻai ke mahino ʻokú ke tokanga fekauʻaki mo ʻenau ngaahi ongoʻí pea loto-lelei ke fanongo ka ʻoku ʻikai te ke loto ke fieʻilo. Te nau ongoʻi ʻita ʻaupito nai ʻi he taimi te nau talanoa aí ʻo nau leaʻaki ha meʻa ʻa ia te nau fakaʻiseʻisa ai ʻamui ange. Fakapapauʻi kiate kinautolu ʻokú ke ʻiloʻi ʻoku nau ʻi ha tuʻunga faingataʻa pea ʻokú ke mateuteu ke tokoni.—Pal. 12:25; Loma 12:15.

Fakahāhā ʻa e mahuʻingaʻia. (Fil. 2:4)

Kumi ki ha ngaahi founga ʻaonga ʻe lava ke ke tokoni ai. ʻI ha vahaʻa taimi, ko ho tokoua pe tuofefine kuo veté te ne fiemaʻu nai ha tokoni naʻa mo e fanga kiʻi meʻa īkí. Mahalo ʻe lava ke ke tala ange ke ʻave ia ki ha ʻapoinimeni pe fai ha monomono ʻi hono ʻapí. Ko e ngaahi meʻa te ke fai ki he faʻahinga peheé ʻe lava ke tokoniʻi ai kinautolu ke fekuki lavameʻa mo honau tuʻunga kuo liliú.

Fakapapauʻi ki he tokotaha kuo veté ʻoku mahinoʻi ʻe Sihova ʻa e tuʻungá.

Fakapapauʻi kiate ia naʻa mo ʻene ngaahi ongoʻi taʻeʻaongá, ʻokú ne mahuʻinga ʻi he vakai mai ʻa Sihová. Ko e sevāniti taki taha ʻa Sihová ʻoku makehe mo ‘mahuʻinga ange ʻi ha fanga misi tokolahi.’ (Māt. 10:29-31) “Ko e sivi loto ko Sihova ia” pea ʻoku malava ke ne mahinoʻi ʻa e faʻahinga kuo nau veté. Heʻikai te ne liʻaki ha taha ʻo ʻene kau sevāniti faitōnungá. (Pal. 17:3; Saame 145:18; Hep. 13:5) Ko ia toe fakapapauʻi ki he tokotahá ʻoku fakamahuʻingaʻi ʻe he ʻOtuá ʻene ʻofa ki he moʻoní mo ʻene ngaahi feinga ke tauhi kiate Iá.—Fil. 2:29.

Fakalototoʻaʻi ʻa e tokotaha kuo veté ke nofo ofi ki he fakatahaʻangá.

ʻE faingataʻa nai ki he niʻihi ke ʻi he ngaahi fakatahá. Ka ko e ʻi he ngaahi fakatahá te nau maʻu ai ʻa e mālohi mo e loto-toʻa ʻoku fiemaʻú ke kātekina ai ʻa e taimi faingataʻa ko ení. Ko ʻetau ngaahi fakatahá ʻoku “fakatupu langa hake.”—1 Kol. 14:26; Saame 122:1.

Fakalototoʻaʻi ʻa e taha kuo veté ke fakaivimālohiʻi hono vahaʻangatae mo e ʻOtuá fakafou ʻi he lotu, ako fakafoʻituitui mo e fakalaulauloto. (Sēm. 4:8)

Neongo ʻoku māfimafi-aoniu ʻa Sihova pea ʻafio ʻi hēvani, ʻokú ne talaʻofa ke foaki mai ʻa e mālohi kia “kinautolu ʻoku ongoʻi masiva, pea ʻoku loto mafesi.” Fakamanatu ki he taha kuo veté ko kitautolu kotoa te tau maʻu ʻaonga ʻi he taimi ʻoku tau ʻunuʻunu ofi ai ki he ʻOtuá fakafou ʻi he lotu mo e ako fakafoʻituitui.—ʻAi. 66:2.

Tala ange ke mo ngāue fakataha ʻi he ngāue fakafaifekaú pe teuteu fakataha ki ha fakataha.

ʻE tokoni eni ki he Kalisitiane kuo veté ke ongoʻi loto-maʻu ange lolotonga ʻene hokohoko atu ʻi he moʻuí. ʻOku pehē ʻe ha tuofefine ʻe taha kuó ne fakalototoʻaʻi hano kaungāmeʻa naʻe vete: “ʻOkú ma kau fakataha maʻu pē ʻi he ngāue fakafaifekaú. ʻOku ʻai ai ke ma fiefia ʻi heʻema sio kuó ma aʻusia ʻa e ngaahi taumuʻa naʻá ma fokotuʻú. ʻOkú ma ako fakataha ʻi he taimi ʻe niʻihi ʻi he teuteu ki ha fakataha, peá ma ngaohi leva ha meʻakai ifo ke ma kai.”