Ko Hono Ngāue-ola-lelei ʻaki ʻa e Polosiua Foʻoú
1 ʻI heʻetau fakataha fakavahe naʻe toki ʻosí, naʻa tau mātuʻaki fiefia ai ke maʻu ʻa e polosiua foʻou ko e ʻI he Mate ha Taha ʻOkú Ke ʻOfa Ai. ʻE fakamānako ia ki he kakai ʻi he ngaahi ʻalunga kotoa pē ʻo e moʻuí, koeʻuhi he kuo tokolahi fau ʻa e faʻahinga kuo nau loto-mamahi ʻi he mole atu ʻa ha taha naʻa nau ʻofa ai. Ko hono ngaahi tā mo e ngaahi fakatātā fakatupu tokangá te ne fakafaingofuaʻi ʻa hono tuku atu iá. Ko e fakatātā fakatoʻoaloto ʻi he peesi 29 ʻo fekauʻaki mo hono fokotuʻu ʻo Lasalosi mei he maté ʻoku fakahaaʻi ai ko Sīsuú ʻokú ne “holi mālohi ke toʻo atu ʻa e fakaʻauha ʻa e maté.” ʻOku fakahaaʻi ʻe he fakatātā ʻi he peesi kakato hono hokó ʻa e meʻa fakafiefia ko e toetuʻu ʻi he māmani foʻou. Ko ha fakafiemālie lahi ē ʻoku totonu ke fai ʻe he meʻá ni ki he loto ʻo e faʻahinga ʻoku nau loto-mamahí!
2 ʻE lava ke hoko ʻa e polosiuá ni ko ha tokoni maʻongoʻonga ia ʻi hono fakafiemālieʻi ʻa e faʻahinga ʻoku loto-mamahí. ʻOku fakataumuʻa ia ki he fetalanoaʻaki. Ko e ngaahi fehuʻi ke ne fakahaaʻi ʻa e ngaahi meʻa mahuʻingá ʻoku ʻi ha kiʻi puha ʻi he ngataʻanga ʻo e konga taki taha ka ʻoku ʻikai ʻi lalo ʻi he peesi taki taha. ʻE lava ke ke ngāueʻaki ʻa e ngaahi “Fehuʻi ke Fakalaulaulotoʻi” ko ení ʻi ha founga pē ʻokú ke fakakaukau ʻe tokoni lahi taha ki hoʻo tokotaha akó.
3 ʻI hono fai ha ngaahi toe ʻaʻahi, filifili ʻa e ngaahi poini fakatupu fetalanoaʻaki ʻoku hā ʻi he polosiuá. Te ke fakakaukau nai ʻe feʻungamālie ke fakahāhā ʻa e tēpile ʻo e ngaahi meʻa ʻoku ʻi lotó ʻi he peesi 2 pea kole ki he tokotaha ʻapí ke ne fakahā mai ʻa e meʻa ʻokú ne mahuʻingaʻia aí. Ongongofua ki he ngaahi fiemaʻu ʻa e tokotaha taki taha. Tuku kiate ia ke ne tala mai ʻa ʻene ngaahi ongoʻí, pea hili iá pea fakahāhā ʻa e founga ʻo hono ʻoatu ʻe he polosiuá ʻa e fakafiemālié. ʻOku lahi ʻaupito ʻa e ngaahi konga Tohi Tapu ke ngāueʻaki ʻi he konga taki taha ʻa ia ʻokú ne tokonaki mai ai ʻa e makatuʻunga ki heʻetau ʻamanakí.
4 Ko e kaveinga tokoni ʻi he peesi 5, “ʻOku ʻI Ai ha ʻAmanaki Moʻoni,” ʻokú ne fakaeʻa mai ʻa e ʻamanaki fakafiemālie makatuʻunga ʻi he Tohi Tapú ki he kau maté. ʻOku totonu ke langaʻi ʻe he meʻá ni ʻa e loto-vēkeveke ke fai ha fetalanoaʻaki ʻi he “Ko ha ʻAmanaki Papau ki he Kau Maté,” ʻoku hā ʻi he peesi 26-31. Ko e kiʻi puha ʻi he peesi 27 ʻokú ne toe fakamatala ki he “ʻŪ Konga Tohi Tapu ʻOku Nau ʻOmai ʻa e Fiemālie.” ʻE vave ʻa hono fakatokangaʻi ʻe he tokotaha ʻapi ʻoku loto-mamahí ko e moʻoni ko Sihová ko e “Otua oe fiemalie kotoabe.”—2 Kol. 1:3-7, PM.
5 ʻI ha founga fakapotopoto, ʻoku kātoi ai ʻe he ngaahi konga fekauʻaki ko ení ʻa e ngaahi angafai kehekehe ʻoku hoko ʻi he mate ʻa ha tokotaha ʻofeina. ʻOku fakahaaʻi ʻe he ngaahi kupú ni ʻa e founga ke fekuki ai mo e loto-mamahí pea mo e founga ʻoku malava ke tokoni ai ʻa e niʻihi kehé ʻi he ngaahi taimi fakamamahi peheé. ʻOku ʻi ai ha kiʻi puha ʻi he peesi 25 ʻoku fakakaveinga “Tokoniʻi ʻa e Fānaú ke Fekuki mo e Maté.” ʻE hoko eni ko ha tokoni moʻoni ki he ngaahi mātuʻa ʻa ia kuo nau fekuki mo e palopalemá ni.
6 ʻAi ke ala maʻu maʻu pē ha tatau, pea ngāueʻaki ia ki he faifakamoʻoni ʻikai ʻi he founga mahení. Te ke lea ʻi ha founga fakapotopoto ki he faʻahinga ʻoku nau loto-mamahí ʻi heʻenau foki ke ʻaʻahi ki he faʻitoka ʻo ha taha naʻa nau ʻofa ai.
7 ʻOku tau fiefia he ko Sihova ko e ʻOtuá “oku ne fakafiemalieʻi akinautolu kuo li ki lalo.” (2 Kol. 7:6, PM) ʻOku tau lau ko hotau monū ia ke kau ʻi hono ‘fakafiemālieʻi ʻa e faʻahinga ko eni ʻoku loto-mamahí.’—ʻAi. 61:2.