Fakahīkihikiʻi Maʻu Pē ʻa Sihova
1 ʻOku siʻisiʻi pē ʻa e ngaahi ngāue ʻoku mātuʻaki mahuʻinga ʻo taau maʻu pē ai ke tau tokanga kiate kinautolu. ʻOku tau fakakau atu ki ai ʻa e kaí, mānavá, pea mo e mohé. Ke fakatolonga hotau sinó ʻoku fiemaʻu ki ai ʻa e ngaahi meʻá ni. Naʻe fakafaʻahinga meimei tatau mo ia ʻe he ʻaposetolo ko Paulá ʻa hono malangaʻi ʻo e ongoongo leleí ʻi heʻene naʻinaʻi mai: “Ko ia ke tau ʻatu ʻiate ia pe, maʻu ai pe, ha feilaulau fakafetaʻi ki he ʻOtua.” (Hep. 13:15, fakaʻītali ʻamautolu.) Ko ia ai, ko hono fakahīkihikiʻi ʻo Sihová ʻoku toe fiemaʻu ki ai ʻa e hokohoko atu ʻo ʻetau tokangá. Ko e meʻa ia ʻoku totonu ke tau feinga ke fai ʻi he ʻaho taki taha, ko hono fakahīkihikiʻi maʻu pē ʻa ʻetau Tamai fakahēvaní.
2 Naʻe tali ʻa Sīsū, ʻi he taimi naʻe feinga ai ʻa e niʻihi kehé ke leʻei ʻa ʻene tokangá ki ha feituʻu kehé: “Kuo pau ke u ʻave ʻa e ongoongolelei ki he ngaahi kolo kehe foki, ʻo tala ʻa e Puleʻanga ʻo e ʻOtua.” (Luke 4:43) ʻI he lolotonga ʻo ʻene ngāue fakafaifekau ʻi he taʻu ʻe tolu mo e kongá, ko e meʻa kotoa pē naʻá ne faí ʻi he ʻaho taki taha naʻe fekauʻaki fakahangatonu ia ʻi ha ngaahi founga mo hono fakalāngilangiʻi ʻo e ʻOtuá. ʻOku tau ʻilo naʻe ongoʻi pehē ni ʻa Paula, ʻi he vakai atu ki he fakakaukau ko ia naʻá ne fakamatalaʻi ʻi he 1 Kolinitō 9:16: “Hoto ʻoiaue, ʻo kapau ʻe ʻikai te u malangaʻaki ʻa e Kosipeli!” Naʻe fakalototoʻaʻi ʻa e kau Kalisitiane anga-tonu kehé ke nau hoko ʻo mateuteu maʻu pē ke fai hano fakamatalaʻi ʻo ʻenau ʻamanakí ki he niʻihi kehé. (1 Pita 3:15) ʻI he ʻahó ni ʻoku laui kilu ʻa e kau tāimuʻa faivelenga pea laui miliona ʻa e kau malanga ʻi he fakatahaʻangá ʻoku nau feinga ke faʻifaʻitaki ki he ngaahi faʻifaʻitakiʻanga lelei peheé.
3 ʻI he taimi ʻoku tau sio loto atu ai ki he faivelenga ʻaufuatō naʻe fakahaaʻi ʻe Sīsū Kalaisi, ko hotau Faʻifaʻitakiʻangá, ʻoku ueʻi ai kitautolu ke muimui ofi ki hono topuvaʻé. (1 Pita 2:21) ʻOku tau hoko nai ʻi he taimi ʻe niʻihi ʻo loto-siʻi ʻi he pau ko ia ke tau fehangahangai mo e ngaahi palopalema ʻo e moʻuí ʻi he ʻaho kotoa pē. ʻOku malava fēfē ke tau ngāueʻaongaʻaki ʻa e ngaahi faingamālié ke fakahīkihikiʻi ʻa Sihova ʻi he taimi ʻoku tau ngāue taimi-kakato ai ʻi he māmaní? Pea ʻe ʻikai foki ke lava ke tau liʻaki hotau fatongia fakafāmilí ʻa ē ʻoku fiemaʻu ki ai ʻa e lahi ʻo hotau taimí. Ko e tokolahi taha ʻo e fānau iikí ʻoku nau femoʻuekina ʻi he pau ko ia ke nau ʻalu fakaʻaho ki he akó. ʻE ongoʻi nai ʻe he niʻihi ia ʻoku ʻikai malava ia ke fakahīkihikiʻi fakahāhā ʻa Sihova ʻi he ʻaho kotoa pē. ʻI ha ngaahi taimi, kuo liʻaki nai ʻe ha niʻihi ia ʻa e māhiná kotoa ʻo ʻikai vahevahe atu ai ʻa e ongoongo leleí ʻi ha ngaahi tuʻunga ʻe niʻihi.
4 Ko e tokotaha ʻa Selemaia naʻe ʻikai te ne lava ʻe ia ʻo taʻofi. ʻI he taimi naʻe ʻikai te ne lava ai ʻi he taimi nounou ke lea ʻi he huafa ʻo Sihová, naʻá ne ongoʻi hangē ha afi vela ʻi hono lotó ʻoku ʻikai lava ke ne fakamaʻumaʻu. (Sel. 20:9) ʻI he fehangahangai mo e meʻa ko ia naʻe hā ngalingali fuʻu hulu ʻa hono faingataʻá, naʻe ʻilo maʻu pē ʻe Selemaia ia ha ngaahi founga ke leaʻaki ai ki he niʻihi kehé ʻa e pōpoaki ʻa Sihová. ʻE lava ke tau faʻifaʻitaki ki heʻene faʻifaʻitakiʻanga ʻo e loto-toʻá mo e kīvoí ʻi hono kumi ha ngaahi faingamālie ke fakahīkihikiʻi ai hotau Tokotaha-Fakatupú ʻi he ʻaho taki taha?
5 Ko ʻetau lea ʻo fekauʻaki mo Sihová ʻoku ʻikai totonu ke fakangatangata pē ia ki he ngaahi taimi, naʻe ʻosi fokotuʻutuʻu anga-maheni ki he faifakamoʻoni fakataha mo e kau malanga kehé ʻi he feituʻu faiʻanga ngāue ʻa e fakatahaʻangá. Ko e meʻa pē ʻoku fiemaʻu kiate kitautolú ko ha telinga fie fanongo. ʻOku tau fetaulaki hokohoko ʻi he ʻaho kotoa pē mo e kakaí—ʻoku nau haʻu ki hotau ʻapí, ʻoku tau ngāue fakataha mo kinautolu ʻi he ngāueʻangá, ʻoku tau tuʻu laine fakataha mo kinautolu ʻi he falekoloá, pe ʻoku tau heka fakataha mo kinautolu ʻi he pasí. Ko e meʻa pē ʻoku fiemaʻú ko ha fakafeʻiloaki anga-fakakaumeʻa mo ha fehuʻi fakatupu-fakakaukau pe ko ha lea ʻa ē ʻe kamata ai ha fetalanoaʻakí. Kuo ʻilo ʻe he tokolahi ʻa e hoko ʻeni ko e founga ola lelei taha ia ʻo ʻenau faifakamoʻoní. ʻI he taimi ko ia ʻoku tau maʻu ai ʻa e ngaahi faingamālie lahi ke lea ki he niʻihi kehé ʻo fekauʻaki mo e ongoongo leleí, ʻe hoko ko e meʻa ʻe ʻikai te tau ala fakakaukau ki ai ke ʻosi atu ha māhina kakato mo e ʻikai ke fai ha faifakamoʻoni ki he Puleʻangá.
6 Ko e monū ko ia ʻo hono fakahīkihikiʻi ʻo Sihová ʻe ʻikai teitei ngata. Hangē ko ia naʻe fakahaaʻi ʻe he tokotaha-tohi-sāmé, ʻoku totonu ke fakahīkihikiʻi ʻa Sihova ʻe he meʻamoʻui kotoa pē ʻoku mānavá, pea ʻoku pau ia ʻoku tau loto ke tau kau ki ai. (Sāme 150:6) Kapau ʻoku ueʻi kitautolu ʻe hotau lotó ke fai pehē maʻu pē, te tau ngāueʻaongaʻaki fakaʻaho ʻa e ngaahi faingamālié ke lea ai ʻo fekauʻaki mo Sihova pea mo ʻene Folofolá.