Ko Hono Maʻu ʻa e ʻAonga mei he Akoʻanga Fakafaifekau Fakateokalati ki he 1996—Konga 1
1 Kuó ke lau ʻa e ngaahi fakahinohino naʻe ʻomai fakataha mo e “Fakahokohoko ʻa e Akoʻanga Fakafaifekau Fakateokalati ki he 1996”? Naʻá ke fakatokangaʻi ha ngaahi liliu ai? Neongo ko e Konga Fika 3 ʻe hokohoko atu hono toʻo mei he kiʻi tohi ko e Ngaahi Tuʻunga Lea Faka-Tohitapu ke Fetalanoaʻaki Ai, ko e Konga Fika 4 ko ha malanga makatuʻunga ʻi he fakamatala ʻoku toʻo mei he tohi Reasoning.
2 Ngaahi Konga ʻa e Kau Akó: Ko e Konga Fika 3 ʻoku vaheʻi ia ki ha tuofefine pea ko e Konga Fika 4 ʻe lava ke vaheʻi ia ki ha tokoua pe ki ha tuofefine. Hangē pē ko ia ko ha malanga ʻoku toʻo mei he Ngaahi Tuʻunga Lea Faka-Tohitapu ke Fetalanoaʻaki Ai, kapau ko ha tuofefine ʻoku vaheʻi ki ai ha malanga ʻe makatuʻunga ʻi he tohi Reasoning, ko e fokotuʻutuʻú ʻoku totonu ke fakakau ʻa e faifakamoʻoni ʻi he matapā-ki-he-matapā pe ʻi he founga ʻikai anga-mahení.
3 ʻOku totonu ke fakahaaʻi ʻo hangē ha meʻa moʻoní ʻa e konga ʻa e tokotaha-ʻapí. ʻE lava ke kumi ʻo lau ha ngaahi konga Tohitapu kuo lave ki ai ʻo ka faingamālie. ʻOku totonu ke ngāueʻaki ʻe he tuofefiné ʻene pōtoʻi faiakó ke ʻai ʻa e tokotaha-ʻapí ke lea tauʻatāina pē ʻaki hono ʻeke ha ngaahi fehuʻi pea ʻaki hono fai ha fakamatala fakatupu fakalotoʻi ʻo e ngaahi konga Tohitapu naʻe ngāueʻakí.
4 Ko e hā ʻoku totonu ke faí kapau ʻoku lahi ange ʻa e ngaahi konga Tohitapu ʻi he konga kuo vaheʻí ʻi he malava ke fetalanoaʻaki ai ʻi he miniti ʻe nimá? Fili pē ʻa e ngaahi konga tohi tefito ʻa ia ʻoku nau fakaeʻa ʻa e ngaahi poini tefitó. Kapau ʻoku ʻi ai ha ngaahi konga Tohitapu siʻisiʻi pē, ko e ngaahi poini tefito ʻi he lēsoní ʻe lava ke fetalanoaʻaki lahi ange ai. ʻI he taimi ʻe niʻihi, ko ha palakalafi pe ko ha sētesi mei he tohi Reasoning ʻe lava nai ke lau pea fetalanoaʻaki foki ai mo e tokotaha-ʻapí.
5 Ko e Malanga Fakahinohinó ʻe hoko atu pē ia ʻo makatuʻunga ʻi he tohi Fāʻūtaha ʻi he Lotu pe ko e tohi “All Scripture Is Inspired of God and Beneficial.” Ko e puha ʻoku fakakaveinga ko e “Fetalanoaʻaki ʻo Fakamanatú,” ʻa ia ʻoku maʻu ʻi he ngataʻanga ʻo e vahe taki taha ʻo e tohi Fāʻūtaha ʻi he Lotu, ʻe lava nai ke fakamanatu nounou ia ʻe he tokotaha ʻa ia ko e konga kuo vaheʻi ki aí ʻoku kau ai ʻa e palakalafi fakaʻosi ʻo e vahé. Ko e ngaahi puha fakamatala ʻoku hā ʻi he ngaahi palakalafi kuo vaheʻí ʻe lava nai ke fetalanoaʻaki ai ʻo ka faingamālie ʻa e taimí. Kapau ko ha puha fakamatala ʻoku hā ʻi he vahaʻa ʻo e ongo konga kuo vaheʻí, ko e tokoua te ne fai ʻa e ʻuluaki kongá te ne lava ʻo lave ki ai. Ko e ngaahi fakatātā ʻi he tohí ʻe lava ke fai ha lave ki ai kapau ʻoku kaunga ki he fakamatala ʻoku faí.
6 Kapau te tau ngāueleleiʻaki kakato ʻa e ako kuo tokonaki mai ʻi he akoʻangá, te tau hoko ai ʻo malava lelei ange ke “malangaʻaki ʻa e folofola” ʻi ha founga ʻe fakahāhā ai ʻa e lelei ʻo e “faʻahinga ako [“pōtoʻi fakafaiako,” NW].”—2 Tīm. 4:2.