Ko e Hā ʻOku Nau Fai Ai Iá?
1 Naʻe tala ki muʻa fekauʻaki mo Kalaisi ʻo pehē ‘ko e mamahiʻi ʻo e fale ʻo e ʻOtuá kuo kai ʻo ʻosi ia.’ (Sāme 69:9) Ko e faivelenga ʻa Sīsū ki he lotu moʻoni ʻa Sihová naʻe ueʻi ai ia ke ne fakamuʻomuʻa ʻa e ngāue fakafaifekaú. (Luke 4:43; Sione 18:37) Ko e faivelenga tatau pē ko ʻení ke faifakamoʻoni ki he moʻoní ʻoku tapua mai ia ʻi he ʻahó ni ʻi he ngāue fakafaifekau ʻa e Kau Fakamoʻoni ʻa Sihová. ʻI he taʻu fakangāue kuo ʻosí, ko ha ʻavalisi ko e toko 645,509 ʻi māmani lahi naʻa nau kau ki ha founga ʻo e ngāue tāimuʻa ʻi he māhina taki taha. ʻI he vakai atu ki heʻetau fakatapui ki he ʻOtuá, ko kitautolu tāutaha ʻoku totonu ke tau fakakaukau faʻa lotu pe ʻe lava ke tau feʻunuʻaki hotau ngaahi tuʻungá kae lava ke tau ngāue ko ha tāimuʻa tokoni pe ko ha tāimuʻa tuʻumaʻu.—Sāme 110:3; Koh. 12:1; Loma 12:1.
2 Ko e moʻui ʻi he ngaahi meʻa ʻo e tuʻu ko ʻení ʻa ia ʻoku ʻi ai ʻa e siokita fakamatelié, tokolahi ʻi he māmaní ʻoku faingataʻa ke mahino ki ai ʻa e ʻuhinga ʻe ngāue mālohi ai ha taha ʻi he ngāue fakafaifekaú ki ha meʻa ʻoku ʻikai te ne ʻomai ha ngaahi ʻaonga fakaepaʻanga pea ʻikai ha lāngilangi. Ko e hā ʻoku fai ai ia ʻe he kau tāimuʻá? ʻOku nau ʻiloʻi ʻoku nau kau ʻi ha ngāue fakaefakahaofi moʻui. ʻI hono ueʻi ʻe he ʻofa loloto kia Sihova pea mo honau kaungā faʻahinga ʻo e tangatá, ʻoku nau ongoʻi ai ha fatongia fakafoʻituitui mālohi ke tokoni ki hono haofaki ha ngaahi moʻui. (Loma 1:14-16; 1 Tim. 2:4; 4:16) Ko ha ongo meʻa mali tāimuʻa naʻá na tali lelei ia ʻaki ʻena pehē: “Ko e hā ʻokú ma tāimuʻa aí? ʻE lava ke ma fakamatalaʻi kia Sihova ʻa e ʻuhinga ʻoku ʻikai ai te ma tāimuʻá?”
3 Ko ha tuofefine ʻe taha naʻá ne tohi ʻeni fekauʻaki mo ʻene fakakaukau ke kamata tāimuʻá: “Ko hoku husepānití mo au naʻá ma palani ke ma moʻuiʻaki pē ha paʻanga hū mai pē ʻe taha, ʻa ia ʻoku ʻuhingá ko hono tuku kotoa atu ʻa e ngaahi meʻa ʻoku ʻikai ke fiemaʻú. Ka, naʻe tāpuakiʻi lahi kimaua ʻe Sihova, ʻo ʻikai ke ne liʻaki kimaua ke masiva pe ʻikai ha fiemaʻu. . . . Kuó u maʻu ha ʻuhinga moʻoni ki he moʻuí—ʻa ia ko hono tokoniʻi ʻa e faʻahinga ʻoku nau fiemaʻú ke nau hoko mai ʻo ʻilo ko Sihova, ko e ʻOtua moʻoní, ʻoku ʻikai te ne mamaʻo mei he faʻahinga ʻoku nau kumi kiate iá.” ʻI he sio atu ki he fakavavevave ʻo e taimí, ʻoku fiefia ʻa e kau tāimuʻá ʻi he ngaahi meʻa pau ʻo e moʻuí lolotonga ia ʻenau tōtōivi hono kumi ke maʻu ʻa e ngaahi koloa fakalaumālie ʻe tolonga ʻo taʻengatá.—1 Tim. 6:8, 18, 19.
4 Kapau ʻoku fakaʻatā ʻe hoʻo ngaahi tuʻunga fakafoʻituituí, ko e hā ʻoku ʻikai te ke kau ai ʻi he laui kilu ʻo ho ngaahi tokoua mo e ngaahi tuofāfine ʻi māmani lahi ʻoku nau tāimuʻa? ʻI he founga ko iá te ke lava ai ke maʻu ʻa e fiefia tatau mo ia ʻoku nau hokosiá.