Puha Fehuʻi

◼ Ko e hā ʻa e ngaahi meʻa ʻoku fiemaʻu ke tokanga ki ai ʻi he taimi ʻoku tau feohi fakataha ai mo ha tokotaha ko ha tangata pe ko ha fefine ʻi he fekauʻaki mo ʻetau ngāue fakafaifekaú?

ʻOku tau maʻu ha ʻuhinga ke ʻamanekina ko hotau ngaahi tokouá mo hotau ngaahi tuofāfiné ʻoku nau fakakaukau ke piki ki he tuʻunga fakaeʻulungaanga māʻolunga tahá ʻi honau ʻulungaanga fakafoʻituituí. Ka neongo iá, ʻoku tau moʻui ʻi ha māmani taʻemaʻa mo fakangofua tavale ʻa ia ʻoku siʻi ai ʻa e fakangatangata fakaʻulungaangá. ʻI he lolotonga ʻoku tau maʻu ʻa e ngaahi taumuʻa lelei tahá, kuo pau ke tau tokanga maʻu pē ke fakaʻehiʻehi mei hono fakatupunga ha luma pe kau ʻi ha meʻa taʻetotonu. ʻOku kau ki heni ʻa e hoko ʻo tokanga ʻi he lolotonga ʻo e kau ki he ngāue fakafaifekaú.

ʻI he ngāue fakamalangá ʻoku tau faʻa fetaulaki ai mo e kakai tangata pe fefine ʻoku hā mei ai ha faʻahinga mahuʻingaʻia loto-moʻoni ʻi he moʻoní. Kapau ʻoku tau fai ha ʻaʻahi tokotaha pea ʻoku ʻikai ha toe taha kehe ʻi he ʻapí, ʻoku faʻa lelei ange ke fai pē ʻa e fakamoʻoní ʻi he matapaá kae ʻikai ko e hū ki loto. Kapau ʻoku ʻi ai ha mahuʻingaʻia, ʻe lava ke fai ha ngaahi fokotuʻutuʻu ke toe foki ki ai ʻi he taimi te tau ʻalu fakataha ai mo ha tokotaha malanga ʻe taha pe ko e taimi ʻoku toe ʻi ai ai ha taha kehe ʻi he ʻapí. Kapau ʻoku ʻikai ke malava ʻeni, ʻe fakapotopoto ange ke ʻoange ʻa e toe ʻaʻahí ki ha tokotaha malanga ko ha tangata pe ko ha fefine ʻo tatau pē mo e tokotaha-ʻapí ko e tangata pe ko ha fefine. ʻOku toe kaunga ʻeni ki hono fai ha ngaahi ako Tohitapu mo ha tokotaha ko ha tangata pe fefine.​—Mt. 10:16.

ʻOku fiemaʻu ke tau tokanga ʻi he taimi ʻoku fili ai ha taha ke te ngāue mo ia ʻi he ngāue fakafaifekaú. Neongo nai ʻe ngāue fakataha ʻi ha ngaahi taimi ʻa e kau malangá ko e tangata mo e fefine, ʻoku lelei taha hono fai ʻení ʻi he taimi ʻoku ʻi ai ai ha kulupú. Hangē ko ia ʻoku faʻa faí, naʻa mo e lolotonga ʻo e ʻi he ngāue fakafaifekaú, ʻoku ʻikai ke fakapotopoto kiate kitautolu ke tau fakamoleki ha taimi mo ha tangata kapau ko e fefine kita ʻa ia ʻoku ʻikai ko hotau hoa mali. Ko ia ai, ko e tokoua ʻokú ne tokangaʻi ʻa e kulupu ngāué ʻoku totonu ke ne fakapotopoto ʻi hono vahe ʻa e kau malangá, kau ai ʻa e kau talavoú, ke nau ngāue fakataha.

ʻI hono ngāueʻaki maʻu pē ʻa e fakapotopotó, te tau fakaʻehiʻehi ai ke “ʻoua naʻa ai ha tūkiaʻanga ʻe tupu” ʻiate kitautolu pē, pe ki he niʻihi kehé.​—2 Kol. 6:3.