Ko ha Tumutumu Foʻou?

Te tau aʻu ki ha tumutumu foʻou ʻo e kau malangá ʻi ʻAokosi 1998? ʻOku tau maʻu ha mālohi ke fai pehē? ʻIo, ʻoku malava ke tau fai pehē. Ko e tumutumu lelei taha naʻe līpooti ʻi ha māhina pē ʻe taha ki hotau vaʻá naʻe toko 675, ʻi Maʻasi 1998. Kae kehe, ʻi hono tānaki fakakātoa ʻa e kau malanga ʻi he kotoa ʻo e ngaahi fakatahaʻanga ʻi he malumalu ʻo e vaʻa ʻi Haʻamoá ʻoku hā mei ai ʻoku ʻi ai ʻetau kau malanga tokolahi ange ʻi he 675. Pehē foki, mei he māhina ki he māhina, ʻoku ʻi ai ʻa e kau malanga foʻou ʻoku nau kamata ʻi he ngāue fakamalangá ʻi heʻetau ngaahi fakatahaʻanga ʻe niʻihi. ʻOku hā mei heni ʻe lava ke aʻu ki ha tumutumu foʻou kapau ʻe fai ʻe he tokotaha malanga taki taha ʻi he fakatahaʻangá ha fokotuʻutuʻu pau ke kau ki he ngāue fakafaifekaú ʻi he lolotonga ʻo ʻAokosí pea līpooti vave ʻa e ngāue ko iá. Koeʻuhí ko e ʻuluaki ongo ʻaho ʻe ua ʻo e māhina ko iá ko e Tokonaki mo e Sāpate, fēfē ke fai ha ngaahi fokotuʻutuʻu ke kau ki he ngāue fakamalangá ʻo kamata ʻi he fakaʻosinga ʻo e uike ko iá? Ko ʻetau ngaahi fakatahaʻanga lahi te nau kau ki ha fakataha-lahi fakavahe ʻi he konga ki mui ʻo e māhiná. ʻI he kamata tōmuʻa ʻi he māhiná, ʻe ʻikai te tau liʻaki ai hano fakamole ha taimi ʻe niʻihi ʻi he ngāue fakaefakamoʻoní he lolotonga ʻo ʻAokosí. ʻI he feinga fāʻūtahá, ʻoku totonu ke tau sio ai ki ha tumutumu lelei taha foʻou ʻo e kau malangá ʻi he ngaahi feituʻu he vaʻa ʻi Haʻamoá. Ko ha fakahīkihikiʻi leʻo-lahi ē ʻe fai kia Sihová!​—Sāme 47:1.