ʻE Hoko ʻa ʻAokosi ko ha Māhina Makehe?
1 Ko e taʻu 1963 ko ha taʻu makehe ia ki he kakai ʻa Sihová. ʻOkú ke ʻilo hono ʻuhingá? Ko e taimi ia naʻe aʻu ai ʻa e tokolahi ʻo e kau malanga ʻi māmani lahí ki he fika ko e taha milioná. Kapau naʻá ke ʻi he moʻoní ʻi he taimi ko iá, te ke manatuʻi nai ai ʻa e fiefia naʻa tau maʻu ʻi hono maʻu ʻa e fuʻu tokolahi ʻo e kau malangaʻi ʻo e pōpoaki ʻo e Puleʻangá! ʻI he taimi ní, ʻoku ʻi ai ʻa e kau malanga tokolahi pehē ʻi he ʻIunaite Seteté ʻataʻatā pē, pea ʻoku tau maʻu ʻa e kau malanga ʻe toko 700 nai ʻi he ngaahi fonua he malumalu ʻo e vaʻa ʻi Haʻamoá. Kae kehe, ʻi he māhina taki taha, ʻoku ʻi ai ha niʻihi ʻo kitautolu ʻoku ʻikai ke līpooti haʻatau kau nai ki he ngāue fakafaifekaú.
2 Tali ʻa e Polé: ʻI he lolotonga ʻo ʻAokosí te tau feinga ai ke aʻu ki he tumutumu tuʻu-ki-muʻa ko e kau malanga ʻe toko 700 ʻi he vaʻa ʻi Haʻamoá. Kapau ʻe lavameʻa ʻetau ngaahi feingá, ko e moʻoni ʻe hoko ʻa ʻAokosi ko ha māhina makehe! ʻE lava ke tau fai ʻeni kapau ʻe fai ʻe he tokotaha kotoa pē ʻo kitautolu ʻetau tafaʻakí.
3 ʻE lava ʻa e faʻahinga ʻoku palani ke mālōloó ʻo fakamoleki ha taimi ʻi he ngāue fakafaifekaú ki muʻa ke nau ʻalú. Toʻotoʻo ha ngaahi tuleki, ngaahi polosiua, pe ngaahi makasini koeʻuhí ke ke lava ʻo fai ha fakamoʻoni ki he kakai te ke fetaulaki mo iá. Pehē foki, ʻi he feituʻu te ke ʻalu ki aí ʻe lava ke ke kau fiefia ai ki he ngāue fakafaifekaú fakataha mo e kau malanga fakalotofonuá.
4 Kapau ʻokú ke taʻemalava ha meʻa, ʻoku lava pē ke ke kei kau ʻi he ngāue fakafaifekaú. Te ke malava nai ke fakamoʻoni ki he kau toketaá, kau nēsí, pe ki ha kau ʻaʻahi atu kiate koe. Mahalo te ke lava ʻo faifakamoʻoni ʻaki ʻa e faitohi, pe ʻaki ʻa e telefoní.
5 ʻOku ʻikai ha toe veiveiua, ʻe houngaʻia ʻa e niʻihi ʻi ha tokoni koeʻuhí kae malava ke kau ki he ngāue fakamalangá ʻi ʻAokosi. Ko e kau mātuʻá, kau sevāniti fakafaifekaú mo e kau faiako ʻi he akó ʻoku totonu ke nau fokotuʻutuʻu ke fai ʻa e tokoni ko ʻení. Ko ia ai, ʻoua naʻa ngalo ke ʻomai hoʻo līpooti ngāue fakamalangá ʻi he vave tahá ʻi he ngataʻanga ʻo e māhiná koeʻuhí ʻe lau ai koe ko ha tokotaha malanga ʻi ʻAokosi.
6 Lotoʻaki ʻa e Monuú: Ko e ngāue fakafaifekaú ko ha ‘meʻa lelei kuo tuku kiate koe.’ (2 Tim. 1:14) ʻOku tau houngaʻia ʻi he monū kuo ʻomai kiate kitautolú ke malangaʻi ʻa e ongoongo leleí. (1 Tes. 2:4) ʻI he taimi ʻoku tau fakakaukau atu ai ki he meʻa kotoa pē kuo fai ʻe Sihova maʻatautolú, ʻoku totonu ke ueʻi ai kitautolu ke tau kau hokohoko ʻi he ngāue mahuʻinga taha ko ʻení ʻi he taʻú kakato. ʻOku totonu ke ʻoua ʻe fakaʻatā ha meʻa ke ne taʻofi kitautolu mei he malanga maʻu peé. Tau ʻai ʻa ʻAokosí ni ko ha māhina makehe ʻi he ngāue ʻa Sihová pea fakapapauʻi ai ke faifakamoʻoni fekauʻaki mo ia ʻi he māhina kotoa pē hili iá!—Sāme 34:1.