Ko ha Tokotaha Fanongonongo Tuʻumaʻu Koe ʻo e Puleʻangá?
1 Naʻa tau fiefia kotoa pē ʻi hono ʻilo ne aʻu ʻa Tonga ki he tumutumu lahi tahá ko e kau malanga ʻe toko 128 ʻi ʻAokosi 1999. Ko e moʻoni ko ha feinga fāʻūtaha mo fakapapauʻi! ʻOku fakamoʻoniʻi ʻi he ngaahi māhina hoko atu aí, ko e niʻihi ʻi he kau malanga ko ʻení naʻa nau faingataʻaʻia ʻi he hoko ko e kau fanongonongo tuʻumaʻu ʻo e Puleʻangá, he ko e ʻavalisi fakamāhina talu mei aí ko e toko 112 pē nai. ʻOku hā mei hení ko e tokotaha malanga ʻe toko 1 ʻi he toko 7 kuo ʻikai te ne līpooti ʻene kau ki he ngāue fakafaifekaú ʻi he māhina kotoa pē. ʻOku tau tui ko e fakalototoʻa hoko haké ʻe lava ʻo tokoni ia ke fakaleleiʻi ʻa e tuʻungá.
2 Houngaʻia ʻi he Monuú: ʻOku totonu ke loloto ange ʻetau houngaʻia ki he monū ʻoku tau maʻu ke tau vahevahe atu ʻa e ongoongo lelei ʻo e Puleʻangá ki he niʻihi kehé. ʻOku ʻai ʻe he ngāue ko ʻení ʻa e loto ʻo Sihová ke fiefia pea tokoniʻi ai ʻa e faʻahinga loto-totonú ke nau ako ʻa e founga ki he moʻuí. (Pal. 27:11; 1 Tim. 4:16) Ko e tuʻumaʻu ʻi he faifakamoʻoní ʻokú ne langa hake ʻetau taukei ʻi he ngāue fakafaifekaú pea iku ai ki ha ongoʻi ʻo e fiefia mo e lavameʻa.
3 Līpooti ʻa e Ngāué: ʻOku taʻetokanga ʻa e niʻihi ʻoku kau ki he ngāue fakamalangá ke līpooti taimi totonu ʻenau ngāué. ʻOku totonu ke ʻoua ʻaupito te tau ongoʻi ko ʻetau ngāué naʻe ʻikai taau ia ke līpooti. (Fakafehoanaki mo Maake 12:41-44.) Kae kehe, ʻoku totonu ke tau līpooti ʻa e meʻa kuo tau fakahokó! ʻI hono maʻu ha founga kuo fokotuʻu ʻi ʻapi, hangē ko hono ngāueʻaki ha tohimāhina, ki hono lēkooti ʻa e taimi naʻe fakamoleki ʻi he ngāue fakafaifekaú ʻe ngāue ia ko ha fakamanatu tuʻumaʻu ke fai leva ha līpooti totonu ʻi he ngataʻanga ʻo e māhina taki taha.
4 ʻOatu ʻa e Tokoni ʻOku Fiemaʻú: ʻE pau nai ke fakaleleiʻi ʻa e ngaahi fokotuʻutuʻu fakalotofonuá ki hono tokoniʻi ʻo e faʻahinga ʻoku nau fiemaʻu tokoni ki he kau tuʻumaʻu ki he ngāue fakafaifekaú. Ko e sekelitali mo e kau faiako tohi ʻa e fakatahaʻangá ʻoku totonu ke nau fokotuʻutuʻu ha kau malanga taukei ke nau fai ha tokoni. Kapau ʻoku ʻi ai haʻo fānau pe ko ha kau ako Tohitapu kehe ko e kau malanga teʻeki papitaiso, akoʻi kinautolu ke nau līpooti ʻenau ngāué ʻi he māhina kotoa pē.
5 Fakamanatu ʻa e talanoa ki he moʻuí, “Houngaʻia ʻi ha Moʻui Fuoloa ʻi he Ngāue ʻa Sihová,” ʻi he Watchtower ʻo ʻOkatopa 1, 1997. Ko Tuofefine Ottilie Mydland ʻo Noaué naʻá ne hoko ko ha tokotaha malanga tuʻumaʻu ʻo e ongoongo leleí ki muʻa ke ne papitaiso ʻi he 1921. ʻI he taʻu ʻe fitu-ono ki mui aí, ʻi hono taʻu 99, naʻá ne pehē: “ʻOku ou fiefia ʻi heʻeku kei malava pē ke hoko ko ha tokotaha malanga tuʻumaʻú.” Ko ha fakakaukau fakaofo ē ki he kotoa ʻo e kau sevāniti ʻa Sihová ke nau faʻifaʻitaki ki ai!