Ngaahi Mātuʻa—Fokotuʻu ha Faʻifaʻitakiʻanga Lelei ki Hoʻomou Fānaú
1 ʻOku tala mai ʻe he Folofola ʻa e ʻOtuá kiate kitautolu ʻo pehē “ʻe matuʻaki tomeʻe ʻa e tamai [pea mo e faʻē] ʻa ha tangata faitotonu.” (Pal. 23:24, 25) Ko ha tāpuaki ē ki he ngaahi mātuʻa ʻoku nau fokotuʻu ha faʻifaʻitakiʻanga lelei ki heʻenau fānaú! Naʻe pehē ʻe ha mēmipa ʻo ha Kōmiti Vaʻa ʻo fekauʻaki mo ʻene ongo mātuʻá: “Ko e moʻoní ko ʻena moʻuí kotoa ia, pea naʻá ku fiemaʻu ke ʻai ia ko ʻeku moʻuí kotoa foki.” Ko e hā ʻoku totonu ke sio ki ai ʻa e fānaú ʻi heʻenau ngaahi mātuʻá?
2 Ko e ʻUlungaanga Leleí mo e Tokaʻi Lolotó: Ko e fatongia ia ʻo e ongo mātuʻá ke fakahūhū ha ngaahi fasi-ʻa-anga lelei ki heʻenau fānaú. ʻOku akoʻi ʻa e ʻulungaanga leleí, ʻo ʻikai ʻaki ha fakahinohino tala ngutu pē, kae ʻaki ʻa e mamata mo e faʻifaʻitaki. Ko ia ai, ko e hā ʻa e ngaahi ʻulungaanga ʻokú ke fakahāhaá? ʻOku fanongo ʻa hoʻo fānaú ʻokú ke leaʻaki ʻa e “fakamolemole,” “kātaki,” mo e “mālō”? ʻI he fāmilí, ʻoku mou fetokaʻiʻaki? ʻOkú ke tokanga ʻi he taimi ʻoku lea ai ʻa e niʻihi kehé? ʻOkú ke fanongo ʻi he taimi ʻoku lea atu ai ʻa e fānaú kiate koé? ʻOku fakahāhā ʻa e ngaahi fasi-ʻa-anga ko ʻení fakatouʻosi ʻi he Fale Fakatahaʻangá pea ʻi he nofo ʻi ʻapí?
3 Mālohi Fakalaumālie mo e Ngāue Faivelenga: ʻOku pehē ʻe ha tokoua naʻá ne fakamoleki ʻa e taʻu lahi ange he 50 ʻi he ngāue taimi-kakató: “Ko ha faʻifaʻitakiʻanga fakaofo ʻa ʻeku faʻeé mo ʻeku tamaí ʻi heʻena houngaʻia ki he ngaahi fakatahá pea ʻi heʻena faivelenga ʻi he ngāue fakafaifekaú.” ʻOku anga-fēfē hoʻo fakahāhaaʻi ki hoʻo fānaú ʻokú ke tokanga fekauʻaki mo hono tauhi maʻu ʻa e matuʻotuʻa fakalaumālie ʻa e faʻahinga ʻi ho fāmilí? ʻOku mou lāulea fakataha ki he konga tohi fakaʻahó? ʻOku mou ako fakafāmili maʻu pē? ʻOku sio ʻa hoʻomou fānaú ʻoku mou lau ʻa e Tohitapú mo e ngaahi tohi ʻa e Sōsaietí? Ko e hā ʻa e meʻa ʻoku nau fanongo ki aí he taimi ʻokú ke lotu ai maʻá e fāmilí? ʻOkú ke kau ʻi he fetalanoaʻaki fakatupu langa hake fakalaumālie mo hoʻo fānaú, ʻo fetalanoaʻaki ki he ngaahi meʻa pau fekauʻaki mo e moʻoní pea mo e fakatahaʻangá? ʻOkú ke vēkeveke ke maʻu ʻa e ngaahi fakatahá kotoa peá ke kau ʻi he ngāue fakafaifekaú ʻi he tuʻunga ko ha fāmili?
4 Ngaahi mātuʻa, fakakaukau atu ki he faʻifaʻitakiʻanga ʻokú ke fokotuʻu ki hoʻo fānaú. ʻAi ia ko ha meʻa lelei ʻaupito, pea te nau tukutauhi kotoa ia ʻi heʻenau moʻuí. Ko ha uaifi ʻo ha ʻovasia fefonongaʻaki, ʻokú ne ʻi hono taʻu 70 tupú he taimí ni, naʻá ne pehē: “ʻOku ou kei maʻu he taimí ni ʻa e ʻaonga mei he faʻifaʻitakiʻanga lelei ʻa ʻeku ongo mātuʻa Kalisitiane anga-ʻofá. Pea ko ʻeku lotu fakamātoató ia te u fakamoʻoniʻi ʻeku houngaʻia kakato ki he tofiʻa ko ʻení ʻaki hono ngāuetotonuʻaki ia ʻi he kotoa ʻo e ngaahi taʻu ka hoko maí.”