Ko e Hā ke Hanganaki Malanga Aí?
1 Kuo hokohoko atu ʻa e ngāue fakamalanga ʻo e Puleʻangá ʻi ho koló ʻi ha taimi fuoloa? (Mt. 24:14) Kapau ko ia, te ke ongoʻi nai ko e feituʻu ngāue ʻa e fakatahaʻangá kuo kāpui feʻunga. ʻI he taimí ni ʻi hoʻo malangá, mahalo ko e tokolahi taha ʻo e kakai ʻokú ke fetaulaki mo iá ʻoku nau hā ngali loto-noa ki he pōpoaki ʻo e Puleʻangá. Naʻa mo ia, fakatokangaʻi ʻa e fakamoʻoni fekauʻaki mo e kau ākonga moʻoni ʻa Sīsuú ʻi he peesi 141 ʻo e tohi Isaiah’s Prophecy II: “ʻI he ngaahi feituʻu ʻe niʻihi, ko e ola ʻo ʻenau ngāue fakafaifekaú ʻoku hā ngali taʻemahuʻinga nai ʻi he fakafehoanaki atu ki he lahi ʻo e ngāue mo e feinga kuo fakahokó. Ka, ʻoku nau kātaki pē.” Ka ko e hā ke hanganaki malanga aí?
2 Manatuʻi ʻa Selemaia: Ko ʻetau kātaki loto-tōnunga ʻi he ngāue fakamalangá ʻoku ʻikai totonu ke fakatuʻunga ia pe ʻe fanongo mai kia kitautolu ʻa e kakaí pe ʻikai. Naʻe malanga ʻa Selemaia ʻi he taʻu ʻe 40 ʻi he feituʻu ngāue tatau neongo ko e tokosiʻi ʻaupito naʻe fanongo kiate iá pea ko e tokolahi naʻa nau fakafepaki ki heʻene pōpoakí. Ko e hā naʻe kītaki ai ʻa Selemaiá? Koeʻuhi naʻá ne fai ha ngāue naʻe fekau ange ʻe he ʻOtuá kiate ia ke ne faí, pea ko ʻene ʻilo fekauʻaki mo e meʻa ʻe hoko ʻi he kahaʻú naʻe ueʻi ai ia ke ne hanganaki lea loto-toʻa.—Sel. 1:17; 20:9.
3 ʻOku meimei tatau hotau tuʻungá. “Naa ne [Sīsū] fekau kiate kimautolu ke mau malaga ki he kakai, mo fakamooni ko ia ia kuo fakanofo e he Otua koe Fakamāu ki he moui moe mate.” (Ng. 10:42, PM) Ko e pōpoaki ʻoku mau fuesiá ko ha meʻa ia fekauʻaki mo e moʻui pea mo e mate ki he faʻahinga ʻoku fanongo ki aí. ʻE fakamāuʻi ʻa e kakaí ʻo makatuʻunga ʻi heʻenau tali ki he ongoongo leleí. ʻI heʻene peheé, ko hotau fatongiá ke tau fai ʻa e meʻa tofu pē ko ia kuo fekauʻi kitautolu ke faí. Naʻa mo e taimi ʻoku fakafisi ai ʻa e kakaí ke fanongó, ʻoku ʻomai ʻe he meʻá ni kia kitautolu ha faingamālie ke fakahā ʻa e loloto ʻo ʻetau ʻofa kia kinautolú pea mo ʻetau līʻoa kia Sihová ʻaki ʻa e kīvoi ʻi hono fai ʻa e meʻa kuo pau ke tau faí. Ka ʻoku toe ʻi ai ʻa e meʻa lahi ange.
4 ʻOku Tau Maʻu ʻAonga: Ko hono fai ʻa e finangalo ʻo e ʻOtuá, ʻo tatau ai pē pe ko e hā ʻa e tali ʻi he feituʻu ngāué, ʻoku ʻomai ai kia kitautolu ʻa e melino ʻi loto, fiemālie mo e fiefia, ʻa ia ʻoku ʻikai lava ke maʻu ia ʻi ha toe founga kehe. (Sāme 40:8) ʻOku maʻu ai ʻe heʻetau moʻuí ʻa e ʻuhinga mo e taumuʻa moʻoni. Ko e lahi ange ʻetau kau ki he ngāue fakafaifekaú, ko e lahi ange ia ʻa e hangataha hotau lotó mo e ʻatamaí ki he ʻamanaki mo e fiefia ʻo e moʻui ʻi he māmani foʻou ʻa e ʻOtuá. Ko e nōfoʻi ʻi he ngaahi talaʻofa Fakatohitapu ko ʻení, ʻoku fakaleleiʻi ai hotau tuʻunga fakalaumālié pea fakaivimālohiʻi ai hotau vahaʻangatae mo Sihová.
5 Naʻa mo e ʻikai ke tau sio leva ki ha ngaahi ola ʻi heʻetau ngāue fakamalangá, ko ha tenga ʻo e moʻoní kuo tō nai ia ʻi he loto ʻo ha tokotaha ʻa ia ʻe tupu hake ia ʻi he taimi totonu ʻa Sihová. (Sione 6:44; 1 Kol. 3:6) ʻOku ʻikai ha taha ʻia kitautolu te ne ʻilo pe ko e hā ʻa e tokolahi ʻo e faʻahinga ʻoku teʻeki ke nau hoko ʻo ako ki he Puleʻangá fakafou ʻi he ngaahi feinga ʻa e kakai ʻa Sihová, ʻi hotau feituʻú pe ʻi māmani lahi.
6 ʻI he fakavavevave ange ia ʻi he taimi ki muʻá, ʻoku totonu ke tau tokanga ki he fakahinohino ʻa Sīsuú: “Mou tokanga, mou ʻā pē: he ʻoku ʻikai te mou ʻilo pe fakakū hono taimi. Pea ko e meʻa ʻoku ou tala kiate kimoutolu ʻoku ou tala ki he kakai kotoa pē, Mou leʻo.” (Mk. 13:33, 37) Ko ia ai, ʻofa ke tau hokohoko atu hono kotoa ʻi hono talaki ʻa e ongoongo lelei ʻo e Puleʻangá, ʻo ʻai ʻa e loto ʻo Sihová ke fiefia ʻi heʻetau kau ʻi hono fakamāʻoniʻoniʻi ʻa hono huafa lahi mo māʻoniʻoní.