Fakamamafa Lahi Ange ki he Tohi Tapú!
1. ʻI he kamatá, naʻe fakatefito ʻa hono pulusi ʻo e Taua Leʻo kia hai, pea fakatefito kia hai ʻa e Golden Age?
1 ʻI ʻOkatopa 1, 1919, naʻe pulusi ai ʻa e fuofua ʻīsiu ʻo e makasini The Golden Age. Naʻe fakamoʻoniʻi ko ha meʻangāue mahuʻinga taha ia ʻi he ngāue fakamalangá. Ko e hā hono ʻuhingá? Ko hono ʻuhingá he naʻe teuteuʻi makehe ia maʻá e kakaí. Ka naʻe ʻikai pehē ʻa e tuʻunga ia ʻo e Taua Leʻo, ʻa ia ʻi he ngaahi taʻu lahi naʻe fai e vakai ki ai ko ha makasini ia ne meimei fakatefito pē ki he “fanga sipi toko siʻi.” (Luke 12:32) Naʻe tali loto-māfana ʻe he kau malanga ʻo e Puleʻangá ʻa e tohi foʻoú ʻa ia ʻi he ngaahi taʻu lahi ko hono tufaki ʻo e Golden Age naʻe lahi mamaʻo ange ia ʻi he Taua Leʻo.
2. Ko e hā ʻa e hingoa ʻo e Golden Age ʻi he ʻaho ní, pea ko e hā hono taumuʻá talu mei heʻene kamatá?
2 Naʻe pulusi ʻa e makasini The Golden Age ke fakahā ki he kakaí ko e fakaleleiʻanga moʻoni ki he ngaahi palopalema ʻa e faʻahinga ʻo e tangatá ko e Pule Taʻu ʻe Taha Afe ʻa Kalaisí, ʻa ia te ne fakahoko moʻoni mai ha taʻu koula maʻá e faʻahinga ʻo e tangatá. Lolotonga e ngaahi taʻu hoko mai aí naʻe fai ai ha fanga kiʻi liliu ki he Golden Age ke fakalatoʻaki ʻa e ngaahi fiemaʻu feliliuaki ʻi he taimi ko iá. ʻI he 1937 naʻe liliu ai hono hingoá ki he Consolation. ʻI he 1946 naʻe hoko ai ko e ʻĀ Hake! ʻa ia ko e hingoa ia ʻoku tau ʻiloʻi ʻi he ʻaho ní.
3. Kuo hoko ʻa e ʻĀ Hake! ko ha meʻangāue mālohi ʻi hono fakahoko ʻo e kikite fē?
3 Mei heʻene kamatá, kuo toe tokoni lahi ʻaupito ʻa e makasini ko ení ki he fuʻu faifakamoʻoni lahi kuo fakahoko talu mei he 1919. (Mt. 24:14) Ka neongo ia, ʻi he vakai ki he fakavavevave ʻa hotau taimí, ʻoku hā ngali fakapotopoto ke fai ha toe ngaahi liliu ki he ʻĀ Hake!
4. (a) Ko e hā ʻoku fiemaʻu ke fai ʻe ha taha kapau te ne fiemaʻu ke fufū ia ʻi he “ʻaho ʻo e houhau ʻa Sihova”? (e) Fakatatau ki he Fakahā 14:6, 7, ko e hā ʻa e meʻa ʻoku fiemaʻu ʻe he “angelo ʻe taha, ʻoku ne puna ʻi he loto langi” ke fai ʻe he tokotaha kotoa?
4 ʻOku laui miliona ʻa e kakai ʻoku nau fiefia ʻi hono lau ʻo e ʻĀ Hake! koeʻuhí he ʻokú ne kāpui ha konga lahi ʻaupito ʻo e ngaahi tuʻunga-lea fakamāmaní ʻi ha founga fakamānako. ʻOku ʻikai ha veiveiua ko e tokolahi taha ʻo e faʻahinga ko ia ʻoku nau maʻu ʻi he taʻu taki taha ʻa e Fakamanatú ko e kau lautohi tuʻumaʻu kinautolu ʻo e ʻĀ Hake! Ka ʻo kapau ʻoku fakaʻamu ha taha ke fufū ia ʻi he “ʻaho ʻo e houhau ʻa Sihova,” te ne fiemaʻu ha tokoni ke fai ha meʻa lahi ange ʻi he hoko pē ko ha tokotaha lautohi tuʻumaʻu ʻo ʻetau ngaahi tohí.—Sef. 2:3; Fkh. 14:6, 7.
5. (a) Kamata ʻi he ʻĀ Hake ʻo Sanuali 2006, ko e hā ʻa e meʻa ʻe fakahāhaaʻi lahi ange aí? (e) Ko e hā nai ʻa e meʻa ʻe ueʻi ʻa e tokolahi ke nau faí, pea ʻoku fakahoko ai ʻa e kikite fē?
5 Ko ia ai, mei Sanuali ʻo e 2006, ʻe toe fakamamafa lahi ange ai ʻa e ʻĀ Hake! ki he Puleʻanga ʻo e ʻOtuá. Te ne fakalototoʻaʻi fakahangatonu ange ai ʻa e kau lautohí ke nau hanga ki he Tohi Tapú ki ha ngaahi fakaleleiʻanga ki heʻenau ngaahi palopalemá pea ʻe fakamamafaʻi ʻo toe ʻiloa ange ai ʻa hono fakamatalaʻi ʻe he Tohi Tapú ʻa e ngaahi meʻa ʻoku lolotonga hokó. ʻI he foungá ni, ʻe mahinoʻi lelei ange ai ʻe he kau lautohí ʻa e ngaahi meʻa ʻoku lolotonga hokó pea mahalo ʻe ueʻi ai kinautolu ʻe he meʻa ʻoku nau laú ke ako lahi ange ʻo fekauʻaki mo Sihova.—Sak. 8:23.
6, 7. (a) ʻE anga-fēfē hono faʻu ʻa e ʻĀ Hake! ke tokoniʻi ʻa e tokolahi ke nau ngāueʻaki ʻa e 1 Tesalonaika 2:13? (e) ʻE pulusi tuʻo fiha ʻa e ʻĀ Hake!, pea ko e lea ʻe fiha ʻe uesia ʻi he liliú?
6 ʻE hokohoko atu ʻa e ʻĀ Hake! ke fakahāhaaʻi ʻa e ngaahi tuʻunga-lea ʻa ia ʻoku mahuʻinga fakalūkufuá. Kae kehe, ʻe tō e fakamamafa lahi angé ki he Tohi Tapú. (1 Tes. 2:13) Koeʻuhi ʻoku ʻi he Taua Leʻo ʻa e fakamatala Fakatohitapu loloto pea ʻe fakahaaʻi ʻi he ʻĀ Hake! ʻa e fakamatala lahi ange ʻoku makatuʻunga Fakatohitapú, ʻoku hā ngali ʻoku ʻikai fiemaʻu ke hokohoko atu hono pulusi tuʻo ua ʻi he māhina ʻa e ʻĀ Hake! Ko ia ai, kamata ʻi hono ʻīsiu ʻo Sanuali 2006, ʻe pulusi ʻa e ʻĀ Hake! ko ha makasini fakamāhina. ʻE iku ai heni ki hono fakafaingofuaʻi lahi ange ʻa hono teuteuʻí, liliú pea mo hono fakafolau ʻo ʻetau ʻū tohí.
7 Ko e liliu ko ení te ne uesia ai ʻa e peseti nai ʻe 40 ʻo e ngaahi lea ʻa ia ʻoku pulusi ai ʻa e ʻĀ Hake! ʻI he ngaahi lea lahi tahá, kuo ʻosi hoko ai ʻa e ʻĀ Hake! ia ko ha tohi fakamāhina pe fakakuata. ʻE ʻikai ʻi ai ha liliu ʻi hono pulusi ʻo e Taua Leʻo.
8. ʻE anga-fēfē nai hano ngāueʻaki ʻe he kau malangá e ʻĀ Hake! fakataha mo e Taua Leʻo?
8 ʻE tuʻuaki nai ʻa e ʻĀ Hake! ʻo e māhina taki taha fakataha mo e taha ʻo e ʻīsiu ʻo e Taua Leʻo ki he māhina ko iá. Ko e faʻahinga ko ia ʻoku nau fakaʻaliʻali ʻa e ʻĀ Hake! te nau malava ʻo ngāueʻaki ʻa e ʻīsiu tatau ʻi he kotoa ʻo e māhiná ʻo ʻikai fiemaʻu ke liliu ʻenau tuʻuakí ʻi he konga loto ʻo e māhiná, hangē ko ia he lolotonga ní.
9. Ko e hā ʻa e ngafa ʻe hokohoko atu hono fakahoko ʻe he ʻĀ Hake!?
9 Talu mei he fuofua ʻīsiu ʻi he 1919, ko e makasini naʻe hokohoko mai hono ʻiloa ko e Golden Age, Consolation pea ʻi he taimí ni ko e ʻĀ Hake! kuó ne fakahoko ha ngafa lahi ʻi he ngāue fakamalangá. ʻOku mau lotu ke hokohoko atu hono faitāpuekina ʻe Sihova ʻa hono tufaki ʻo e makasiní ʻi hono fokotuʻutuʻu foʻoú pea te ne tokoniʻi ai ʻa e kakai tokolahi ange “mei he puleʻanga kotoa pē, mo e ngaahi matakali, mo e ngaahi faʻahinga, mo e ngaahi lea” ke nau hanga ki he Puleʻanga ʻo e ʻOtuá ko ʻenau ʻamanakiʻangá pē ia.—Fkh. 7:9.