Fanongonongo ʻa e Ongoongo Lelei ʻo e Meʻa Lelei Ange

¹ Kuo hoko ʻa e Taua Leʻo ʻi he taʻu ʻe 117 ko ha taukapo ki he moʻoni ʻo e Tohitapú. ʻI he lolotongá ni, ko e ngaahi tatau ʻo e ʻīsiu taki taha ʻe 18,950,000 ʻoku pulusi ʻi he ngaahi lea ʻe 125. Kuo fuoloa mai foki ʻa hono poupouʻi ʻe he Awake! ʻa e Folofola ʻa e ʻOtuá, pea ʻi he taimí ni ʻoku tufaki ia ʻi he ngaahi tatau ʻe 15,730,000 ʻi he ngaahi lea ʻe 80.​—Fakafehoanaki mo Kolose 1:23.

² ʻOku Fakafiemālieʻi ʻe he Ngaahi Makasiní ʻa e Fiemaʻu Fakalaumālié: Ko e Taua Leʻo mo e Awake! kuo ʻaonga ia ki he laui miliona ʻo e kakai loto-totonú ʻaki ʻa e tokoni ke fakatōliʻa ʻenau fiemaʻu fakalaumālié. ʻOku pulusi ai ʻa e ngaahi kupu fakatupu langa hake ki he tuí. Ko e fakatātaá, ʻi he Taua Leʻo ʻo Fepueli 1, 1996, naʻa tau ako ai ʻa e fakamatala ʻo fekauʻaki mo e fiemaʻu ke falala kia Sihova mo ʻene Folofolá. Ko e tatau ʻo e Taua Leʻo ʻo Maʻasi 1, 1996, ʻoku fakalototoʻaʻi ai kitautolu ke hanganaki femoʻuekina ʻi he ngāue ʻa Sihová pea ke hanganaki fakatuʻamelie atu kiate ia. Ko ha fakaueʻiloto ē ʻa e fakaikiiki ʻoku fakamatalaʻi ʻe he kikite ʻa Sēfanaiá! Pea ʻoku ʻi ai leva mo e fakamatala fakamālohi tui fekauʻaki mo e mateaki ʻa e Kalisitiané ʻi he Taua Leʻo ʻo ʻEpeleli 1, 1996. Ko e tatau ʻo Sune 1, 1996, naʻe fakamamafaʻi ai ʻa e mahuʻinga ʻo hono lau mo ako ʻa e Folofola ʻa e ʻOtuá ʻi ha tuʻunga tuʻumaʻu. Ko e ngaahi kupú kuo nau ʻai ke loloto ʻetau mahino ki he Folofola ʻa e ʻOtuá, pea kuo fakalahi ai ʻetau houngaʻia ki hono Puleʻangá.

³ Tānaki atu ki ai, ko e ngaahi makasiní ni ʻoku ʻi ai ʻa e ngaahi kupu ʻaonga mo taimi totonu fekauʻaki mo e ʻulungaanga fakaʻotuá, ngaahi ʻulungaanga taau faka-Kalisitiané, pea mo e ngaahi kaveinga mahuʻinga kehe. ʻOku nau fālute ʻa e ngaahi pole moʻoni ʻoku uesia ai ʻetau moʻuí. Ko hono olá, ʻoku tau fiefia ai ʻi he tuʻunga lelei ange ʻo e moʻui he taimi ní lolotonga ʻetau tatali ki hono fakahoko ʻa e ngaahi talaʻofa ʻa e ʻOtuá ki ha meʻa lelei ange ʻi he kahaʻú.​—ʻAi. 48:17; 1 Tīm. 6:​19.

⁴ Ko hano fakamanatu nounou ʻo e meʻa ʻoku hā ʻi he peesi 4 ʻo e tatau taki taha ʻo e Awake! ʻokú ne ʻomai ai kiate kitautolu ʻa e ʻuhinga lelei ke fakaongoongoleleiʻi ai ʻa e makasiní ni ko e fakamatala lelei ʻaupito ia ki he lautohí maʻá e kakai ʻi he feituʻu kotoa pē, tatau pē ki he talavou mo e taʻumotuʻa. ʻOku fakamatala ai ʻo pehē: “Ko e Awake! ki hono fakamaama ʻo e fāmilí fakalūkufua. ʻOku hā ai ʻa e founga ke fekuki ai mo e ngaahi palopalema ʻi he ʻaho ní. ʻOku fakamatalaʻi ai ʻa e ngaahi ongoongó, lave ʻo fekauʻaki mo e kakai ʻi he ngaahi fonua lahi, sivisiviʻi ʻa e lotú mo e saienisí. Ka ʻokú ne fai ʻa e meʻa lahi ange. ʻOkú ne fakatotoloʻi ʻo aʻu ki he ʻelitó pea tuhuʻi ʻa e ʻuhinga moʻoni ʻo e ngaahi meʻa ʻoku hokó, ka ʻokú ne tuʻuʻatā fakapolitikale maʻu pē pea ʻoku ʻikai te ne fakamāʻolungaʻi ha matakali ʻe taha ʻi he taha. Ko e meʻa mahuʻinga tahá, ko e makasini ko ʻení ʻokú ne langaʻi ʻa e falala pau ki he talaʻofa ʻa e Tokotaha-Fakatupú ki ha māmani foʻou melino mo malu ʻa ia te ne fetongi ʻa e ngaahi meʻa ʻoku tuʻu anga-fulikivanu mo taʻefakalao lolotonga ní.”

⁵ ʻOatu ʻa e Ngaahi Makasiní ki he Niʻihi Kehé: Ke nima-homo ʻi hono tufaki atu ʻa e Taua Leʻo mo e Awake! (Fakafehoanaki mo 1 Tīmote 6:​18.) ʻAi ke ala maʻu ha ngaahi tatau koeʻuhi ke ke lava ʻo tuʻuaki kinautolu ki ha taha pē te ke feʻiloaki mo ia. (Koh. 11:6) Ko kitautolu kotoa, kau ai ʻa e kau talavoú mo e kau malanga foʻoú, ʻoku lava ke kau kakato ʻi hono tufaki atu ʻa e ngaahi makasiní ʻi he māhiná ni ʻaki hono ngāueʻaki ʻa e ngaahi tuʻuaki nounou ʻo makatuʻunga ʻi he ngaahi kupu taimi totonu ʻoku fakaeʻa ʻi he ngaahi tatau lolotongá. ʻAi ke maheni lelei mo e ngaahi meʻa ʻi lotó, pea tuʻuaki kinautolu ʻaki ʻa e loto-totonu mo e tuipau.

⁶ ʻOku ʻi he Taua Leʻo mo e Awake! ʻa e fakamatala ʻa ia ʻoku fiemaʻu ʻe he tokotaha kotoa pē. Ko hono tufaki kinautolú, ko e taha ia ʻi he ngaahi founga lelei taha ʻe lava ke tau tokoniʻi ai ʻa e niʻihi kehé ke ʻilo ʻa e ongoongo leleí ʻa ia ko e meʻa lelei ange ia ʻoku vavé ni ke hoko maí!