ʻE Lava ke Kau ʻa e Tokotaha Kotoa ʻi he Ngaohi ha Kau Ākonga Foʻou
1 ʻOku ʻikai ke maʻu ha ākonga foʻou mei he ngaahi feinga ʻa ha tokotaha pē. ʻOku lava ke ngāueʻaki ʻe Sihova ʻa hono ngaahi “kaungāngaue” kotoa ke nau tokoniʻi ʻa e kau ako Tohi Tapú ke nau tupu fakalaumālie. (1 Kol. 3:6-9) ʻOku tau taki taha tokoniʻi ʻa e faʻahinga foʻoú ʻo ʻikai ʻaki pē ʻa ʻetau ngaahi tali loto-moʻoni ʻi he ngaahi fakataha faka-Kalisitiané kae toe pehē foki ki hotau ʻulungāanga leleí, ʻa ia ʻoku ʻoatu ai ʻa e fakamoʻoni mataʻāʻā ʻoku ngāue ʻa e laumālie ʻo e ʻOtuá ʻi heʻetau moʻuí. (Sione 13:35; Kal. 5:22, 23; Ef. 4:22, 23) Ko e hā ʻa e meʻa lahi ange ʻe lava ke fai ke tokoniʻi ai ʻa e faʻahinga foʻoú?
2 ʻI he Tuʻunga ko ha Fakatahaʻanga: Ko e kotoa ʻo kitautolú ʻe lava ke tau fakahāhā ʻa e mahuʻingaʻia ʻi he faʻahinga ʻoku nau kamata ke maʻu ʻa e ngaahi fakatahá ʻaki ʻa e tamuʻomuʻa ke fakafeʻiloaki māfana kia kinautolu pea talanoa mo kinautolu ʻi he ki muʻa mo e hili ʻa e fakatahá. ʻI he fakalaulauloto atu ki heʻene ʻuluaki feʻiloaki mo e fakatahaʻangá, naʻe pehē ʻe ha tangata ʻe taha: “Naʻá ku feʻiloaki ai ʻi he ʻaho pē ʻe taha mo e kakai tokolahi ange ʻoku nau anga-ʻofa moʻoni, ko e kakai naʻe ʻikai ʻaupito haʻamau maheni, ʻo laka ange ia ʻi he kakai kuó u feʻiloaki mo ia ʻi he siasi naʻá ku tupu hake aí. Naʻe hā mahino naʻá ku maʻu ʻa e moʻoní.” Naʻe papitaiso ia hili ʻa e māhina ʻe fitu mei heʻene fuofua maʻu ʻa e fakatahá.
3 ʻOatu ha fakaongoongolelei loto-moʻoni ʻi hono fai ʻe he tokotaha ako Tohi Tapú ha fakalakalaka fakalaumālie. Kuó ne kātekina nai ha fakafepaki? ʻOkú ne ʻalu maʻu pē ki he ngaahi fakatahá? Naʻá ne loto-toʻa ke fai ha tali? Kuó ne kau nai ʻi he Ako Fakafaifekau Fakateokalatí pe kamata ʻalu ʻi he ngāue fakafaifekaú? Fakaongoongoleleiʻi ia ʻi he fakalakalaka kuó ne faí. ʻE fakaivifoʻou mo fakalototoʻaʻi ai ia.—Pal. 25:11.
4 ʻI he Tuʻunga ko ha Faiako Ako Tohi Tapu: Kuo malava ʻa e kau malanga ʻe niʻihi ʻo tokoniʻi ʻenau kau ako Tohi Tapú ke nau hoko ʻo maheni mo e kau mēmipa tāutaha ʻo e fakatahaʻangá ʻaki hono kole ange ki he kau malanga kehé ke nau ō mo kinautolu ʻi he akó. Fakaafeʻi ʻa e tokotaha akó ki he ngaahi fakataha ʻa e fakatahaʻangá ʻi he vave taha ʻe ala lavá. ʻI heʻene kamata maʻu ʻa e ngaahi fakatahá, fakapapauʻi ke fakafeʻiloaki ia ki he niʻihi kehé. ʻOkú ne fāinga nai ke ikuʻi ha tōʻonga kovi, hangē ko e ifí? ʻOku fakafepaki nai ha tokotaha ʻi hono ʻapí ki heʻene akó? Te ne maʻu ʻaonga nai ʻi heʻene talanoa mo ha tokotaha malanga kuó ne fehangahangai mo ikuʻi ha pole meimei tatau.—1 Pita 5:9.
5 ʻOku fiemaʻu ki he faʻahinga foʻoú ʻa e poupou fakalaumālie mei he fakatahaʻangá. ʻE lava ke tokoniʻi ʻe he tokotaha kotoa kinautolu ʻi hono fai ha fakalakalaka ʻaki hono fakahāhā ha mahuʻingaʻia moʻoni fakafoʻituitui.