ʻI he Taimi ʻOku ʻIkai ke ʻi ʻApi Ai ʻa e Kakaí
1. Ko e hā ha pole anga-maheni ʻi he taimi ʻoku tau kau ai ʻi he ngāue fakafaifekau fale-ki-he-falé?
1 ʻI he ngaahi feituʻu lahi ʻoku hoko ai ʻo fakautuutu ʻene faingataʻa ke maʻu ha kakai ʻi ʻapí. ʻI he “ngaahi taimi faingataʻa” ko ení, ʻoku fakamālohiʻi ai ʻa e tokolahi ke nau ngāue ʻi he ngaahi houa lahi ke feau ʻa e ngaahi fiemaʻu tefitó. (2 Tim. 3:1) ʻE mavahe nai ʻa e niʻihi mei ʻapi ʻo fai ha fakatau pe kau ʻi ha fakafiefia. ʻE lava fēfē ke tau aʻu ki he faʻahinga peheé mo e ongoongo leleí?
2. ʻE lava fēfē ke tau fakapapauʻi ʻe fai ha toe ʻaʻahi ki he ngaahi ʻapi ʻoku ʻikai ʻi ai ha tahá?
2 Tauhi ha Ngaahi Lēkooti Lelei: Ko e ʻuluaki sitepú ko hono hikiʻi hifo ʻa e faʻahinga ʻoku ʻikai ke ʻi ʻapí. ʻOku tautefito ʻene mahuʻinga ení kapau ʻokú ke toutou ngāueʻi ho feituʻu ngāué. ʻOkú ke hikiʻi hifo ke māʻalaʻala ʻa e hingoa ʻo e halá, fika ʻo e feituʻu ngāué, ko ho hingoá pea mo e ʻahó? ʻE lava ke ke tuku ha kiʻi ʻatā ke hiki ai ha ngaahi nouti lahi ange kapau ko koe pe ko ha toe tokotaha malanga kehe ʻe toe foki ʻo ngāueʻi ʻa e ngaahi ʻapi ʻoku ʻikai ʻi ai ha tahá. ʻI he ngataʻanga ʻo e vahaʻa taimi faifakamoʻoní, manatuʻi ke ʻoatu ʻa e lēkōtí pe ngaahi noutí ki he tokotaha ʻoku ʻi ai ʻa e kaati ʻo e feituʻu ngāué, tuku kehe kapau te ne loto-lelei ke ke ngāueʻi ʻa e ngaahi ʻapi ʻoku ʻikai ʻi ai ha tahá. Ngāueʻaki ha lauʻipepa mavahe ke lēkooti ai ha faʻahinga mahuʻingaʻia pē te ke toe ʻaʻahi ki ai.
3. Ko e hā ʻa e ngaahi fokotuʻu ʻe niʻihi ki he founga ke aʻu ai ki he faʻahinga ʻoku ʻikai ke ʻi ʻapí?
3 ʻAhiʻahi ʻi ha Taimi Kehe: Mahalo ko e niʻihi naʻe ʻikai te nau ʻi ʻapi lolotonga ʻa e ʻaho ngāué te nau ʻi ʻapi nai lolotonga ʻa e taimi efiafí pe ngaahi fakaʻosinga uiké. ʻE lava ke ke fokotuʻutuʻu hoʻo taimi-tēpilé ke ke toe foki kia kinautolu ʻi ha taimi faingamālie ange? (1 Kol. 10:24) Kapau ʻoku ʻikai, ʻe malava nai ke ke ʻoange ʻa e ngaahi ʻapi ʻoku ʻikai ʻi ai ha tahá ki ha tokotaha malanga ʻa ia ʻe lava ke toe foki ki ai ʻi ha taimi kehe. Ka ʻikai, te ke tohi nai ki he faʻahinga naʻe ʻikai ke ʻi ʻapí pe feinga ke aʻu kia kinautolu fakafou he telefoní. Ko e kau malanga ʻoku fakangatangata ʻenau kau ʻi he ngāue fale-ki-he-falé ko ʻenau mahamahakí te nau fiefia nai ke tokoni atu ʻi he meʻá ni.
4. Ko e hā ʻokú ne fakatātaaʻi ʻa e mahuʻinga ʻo e toe foki ki he faʻahinga ʻoku ʻikai ʻi ʻapí?
4 ʻOku fakatātaaʻi ʻe he tuʻunga ʻe taha ʻa e mahuʻinga ʻo e feinga ke fetuʻutaki ki he faʻahinga ʻoku ʻikai ʻi ʻapí. ʻI he hili ʻa e toutou ʻaʻahi ʻa ha kau malanga ki ha ʻapi ʻe taha ʻi he taʻu ʻe tolu, naʻe faai atu pē ʻo fai ha fetuʻutaki mo e tokotaha-ʻapí. Naʻe toki ʻiloʻi ai naʻe tatali mai e fefiné ʻi he taimi kotoa ko iá ki ha Fakamoʻoni ke ʻaʻahi ange koeʻuhí ke toe hoko atu ʻene ako Tohi Tapu naʻe fai ki muʻa ke ne hiki ki he feituʻu ko iá.
5. Ko fē ʻa e taimi ʻoku lau ai kuo ʻosiki ha feituʻu ngāue?
5 ʻOsiki ʻa e Feituʻu Ngāué: Ko fē ʻa e taimi ʻoku lau ai kuo ʻosiki ha feituʻu ngāue? Ko e anga-mahení, ʻoku hoko eni ʻi he taimi kuo fai ai ha ngaahi feinga lahi feʻunga ke fetuʻutaki ki ha tokotaha ʻi he ʻapi taki taha. ʻE feʻungamālie nai ke tuku fakapotopoto ha tuleki pe ha makasini motuʻa ange ʻi he ngaahi ʻapi ʻoku ʻikai ʻi ai ha tahá, tautefito ʻi he ngaahi feituʻu ngāue ʻoku tātātaha ke ngāueʻí. ʻOku totonu ke ʻosiki ʻa e feituʻu ngāué ʻi loto he māhina ʻe fā. Pea ʻoku totonu ke fakahā leva ki he sevāniti tokangaʻi ʻo e feituʻu ngāué koeʻuhi ke ne hikiʻi hifo ʻi heʻene lēkōtí.
6. Ko e hā ʻoku totonu ai ke tau feinga ke aʻu ki he tokotaha kotoa ʻi hotau feituʻu ngāué mo e ongoongo leleí?
6 ʻOku tau fiemaʻu ʻa e kakai tokolahi taha ʻe ala lavá ke nau maʻu ha faingamālie ke ako ai ke ui ki he huafa ʻo Sihová pea fakamoʻui kinautolu. (Loma 10:13, 14) ʻOku kau heni ʻa e faʻahinga ʻoku nau mamaʻo mei honau ʻapí ʻi he taimi ʻoku tau ʻaʻahi atu ai ʻi he fale ki he falé. Hangē ko e ʻapositolo ko Paulá, ʻai ko hoʻo holí ia ‘ke fakamooni [fakaʻāuliliki] ki he ogoogolelei oe aloofa ae Otuá.’—Ng. 20:24, PM.