Teuteu Fakaʻāuliliki ki he Fakamanatú
Ko ha fiefia mo ha monū moʻoni ia ki he kau muimui ʻo Kalaisí ke nau teuteu fakaʻāuliliki ki he pō ko ia te tau fakamanatu ai ʻa e pekia ʻa Sīsū Kalaisí! (Luke 22:19) Ko e hā ʻa e ngaahi meʻa ʻaonga ʻoku totonu ke tau fai ʻi he teuteu atu ki he Fakamanatú?
◼ Taimi mo e Feituʻu: ʻOku totonu ke mahino lelei ki he tokotaha kotoa ʻa e taimi mo e feituʻu tonu ʻa ia ʻe fai ai ʻa e Fakamanatú. Kapau ʻoku lahi hake ʻi he tahá ʻa e fakatahaʻanga ʻe fakataha ʻi he Fale Fakatahaʻangá, ʻoku mahuʻinga ke aʻu taimi tonu pea mavahe leva ʻi ha founga maau, koeʻuhí ʻoku fakangatangata pē ʻa e taimi ʻoku vaheʻi ki he ngaahi fakatahá. ʻOku totonu ke fai ha feinga lahi ke fakaʻehiʻehi ai mei he feʻefiʻefihi ʻoku ʻikai fiemaʻu ʻi he matapā hūʻangá, ʻi he feituʻu talitaliʻangá, ʻi he ʻaluʻangá pea ʻi he tauʻanga meʻalelé.
◼ Tohi Fakaafe: ʻOku ʻi ai ha tohi fakaafe ʻa e kau malangá kotoa, pea ʻoku nau maheni mo e meʻa ʻi lotó? Kuó ke ʻahiʻahiʻi ʻa e founga hono tuʻuaki ʻa e tohi fakaafe ko ení? Ko hai te ke ʻoange ki ai ha tohi fakaafe? ʻOku totonu ke fai ha feinga ke tufa kotoa ʻa e ngaahi tohi fakaafé.
◼ Meʻalele: ʻE fiemaʻu nai ʻe he faʻahinga mahuʻingaʻia hangē ko ha fanga tokoua mo e fanga tuofāfine ha meʻalele ke nau heka ai pe ko ha toe tokoni fakafoʻituitui kehe. Ko e hā ʻa e fokotuʻutuʻu kuo fai ke tokoniʻi ʻaki ʻa ʻenau ngaahi fiemaʻú?
◼ Mā mo e Uaine: Fakapapauʻi ʻe ʻikai paasi ʻa e maá mo e uainé kae ʻoua kuo tō ʻa e laʻaá. ʻOku totonu ke fai ʻa e ngaahi fokotuʻutuʻu ke ʻave ʻa e maá mo e uainé ki ha faʻahinga pē ʻo e kau paní ʻoku ʻikai malava ke nau ʻi ai pea ʻoku nau vaivai. ʻOku totonu ke ʻosi maau lelei ʻa e maá mo e uainé.—Sio ki he Taua Leʻo ʻo Fepueli 15, 2003, peesi 14-15, palakalafi 14, 17.
◼ Fale Fakatahaʻanga: ʻOku totonu ke fakamaʻa fakaʻāuliliki ki muʻa ʻa e Fale Fakatahaʻangá. ʻOku totonu ke tomuʻa fokotuʻutuʻu ʻi he holó ʻa e peletí, ipu sioʻata ki he uainé pea mo ha tēpile mo ha meʻa ʻufiʻufi tēpile feʻungamālie. Kapau ʻe ngāueʻaki ha feituʻu faiʻanga fakataha kehe, fakapapauʻi ʻoku ʻi ai ha meʻa fakaleʻolahi feʻungamālie koeʻuhí ke lava ʻo fanongo ʻa e kau maʻu fakatahá kotoa ki he tokotaha malangá. Ko e kau fakanofonofó mo e kau tufá ʻoku totonu ke filifili pea fakahinohinoʻi ki muʻa ʻo fekauʻaki mo honau ngaahi fatongiá, ko e founga totonu ke muimui aí pea mo e fiemaʻu ʻo e vala mo e teuteu taau.
ʻI he kātoanga mahuʻinga taha ko ení, ʻa e Fakamanatu ʻa e pekia ʻa Sīsū Kalaisí, ʻoku tau loto ke teuteu fakaʻāuliliki tāutaha ki ai pea ʻi he tuʻunga ko ha fakatahaʻanga. Ko e moʻoni, ʻe tāpuakiʻi lahi ʻe Sihova ʻa e faʻahinga ko ia ʻoku nau fakahāhā ʻa e houngaʻia loto-moʻoni ki he tokonaki kuo fai ʻe Sihova maʻá e faʻahinga ʻo e tangatá fakafou ʻi he feilaulau ʻa hono ʻAlo ʻofaʻangá, ʻa Sīsū Kalaisi.