Ngāue Mahuʻinga Tahá
1. Ko e hā e ngaahi feilaulau ʻe ueʻi kitautolu ke faí ʻi heʻetau houngaʻia lahi ki he ngāue fakafaifekaú?
1 Ko e hā ʻoku fakaʻaiʻai maʻu ai pē kitautolu ke tau tuku taha hotau taimí, iví mo e koloá ki he ngāue fakafaifekaú? Koeʻuhí ʻoku ʻikai ha ngāue ʻe toe mahuʻinga lahi ange ai! Ko e fakakaukau atu ki heʻene ʻaonga lahí ʻe fakalahi ai ʻetau holi ke kau ʻi he ngāue ko eni ʻa ia ʻe ʻikai ʻaupito ke toe faí.—Ng. 20:24.
2. ʻOku anga-fēfē tokoni ʻetau malangá ki hono fakamāʻoniʻoniʻi ʻa e huafa lahi ʻo Sihová?
2 Fakamāʻoniʻoniʻi ʻa e Huafa ʻo Sihová: Ko e ngāue fakamalangá ʻoku fakamamafaʻi ai ko e Puleʻanga ʻo Sihova ʻia Kalaisi Sīsuú te ne fetongi ʻa e founga-pule fakaetangata kotoa pē pea ʻomai ʻa e fakaleleiʻanga ki he palopalema kotoa pē ʻa e faʻahinga ʻo e tangatá. (Mt. 6:9, 10) ʻOku fakalāngilangiʻi ʻa Sihova ko e toko taha pē ia te ne fakahaofi kitautolu mei he puké pea mo e maté. (Ai. 25:8; 33:24) Koeʻuhi ʻoku tau fataki hono huafá, ko e niʻihi kehe ʻoku nau sio mai ki hotau ʻulungaanga leleí mo ʻetau faivelengá te nau fakalāngilangiʻi nai ai ia. (1 Pita 2:12) He meʻa fakafiefia ē kia kitautolu ke ʻai ke ʻiloa ʻi he māmaní kotoa ʻa e huafa ʻo e ʻEiki Hau ko Sihová!—Sāme 83:18.
3. Ko e hā ʻa e ngaahi tāpuaki ʻoku hoko ki he faʻahinga ʻoku nau tali lelei ʻa e pōpoaki ʻo e Puleʻangá?
3 Fakahaofi Moʻui: Ko Sihová ʻoku “ʻikai te ne finangalo ke ʻauha ha taha, ka ke aʻusia ʻa e fakatomala ʻe he kakai kotoa pe.” (2 Pita 3:9) Neongo ia, ʻi he ʻikai ha taha ke ne akoʻi kinautolú, ʻe ako fēfē leva ʻa e kakaí ki he meʻa ʻoku vakai ki ai ʻa Sihova ko e tōʻonga totonu pe taʻetotonú? (Siona 4:11; Loma 10:13-15) ʻI he taimi ʻoku tali ai ʻe he faʻahinga tāutaha ʻa e ongoongo leleí, ʻoku fakaleleiʻi ai ʻa e tuʻunga ʻo ʻenau moʻuí ʻi heʻenau liʻaki ʻa e ngaahi tōʻonga koví. (Mai. 4:1-4) ʻIkai ko ia pē, ʻoku nau maʻu ai ʻa e ʻamanaki fakafiefia ki he moʻui taʻengatá. Ko ʻetau malanga mo e faiako longomoʻuí ʻoku fakahaofi ai kitautolu mo e faʻahinga ʻoku fanongo kia kitautolú. (1 Tim. 4:16) Ko ha ngafa lāngilangiʻia lahi ē ʻoku tau maʻu ʻi he ngāue mahuʻinga taha ko ení!
4. Ko e hā ʻoku totonu ai ke tau kau longomoʻui ʻi he ngāue malangaʻi ʻo e Puleʻangá mo e ngaohi-ākongá?
4 Kuo vavé ni ke ʻomai ʻe he mamahi lahí ha ngataʻanga taʻeʻamanekina ki he māmani taʻemāʻoniʻoni ko ení. Ko e faʻahinga ʻoku ʻi he tafaʻaki ʻa Sihová te nau hao. Ko ia ai, ko e malangá mo e ngaohi ākongá ʻa e ngāue fakavavevave, mahuʻinga mo ʻaonga taha ʻoku fakahoko he ʻaho ní. Tau fakamuʻomuʻa ia ʻi heʻetau moʻuí!—Mt. 6:33.