Tohi mei he Kulupu Pulé
Siʻi Kaungā Fakamoʻoni ʻa Sihova:
Ko ha kakai monūʻia moʻoni ē ko kitautolu ʻi hono fataki ʻa e huafa ʻo e Hau Fakalevelevá, ʻa Sihova! Ko e huafa ko iá ʻoku taʻengata, taʻealapulia, pea taʻealafakatataua! Ko Sihova naʻá ne ʻomai kia kitautolu ʻa hono huafá ke tau fatakí, pea tautefito ʻi he 1931, naʻe uiʻaki ai kitautolu ʻa e huafa makehe ko iá. (Ai. 43:10) ʻOku tau laukauʻaki hono fakahaaʻi kitautolu ko e Kau Fakamoʻoni ʻa Sihová.
ʻOku feinga taʻetuku ʻa e Tēvoló ke toʻo ʻosi ʻa e huafa ʻo e ʻOtuá. ʻI he malumalu ʻo ʻene pulé, ʻoku talitekeʻi ai ʻe he ngaahi puleʻangá ʻa e huafa ʻo Sihová. Ko Pāpilone ko e Lahi, ʻa e ʻemipaea ʻo e lotu loí ʻi he māmaní, ʻoku fehiʻa ʻi he huafa fakaʻotuá pea kuó ne toʻo ia mei he ngaahi liliu Tohi Tapu lahi. ʻI hono kehé, naʻe fakahīkihikiʻi ʻe Sīsū ʻa e huafa ʻo ʻene Tamaí, ʻo fakamuʻomuʻa ia ʻi he lotu ʻa e ʻEikí ʻa ia naʻá ne akoʻi ki hono kau muimuí. Naʻá ne pehē: “Ko ia ke pehe ni haʻamoutolu lotu: Ko ʻemau Tamai ʻoku ʻi Hevani, ke tapuhā ho Huafa.” (Mt. 6:9) Ki mui ai, ʻi heʻene lotu fakamātoato ki heʻene Tamaí, naʻá ne pehē: “Kuo u fakamahino ho huafa ki he kakai naʻa ke foaki kiate au mei mamani.” (Sione 17:6) ʻI he muimui ki he faʻifaʻitakiʻanga lelei ʻa Sīsuú, ʻoku tau fakapapauʻi ange ai ʻi he toe taimi ke fanongonongo longomoʻui ʻa e huafa ʻo Sihová ʻi he māmaní kotoa.
Ko e konga tohi fakataʻu ki he 2009, “Faifakamoʻoni fakaʻāuliliki ki he ongoongo lelei,” ʻoku ueʻi ai kitautolu ke fakahoko kakato ʻetau ngāue fakafaifekaú. (Ng. 20:24) ʻOku ʻikai ha veiveiua kuo tāpuakiʻi lahi ʻe Sihova ʻetau ngaahi feinga ʻi he taʻu fakangāue ko eni kuohilí. Naʻe fai ha fakamoʻoni lahi fakaʻulia ʻi māmani lahi ki he kolōlia mo e lāngilangiʻia ʻo e huafa Sihová. Ko ha tumutumu foʻou ʻo e kau malanga ʻe toko 7,313,173 naʻa nau kau fakataha ʻi he malanga ki he kakai kotoa pē, pea pehē ki hono akoʻi ʻa e faʻahinga loto-totonu ʻoku nau kumi ki ha fakaleleiʻanga ki he ngaahi palopalema lahi ʻoku nau fehangahangai fakaʻaho mo iá. Ko ha kau maʻu Fakamanatu ʻe toko 18,168,323 ʻo e pekia ʻa Kalaisí ʻoku fakapapauʻi ai ko e laui miliona lahi ange te nau ui nai ki he huafa ʻo Sihová ki muʻa ke ngata ʻa e fokotuʻutuʻu fulikivanu ko ení.
Lolotonga hono kei fakaʻatā ʻe Sihová, te tau hokohoko atu hono malangaʻi ʻa e ongoongo lelei ʻo e Puleʻangá ʻi he faivelenga, ʻo ngāueʻaki ʻa e founga kotoa pē ʻe ala lavá ke aʻu ai ki he kakai ʻi hotau feituʻu ngāué. (Mt. 24:14; Mk. 13:10) ʻI he matapā ki he matapaá, pe ʻi he halá, ʻi he faitohí mo e faifakamoʻoni telefoní, pe ʻikai ʻi he founga anga-mahení, ʻofa ke tau feinga ke ʻai ke ʻiloa ʻa e huafa mo e taumuʻa ʻa Sihová ki he kakai tokolahi taha te tau ala lavá.
ʻOku tau maʻu ʻa e ʻuhinga kotoa ke tui ai kuo vavé ni ke ngāue mai ʻa Sihova ke fakamāʻoniʻoniʻi ʻa hono huafá. (Isi. 36:23) ʻOku tuʻunuku vave mai ʻa e taimi ʻa ia ʻe fakasīlongoʻi ai ʻa e faʻahinga kotoa ʻoku nau fakaongoongokoviʻi iá. Ko ha ʻaho fakafiefia moʻoni ia ki he kau sevāniti mateaki kotoa pē ʻa Sihová, ʻa ia kuo nau ʻai ke ʻiloa ʻa Hono huafá pea pouaki ʻa hono tuʻunga-hau fakalevelevá!
Ko e tokanga ʻofa ʻa Sihova ki hono kakaí naʻe hā mahino ia ʻi he ngaahi Fakataha-Lahi Fakavahe mo Fakavahaʻapuleʻanga “Hanganaki Leʻo!” naʻe fai ʻi he feituʻu lahi ʻo e māmaní ʻi he 2009. Ko e ngaahi fakataha-lahi ko iá naʻe fakamoʻoniʻi ko ha maka-maile ia ʻi hotau hisitōlia fakateokalatí, ʻo ueʻi ai kitautolu ke tau lāuʻilo lahi ange ki he fiemaʻu ke tokanga ki he ʻaho ʻo Sihová.—Mk. 13:37; 1 Tes. 5:1, 2, 4.
Ko e moʻoni, ʻoku failelei ʻa Sihova kia kitautolu; ʻokú ne fakafonu hotau lotó ʻaki ʻa e fiefia. ʻOkú ne fakatokoto kitautolu ʻi he ngoue lau maʻuiʻui pea tataki kitautolu ki he ngaahi vai fakanonga.—Sāme 23:1, 2; 100:2, 5.
Fakapapauʻi ange ʻe tāpuakiʻi hokohoko kimoutolu ʻe Sihova ʻi hoʻomou hanganaki femoʻuekina ʻi he ngāue ʻo e Puleʻangá ʻi he ngaahi māhina ʻoku tuʻu mei muʻá!
ʻOku ʻoatu heni ʻa e ʻofa māfana faka-Kalisitiane ki heʻetau fetokouaʻaki ʻi māmani lahí,
Ko homou fanga tokoua,
Kulupu Pule ʻa e Kau Fakamoʻoni ʻa Sihová