Kuo Pau Ke Tau Faivelenga Ai Pē ʻi he Ngāue Fakafaifekaú
1 ʻI he taʻu taki taha talu mei he 1992, kuo līʻoa atu ai ʻe he Kau Fakamoʻoni ʻa Sihová ʻa e houa laka hake ʻi he taha pilioná ki he ngāue malangaʻi ʻo e Puleʻangá mo e ngaohi-ākongá ʻi māmani lahi. He fiefia ē ko kitautolu ke ʻi ai ʻetau kiʻi kaunga ki ha ngāue fisifisimuʻa pehē!—Mt. 28:19, 20.
2 Ko e moʻoni, ko e fakamālō mo e fakahīkihiki kotoa ʻoku ʻave ia kia Sihova, ʻa ia ʻokú ne poupouʻi kitautolu ʻi heʻetau ngāue fakafaifekaú he lolotonga ʻo e “ngaahi taimi faingataʻa” ko ʻení. (2 Tim. 3:1) Ko e hā ʻoku fiemaʻu meiate kitautolu kae hokohoko atu ʻetau kau faivelenga ki he ngāue mahuʻinga ko ʻení?
3 ʻUhinga ki he Faivelengá: Ko e ʻofa lahi ki he ʻOtuá mo e kaungāʻapí, pea pehē ki he holi fakamātoato ke moʻuiʻaki ʻetau fakatapuí, ʻoku ueʻi ai kitautolu ʻi heʻetau ngāue ki he Puleʻangá. (Mt. 22:37-39; 1 Sione 5:3) ʻOku ueʻi kitautolu ʻe he ʻofá ke fai ha ngaahi feilaulau koeʻuhí ke lava ai ke tau kau kakato ki he ngāue fakamalangá.—Luke 9:23.
4 Feinga ke Faivelenga Ai Pē: ʻOku fai ʻe hotau fili ko e Tēvoló ʻa e feinga lahi ke fakavaivaiʻi ʻetau faivelenga ʻi he ngāue fakafaifekaú. Ko e taʻemahuʻingaʻia ʻa e kakai ʻi hotau feituʻu ngāué, ko e ngaahi fakahohaʻa ʻa e māmani ko ʻení, ko e ngaahi tenge ʻo e moʻui fakaʻahó, mo e hohaʻa ki he hōloa ʻo ʻetau moʻui leleí, ʻa e niʻihi ʻo e ngaahi meʻa ʻokú ne ngāueʻaki ʻi he feinga ke fakalotosiʻiʻi kitautolu.
5 Ko ia ai, kuo pau ke tau feinga mālohi ke tau kei faivelenga ai pē. ʻOku mahuʻinga ke tau fakatupulekina ʻa ʻetau “ʻuluaki ʻofa.” ʻOku kau ki ai ʻa e lau maʻu pē mo fakalaulauloto ki he Folofola ʻa e ʻOtuá, ko e Tohi Tapú, pea mo ʻetau tali ʻa e ngaahi tokonaki fakalaumālie kotoa pē ʻa e “tamaioeiki agatonu mo boto.”—Fkh. 2:4; Mt. 24:45, PM; Sāme 119:97.
6 Hangē ko ia ʻoku fakahaaʻi mahino mai ʻi he ngaahi kikite Fakatohitapú, ʻoku ofi ʻaupito ʻa e ʻaho ʻo Sihova ki hono fakaʻauha ʻo e kau fakaʻotuamaté. (2 Pita 2:3; 3:10) ʻI hono mahinoʻi lelei iá, ʻofa ke tau feinga mālohi ke faivelenga ai pē ʻi he ngāue fakafaifekaú, ʻo kau kakato ʻi he ngāue ʻoku lolotonga fai he taimí ni ko hono malangaʻi ʻo e Puleʻangá mo e ngaohi-ākongá ʻi māmani lahi!