Ko ha Tohi mei he Kulupu Pulé
Siʻi Kaungā Kau Fakamoʻoni ʻa Sihova:
He ngaahi taimi fakafiefia moʻoni eni! Pea he fiefia moʻoni ē ʻoku tau maʻú! ʻOku mau fiefia moʻoni ʻi he ngāue fakataha mo kimoutolú siʻi fanga tokoua mo e fanga tuofāfine—ʻo “uouangataha,” hangē ko e laú—ʻi hono fai ʻo e fakamoʻoni lahi taha ʻi ha toe taimi ki heʻetau Tamai fakahēvaní, ʻa Sihova.—Sef. 3:9; Sione 14:12.
Ko ʻetau fiefia ʻi he tauhi kia Sihová ʻoku ʻikai ʻuhinga ai ia ʻoku ʻikai haʻatau ngaahi faingataʻa mafatukituki. Lolotonga ʻa e taʻu fakangāue kuohilí, ko e niʻihi ʻo kimoutolu naʻa mou tofanga ʻi he ngaahi faingataʻa ko e ola ʻo ha ngaahi mofuike, ngaahi tāfea, ngaahi afā, mo e ngaahi fakatamaki fakanatula kehe fakamanamana ki he moʻuí. (Mt. 24:7) ʻOku fāinga fakaʻaho ʻa e tokolahi mo e ngaahi ola fakatupu vaivai ʻo e mahakí mo e taʻumotuʻá. Ko e kotoa ʻo kitautolú kuo pau ke tau fekuki mo e fakautuutu ai pē ʻo e “langa.” (Mt. 24:8) ʻI he ngaahi fonua lahi, kau ai ʻa ʻAmīnia, ʻElitilia, Kōlea Tonga, ʻoku tuku pilīsone ai ʻa e tokolahi hotau fanga tokouá koeʻuhi ko ʻenau tuí.—Mt. 24:9.
Ko e hā kuó ne tokoniʻi kitautolu ke tauhi ha fakakaukau fakatuʻotuʻalelei neongo ʻa e ngaahi faingataʻa ko ení? Ko e tohi fakataʻu ki he 2010 kuó ne fakamanatu mai kia kitautolu ʻa e moʻoniʻi meʻa mahuʻinga ʻe taha: ‘Ko ʻofá ʻokú ne ʻukuma ʻi he meʻa kotoa pe. Ko ʻofá ʻoku ʻikai kaʻanga ia ʻi ha taimi.’ (1 Kol. 13:7, 8) ʻIo, ko ʻetau feʻofaʻakí—pea pehē ki heʻetau ʻofa kia Sihová—ʻokú ne fakaivia kitautolu ke tau ʻūkuma lavameʻa.
Ko e tokolahi ko ia ʻoku nau taukaveʻi ko e kau Kalisitiané ʻoku nau fakatumutumu ʻi he lahi mo e tuʻumaʻu ʻo ʻetau ngāue fakamalangá. Neongo te nau taʻelototatau nai mo ʻetau ngaahi tuí mo ʻetau ngaahi akonakí, ko e niʻihi kuo aʻu ʻo ueʻi ke nau fakamatala: “Ko kimoutolú ʻoku mou fai ʻa e ngāue ʻoku totonu ke mau faí!” Ko e hā ʻa e moʻoniʻi meʻa ʻe taha ʻokú ne fakamafeia ʻa e Kau Fakamoʻoni ʻa Sihová ke hokohoko atu ʻa e malanga ʻi he ʻaho ki he ʻahó? Ko e toe tali pē ki aí ko e ʻofá. Hangē ko ʻetau Tamai fakahēvaní, ʻoku ʻikai ke tau loto ke ʻauha ha taha. (2 Pita 3:9) Ko ʻetau holi ko ia ke aʻusia ʻe he tokotaha kotoa pē ʻa e fakatomalá ʻoku tapua atu ia ʻi he tumutumu foʻou ʻo e kau malanga ʻe 7,508,050 naʻe lēkooti lolotonga ʻa e taʻu fakangāue kuohilí. Ko hai ha toe kautaha fakalotu kuo kau longomoʻui atu ai ha kau faifekau tokolahi pehē fau ʻi he fakafitefitaʻa ko eni ʻi he ʻofa, ʻo pole loto-lelei ke tokoniʻi fakalaumālie ʻa e niʻihi kehé?
ʻOku tau loto-toʻa ʻi he sio ki hono fakahoko hokohoko ʻo e kikite naʻe lēkooti ʻe ʻAiseá: “ʻE hoko ʻo pehe ʻi he kuonga ʻamui, ʻe fokotuʻu ʻa e moʻunga ʻo e fale ʻo Sihova ko e ʻulu ʻo e ngaahi moʻunga, pea ʻe mahiki hake ʻi he ngaahi foʻi maʻolunga; pea ʻe tafe ki ai ʻa e ngaahi kakai kotoa pe.” (Ai. 2:2-4) ʻOku ʻi he lotolotonga ʻo e fuʻu kakai tokolahi ko ia ʻoku tafe hake ki he fale ʻo Sihová ʻa e toko 294,368 ʻa ia naʻe papitaiso lolotonga ʻa e taʻu fakangāue kuohilí. ʻOku tau talitali lelei ʻa e faʻahinga mahuʻinga ko ení ki hotau fāmilí. ʻOfa ke ueʻi kitautolu ʻe heʻetau ʻofa faka-Kalisitiané ke hokohoko atu ʻetau tokoniʻi kinautolu pe paleʻi ʻa e ngaahi ʻoho ʻa hotau fili ko Sētane ko e Tēvoló.—1 Pita 5:8, 9.
Ko e tumutumu ʻi ha toe taimi ʻo e kau maʻu Fakamanatu ʻe toko 18,706,895 ʻi he Tūsite, Maʻasi 30, 2010, ʻoku fakahaaʻi ai ʻa e ala malava ki he laui miliona lahi ange ke kau fakataha mo kitautolu ʻi heʻetau lotu kia Sihová. He fiefia ē ʻe lava ke tau maʻú he kuo teʻeki ke fakangata ʻe Sihova ʻa e fokotuʻutuʻu fulikivanu ko eni ʻo e ngaahi meʻá! ʻI he lolotongá ni, ʻoku tokoniʻi kitautolu ʻe heʻetau ʻofá ke hokohoko atu ke kātaki.—2 Tes. 3:5.
Ko e ngaahi Fakataha-Lahi Fakavahe “Nofo Ofi Ai Pē kia Sihova!” ʻa ia ko e lahi tahá naʻe fakahoko ʻi he kotoa ʻo e māmaní ʻi he 2010, naʻe fakaivia ai hotau vahaʻangatae mo ʻetau Tamai fakahēvaní, ʻa Sihova. He moʻoni ē ko e ngaahi lea ʻa e tokotaha-tohi-sāmé: “Monuʻiaā ka ko e kakai ʻoku ʻotua ʻaki ʻa Sihova!” (Sāme 144:15) Neongo pe ko e hā ʻoku tuku tauhi mai ʻi he kahaʻú, ʻoku tau ongoʻi falala-pau kapau ʻe ʻi hotau tafaʻakí ʻa Sihova, ʻe halaʻatā ha faʻahinga meʻa te tau manavahē ki ai. (Sāme 23:4) Kuo vavé ni ke hanga ʻe Sihova, fakafou ʻi hono ʻAló, ʻo “holoki ʻa e ngaahi ngaue ʻa e Tevolo.” (1 Sione 3:8) Ko e moʻoni, ʻoku tau fakaʻamua ke fai mo hoko mai ʻa e ʻaho ko iá! Ka ʻi he lolotongá ni, ʻoku lahi ʻa e ngāue ke tau femoʻuekina ki aí.—1 Kol. 15:58.
Mou ʻiloʻi pau ʻoku “taʻemotu” ʻemau takua maʻu pē kimoutolu ʻi heʻemau ngaahi lotú. (Loma 1:9) ʻOfa ke mou “tauhi ai kimoutolu ʻi he ʻofa ʻa e ʻOtua; ʻo mou nofoʻaki tali ki he meesi ʻa hotau ʻEiki ko Sisu Kalaisi, ʻo aʻu ki he moʻui taʻengata.”—Siu. 21.
ʻOku mau ʻofa atu kia kimoutolu kotoa!
Homou fanga tokoua,
Kulupu Pule ʻo e Kau Fakamoʻoni ʻa Sihová