Ngaahi Hokosia mei he 2012 Yearbook

NOAUE

Peesi 108, palakalafi 2

Ko e fanga tokouá mo e fanga tuofāfiné naʻa nau faʻa ō ki he ʻapi ʻo Torkel mo Helga. Naʻa nau fetalanoaʻaki maʻu pē ki he moʻoní, pea naʻe ʻoange heni ʻa e fakalototoʻa lahi ki he kau malanga foʻou mo kei siʻí. Ko e kau malanga ʻi Bergen naʻa nau faʻa ō ʻo malanga ʻi he ngaahi vahefonua takatakaí ʻi he vaka mo e loli. ʻI he hili iá, naʻa nau fakatahataha ke talanoa ki he ngaahi hokosiá pea maʻu ha feohi fiefia.

Peesi 109, palakalafi 2

Ko e uaifi ʻo Olaf, ko Esther, naʻe puke ʻi he langa-huí pea naʻá ne heka saliote. Neongo ia, ko hona ʻapí ko ha feituʻu fakatahatahaʻanga manakoa ia ki he fanga tokouá mo e fanga tuofāfiné. Naʻe faʻa fai ʻe Olaf ʻa e feimeʻatokoní, ʻa ia naʻe ʻiloa ia ʻi heʻene faʻa kuki ʻa e kapakauʻi moa ifo. Ka ko e ngaahi fakatahataha fakalaumālie fakatupu langa haké, ngaahi fetalanoaʻaki Fakatohitapu fakamānakó, mo e ngaahi vaʻinga fehuʻi Fakatohitapu ʻi he ʻapi ʻo Skau ʻoku kei manatuʻi ʻe he Kau Fakamoʻoni taʻumotuʻa tokolahi. “Ne ʻikai ʻaupito ke mau mavahe taʻemaʻu ha loto-fiefia mei he ʻapi ʻo Skau,” ko e manatu ia ʻa Ragnhild Simonsen.

LUANITĀ

Peesi 181, palakalafi 1

ʻOku manatu ʻa Tokoua Tshiteya: “ʻI he ʻomai mei he ngaahi pilīsoné ʻa e fanga tokoua mo e fanga tuofāfine ʻi he ngaahi feituʻu kehé ki he pilīsone tefito ʻi Kigali, naʻa nau lea fefakafeʻiloaki ʻaki ʻi he fiefia, ʻo pehē ‘Komera!’ ʻa ia ʻoku ʻuhingá ko e ‘Loto-toʻa!’ ʻI he fanongo mai ʻa e taha ʻo e kau kaʻate ʻo e pilīsoné ki he lea fakafeʻiloaki ko ení, naʻá ne tali fakafepaki mai: ‘Ko e kakai ko kimoutolú ʻoku mau sesele! ʻE lava fēfē ke loto-toʻa ʻa e kakaí ʻi he pilīsoné?’”