Ngāueʻaki ha Fakalea ʻOku Ola Leleí
1. Ko e hā ʻoku lava ke tau ako mei he ngaahi fakalea kehekehe ʻa e muʻaki kau Kalisitiané?
1 Naʻe malangaʻi ʻe he muʻaki kau Kalisitiané ʻa e ongoongo leleí ki he kakai ʻi he ngaahi anga fakafonua mo e lotu kehekehe. (Kol. 1:23) Neongo ko e pōpoakí naʻe tatau—Puleʻanga ʻo e ʻOtua—ko e fakaleá naʻe kehekehe ʻo fakatatau ki he kau fanongó. Ko e fakatātaá, ʻi he taimi naʻe lea ai ʻa Pita ki he kau Siu ʻa ia naʻa nau maʻu ha fakaʻapaʻapa loloto ki he Tohi Tapú, naʻá ne kamata lave ki he tohi ʻa e palōfita ko Sioelí. (Ngā. 2:14-17) ʻI he tafaʻaki ʻe tahá, fakatokangaʻi ʻa e founga naʻe fakaʻuhinga ai ʻa Paula mo e kau Kalisí ʻa ia ʻoku lēkooti ʻi he Ngāue 17:22-31. ʻI he ʻahó ni, ko e kakai ʻi he ngaahi feituʻu ngāue ʻe niʻihi ʻoku nau fakaʻapaʻapaʻi ʻa e Tohi Tapú, pea ʻoku lava ke tau lave tauʻatāina ki he Tohi Tapú ʻi heʻetau ngāue mei he fale ki he falé. Kae kehe, ʻoku fiemaʻu nai ke tau fakapotopoto ange ʻi heʻetau lea ki he faʻahinga ʻoku ʻikai ke nau mahuʻingaʻia ʻi he Tohi Tapú pe ʻi he lotú pe kau ki ha lotu ʻikai Kalisitiane.
2. ʻE lava fēfē ke tau ngāueʻaki ʻa e tuʻuaki ʻo e tohí ke tokoniʻi ʻa kinautolu ko ia ʻoku nau houngaʻia ʻi he Tohi Tapú pea pehē kia kinautolu ʻoku ʻikai houngaʻiá?
2 Ngāueʻaki Ola Lelei ʻa e Tuʻuaki ʻo e Tohí: Ko e ngaahi tuʻuaki ʻo e tohí ki he taʻu fakangāue ko ení ʻe liliu ia ʻi he māhina ʻe ua kotoa pea ʻe fakamamafaʻi ai ʻa e ngaahi makasiní, ngaahi tulekí mo e ngaahi polosiuá. Neongo kapau ko e kakai fakalūkufua ʻi hotau feituʻu ngāué ʻoku ʻikai ke nau mahuʻingaʻia ʻi he Tohi Tapú, ʻe kei lava ke tau ʻoatu ha kupu ʻokú ne feau ʻenau ngaahi fiemaʻu. ʻE ʻikai nai ke tau lau ha konga tohi ʻi he ʻuluaki ʻaʻahí pe lave hangatonu ki he Tohi Tapú, ka ʻi he hā mai ha mahuʻingaʻia ʻe lava ke tau toe foki mo ha taumuʻa ke tokoniʻi ʻa e tokotaha-ʻapí ke langa hake ʻene tuí ki he Tokotaha Fakatupú mo ʻene Folofola fakamānavaʻí. ʻI he tafaʻaki ʻe tahá, kapau ʻoku tau malanga ʻi he feituʻu ʻoku houngaʻia ai ʻa e kakaí ʻi he Tohi Tapú, ʻe lava ke tau ngāueʻaki ʻa e ʻū tohi mo ha fakalea ʻoku tapua atu ai eni. Ko hono moʻoní, ʻe lava nai ke tau tuʻuaki ʻa e tohi Akoʻi ʻe he Tohi Tapú pe ko e ongo polosiua Fanongo ki he ʻOtuá pe Fanongo ki he ʻOtuá pea Moʻui Taʻengata ʻi ha faʻahinga taimi pē, tatau ai pē pe ko e hā ʻoku tuʻuaki he māhina ko iá. Ko e meʻa tefitó ke ngāueʻaki ha fakalea ʻoku ola leleí.
3. ʻI he founga fē ʻoku hangē ai ʻa e loto ʻo e kakai ʻi hotau feituʻu ngāué ha kelekelé?
3 Teuteuʻi ʻa e Kelekele: Ko e loto ʻo e tangatá ʻoku hangē ia ha kelekelé. (Luke 8:15) Ko e kelekele ʻe niʻihi ʻoku fiemaʻu ke teuteuʻi lahi ange ki muʻa ke lava ʻa e moʻoni ʻo e Tohi Tapú ʻo faiaka pea tupu. Naʻe lavameʻa ʻa e kau ʻevangeliō ʻi he ʻuluaki senitulí ʻi heʻenau tō ʻi he faʻahinga kehekehe ʻo e kelekelé pea naʻe ʻomai heni ʻa e fiemālie mo e fiefia kiate kinautolu. (Ngā. 13:48, 52) ʻE lava ke tau hokosia ha lavameʻa tatau ʻaki ʻetau tokanga ki heʻetau fakaleá.