Foki ki he Faʻahinga Kuo Fie Fanongó
1 Ko e tokolahi ʻiate kitautolu kuo nau lavameʻa ʻi hono tufaki ʻa e ngaahi makasiní mo e ngaahi polosiuá. ʻOku mahuʻinga ke tau foki mo feinga ke fakalanga ha toe fie fanongo lahi ange. Ko ʻetau lavameʻa ʻi hono fai ʻa e meʻa ní ʻe makatuʻunga nai ʻi he lahi ʻo ʻetau teuteu ki muʻa ke tau fai ha toe ʻaʻahí.
2 Manatuʻi ʻoku loto-hohaʻa ʻa e tokolahi taha ʻo e kau talavoú ʻo fekauʻaki mo e ngaahi meʻa tatau pē ʻoku tokanga ki ai ʻa e kakai lalahí. ʻOku ʻi he ongo tatau ʻo e Ko e Taua Leʻo ʻo ʻEpeleli mo Mē ʻa e ngaahi kupu ʻoku nau vakai ki he ngaahi palōpalema lolotonga ʻa ia ʻoku tokanga ki ai ʻa e kau talavoú mo e kau matuʻotuʻá fakatouʻosi. ʻOku tokonaki mai ʻe he ngaahi kupu ko ʻení ha ʻiloʻilo ʻe malava ke tokoni ki he kau talavoú, pea pehē pē ki heʻenau ngaahi mātuʻá, ke nau maʻu ʻa e mahino ʻo kau ki he meʻa ʻoku mahuʻinga moʻoni ʻi he moʻuí.
3 Kapau naʻá ke tuku ʻa e “Taua Leʻo” ʻo Mē 1, te ke fakaangaanga nai ke ke toe ʻaʻahi ʻaki hono tuʻuaki ʻa e tatau ʻo Sune 1 ʻi hano maʻu mai. Te ke pehē nai:
◼ “Ko e tatau fakamuimui naʻá ku tuku maʻaú naʻe fakaeʻa ai ʻa e ngaahi kupu naʻe fakahā ai ʻoku vavé ni ke tuku ʻa e ngaahi taú ʻi he māmaní. Ko e kupu ko ʻeni ʻi he Taua Leʻo foʻoú ni ʻokú ne fakamatalaʻi ko e kau laumālie anga-fulikivanú ko e faʻahinga ia ʻoku nau pouaki ʻa e ngaahi faʻahinga palōpalema ko ʻení. ʻOku ou tui te ke saiʻia ʻi he meʻa ʻoku lave ki ai ʻi he makasiní.”
4 Te ke fili nai ke tuʻuaki ha polosiua ʻo ngāueʻaki ʻa e founga lea ko ʻení:
◼ “Naʻá ku fiefia ʻaupito ʻi heʻeta fetalanoaʻaki fuonounou ko ē ʻo kau ki he kahaʻu fekauʻaki mo e māmaní. ʻOku lava ke ke fakaʻuta atu pe ʻe fēfē ʻa e moʻui ʻi he māmaní ʻi he taimi ʻe fakangata ai ʻe he ʻOtuá ʻa e anga-fulikivanú mo e faingataʻá? [Fakahā ʻa e fakatātā ʻi he peesi 29 ʻo e polosiua ko e Ko e Puleʻanga Te ne ʻOmai ʻA e Palataisi.] Fakatokangaʻi ko e ngaahi veesi Tohi Tapu kotoa ʻi he peesi 29 ʻoku nau fakamatalaʻi ʻa e ngaahi tāpuaki ʻe fakahoko mai ʻe he Puleʻanga ʻo e ʻOtuá. [Fili ha veesi pē ʻe taha pea ke lau fakahangatonu pē ia mei he polosiuá.] ʻOku ou fie tuku ʻeni maʻau.”
5 ʻI hoʻo foki ki aí, mahalo te ke ʻilo ai kuo maʻu ʻe he toko taha ʻapí ʻene ngaahi tohi fakalotu pea ʻokú ne pehē ʻoku feʻunga pē ia. Te ke lea ʻo pehē nai:
◼ “Tatau ai pē pe ko e lotu fē ʻoku tau kau ki aí, ʻoku uesia kitautolu kotoa pē ʻe he ngaahi faingataʻa tatau pē—ko e fai hiá, mahaki fakatuʻutāmakí, tokanga ki he ʻātakaí—ʻikai ko ia? [Tuku ke ne tali.] ʻOkú ke fakakaukau ʻoku ʻi ai ha fakaleleiʻanga moʻoni ki he ngaahi palōpalema ko ʻení? [Lau ʻa e 2 Pita 3:13.] ʻOku hā ʻa e fakamatala ʻo kau ki he taumuʻa ʻo ʻemau ngaahi tohí ʻi he peesi 2 ʻo e Ko e Taua Leʻó. [Lau ha sētesi ʻe taha pe ua kuo ʻosi filifili.] Ko e kakai tokolahi ʻoku ʻikai ko e Kau Fakamoʻoni ʻa Sihová ʻoku nau fiefia ʻi hono lau ʻa ʻemau ngaahi tohí koeʻuhi ko e pōpoaki fakatupu ʻamanaki ʻoku ʻi aí, ʻa ia ʻoku makatuʻunga mei he Tohi Tapú.” Kapau ʻoku lelei ʻa e anga ʻo e tali ʻa e toko taha ʻapí, fakamatala ki ai ʻa ʻetau polokalama ako Tohi Tapú.
6 Te ke ngāueʻaki nai ʻa e founga lea ko ʻení:
◼ “ʻI heʻeku ʻi heni fakamuimuí, naʻá ta talanoa ʻo fekauʻaki mo e ngaahi ʻamanaki ki he kahaʻu ʻo hotau māmaní. Ko e hā ʻa hoʻo fakakaukau ʻo fekauʻaki mo e fakamatala ko ʻení? [Lave ki ha ongoongo lolotonga ʻoku fai ki ai ʻa e tokangá.] ʻI he fanongo ʻa e kakaí ki he ngaahi meʻa peheé, ʻoku fakatupu ʻiate kinautolu ke nau fifili pē ko e hā ʻoku hoko pehē ai ʻa e māmaní, ʻikai ko ia? ʻOku mau tui ko e ngaahi meʻa peheé ʻoku nau fakahaaʻi ʻoku tau moʻuí ni ʻi he ‘ngaahi ʻaho fakaʻosi’ kuo kikiteʻi ʻi he Tohi Tapú ʻi he 2 Tīmote 3:1-5.” ʻI he ʻosi hono lau ʻo e ngaahi meʻa tuʻu ki muʻa ʻe niʻihi, te ke ʻeke nai pē kuó ne sio ki ha kakai ʻoku feʻunga mālie mo e fakamatala ko iá. Hoko atu ʻaki ha fetalanoaʻaki ʻi he taha ʻo e ngaahi kaveinga tokoni ʻi he peesi 234-238 ʻi he tohi Reasoning.
7 Kapau te tau teuteu lelei mo fakahā ʻa e holi moʻoni ke tokoni, ʻoku lava ke tau tui pau ʻe fanongo ʻa e faʻahinga ʻoku loto-faitotonú.—Sione 10:27, 28.