Toe ʻAʻahi ki he Faʻahinga Naʻe Tuku Ai ʻa e Makasini mo e Polosiua
1 Naʻe fakalototoʻaʻi ʻe Sīsū ʻa hono kau muimuí ke nau ngāue ke ngaohi ākonga. (Mt. 28:19) ʻOku ʻuhinga iá ʻoku ʻi ai mo e meʻa lahi ange ke fai ʻo ʻikai ko e tuku atu pē ʻo e ngaahi tohí; ʻoku totonu ke tau tokoni ki he kakaí ke nau laka ki muʻa fakalaumālie. Pea ke fai ia kuo pau ke tau toe ʻaʻahi ke tokonaki ha toe tokoni kiate kinautolu ʻoku hā mei ai ha fie fanongo.
2 Kapau naʻá ke fakaeʻa ha kupu ʻi ha taha ʻo e ngaahi makasiní ʻi hoʻo ʻuluaki ʻaʻahí, ʻe lelei ke fai ha talanoa ʻo kau ki he kupu tatau pē ʻi hoʻo toe ʻaʻahí:
◼ “ʻI heʻeku ʻaʻahi mai ki muʻá, naʻá ku fakahanga hoʻo tokangá ki he kupu ʻi he Ko e Taua Leʻo (pe Awake!) ʻokú ne tokoniʻi kitautolu ke tau ʻilo ʻa e fie maʻu ke tau fekumi ki he Tohi Tapú. Ko e taumuʻa ʻa e ʻOtuá ki ha kahaʻu lelei ange ki he faʻahinga ʻo e tangatá ʻoku fakatuʻunga ia ʻi heʻene founga-pule Puleʻanga-fakatuʻí. ʻOku fakahā ʻi he Maika 4:3, 4 ʻa ʻene talaʻofa ʻo pehē ʻe hanga ʻe he Puleʻanga ko ʻení ʻo fakangata ʻa e ngaahi taú.” ʻI he ʻosi hono lau ʻa e konga Tohi Tapú, tuʻuaki ʻa e polosiua ko e “Vakai!” pea fakahā ʻa e fakatātā ʻi he takafí. Fai ha fetalanoaʻaki ʻi he ʻuluaki palakalafí mo e ngaahi konga Tohi Tapu ʻoku hā ai kae ʻikai ke hiki fakaʻāuliliki mai ʻi he palakalafi ko iá, ʻo fakatokangaʻi ʻoku kau ai ʻa e tohi Maika 4:3, 4. Fokotuʻutuʻu ki ha toe ʻaʻahi ke hoko atu ʻa e fetalanoaʻakí ʻi he palakalafi 2.
3 Kapau ʻe hā siʻisiʻi mai pē ha fie fanongo mei he toko taha ʻapí pe ʻoku ʻikai ke ʻi ai hano taimi ke fai ai ha fetalanoaʻaki, te ke fakakaukau nai ke hiki hono hingoá ke kau ʻiate kinautolu ʻoku hoko ko hoʻo tufaʻanga makasini paú:
◼ “Koeʻuhi naʻá ke saiʻia ʻi he ngaahi makasini ʻa ia naʻá ku tuku atu maʻau ki muʻá, ʻoku ou fakakaukau te ke saiʻia ʻi he ngaahi makasini fakamuimuí. ʻOku ou tui te ke saiʻia lahi ʻaupito ʻi he kupu ko ʻení.” Fakaeʻa ha kupu ʻokú ke ongoʻi ʻe fakamānako kiate iá. (Ko e tokolahi kuo nau fai ʻa e meʻá ni kuo nau ʻilo ʻoku loto-lelei ʻa e kakaí ke fai ha tokoni fakapaʻanga ki muʻa ia ʻoku teʻeki ai te tau lava ki ai.) Fakahā kiate ia te ke loto-lelei ke toe ʻaʻahi atu mo e makasini hono hokó.
4 Kapau naʻe lau ʻe he toko taha ʻapí ʻa e ngaahi makasiní peá ne fakahāhā ʻokú ne houngaʻia ai, te ke tuʻuaki nai ha tukuhau:
◼ “Koeʻuhi ʻoku hā ʻokú ke saiʻia ʻi he Ko e Taua Leʻó, kuo u fiefia ke ʻomai ʻa e makasini fakamuimuí ʻi he taimi ʻoku aʻu mai aí. Kapau te ke saiʻia ai te u malava ke fokotuʻutuʻu ke ʻomai maʻu pē ʻa e makasiní kiate koe ʻo fakafou mai ʻi he meilí ke fakapapauʻi ʻoku ʻikai te ke hala ʻi ha makasini.” Kapau ʻokú ne fie maʻu ke ne tukuhau ki ai, pea te ke hoko atu: “ʻOku ʻikai ha totongi tuku pau ki heʻemau ngaahi tohí koeʻuhi ko ʻemau ngāué ʻoku poupouʻi ia ʻaki ha tokoni loto-fiefoaki ki ai. Kapau te ke saiʻia ke fai ha tokoni siʻisiʻi ki heʻemau ngāué, te u fiefia ke talitali lelei ia.”
5 Kapau naʻá ke tuku atu ha polosiua pea ʻikai ke ʻi ai ha faingamālie ke fakahāhā ʻa e founga ki hono fai ha akó, teuteu ke fai ia ʻi hoʻo toe ʻaʻahí.
Ko e fakatātā, kapau naʻá ke tuku ʻa e polosiua ko e “Puleʻanga,” kole ki he toko taha ʻapí ke ʻomai ʻene tataú pea ke lea pehē ni:
◼ “Fakatokangaʻi ʻi he peesi 3 ʻa e meʻa ʻokú ne fakahā mai kiate kitaua ʻo kau ki he kaveinga ʻo e pōpoaki naʻe malangaʻi ʻe Sīsū ʻi heʻene ʻi māmaní.” Fai leva ha fetalanoaʻaki nounou ʻi he fakamatala ʻi he peesi 3. ʻEke ki he toko taha ʻapí pe ko e hā ʻa e meʻa ʻokú ne fakakaukau ʻoku fie maʻu ke ne fai kae lahi ange ai ʻene ʻiló. Pea te ke pehē: “ʻOku mahuʻinga ke mahino kiate kitautolu ʻa e ʻuhinga ʻoku fie maʻu lahi ai kiate kitautolu ʻa e Puleʻanga ʻo e ʻOtuá. Te u saiʻia ke toe ʻaʻahi mai ke fai ha fetalanoaʻaki ki he ʻuhinga kuo pau ai ke tau hanga ki he Puleʻanga ʻo e ʻOtuá ko e ʻamanaki pē ia ʻe taha maʻatautolú.”
6 ʻOku tau maʻu ʻa e ngaahi polosiua kehekehe. Fekumi ki ha ngaahi meʻa fakatupu tokanga ʻi ha polosiua ʻokú ke teuteu ke ngāueʻakí. Te ne tokoniʻi koe ke fakalotolahiʻi ʻa kinautolu ʻoku loto-totonú ke ako ʻo toe lahi ange ʻo kau ki he ngaahi meʻa naʻe fekauʻi mai ʻe Sīsuú—Mt. 28:20.