Fiefia ʻi he Toe Foki ke Tokoni ki he Kau Mahuʻingaʻiá
1 Ko e tokotaha kotoa pē ʻoku kau ki he ngāue fale-ki-he-falé ʻokú ne loto ke tokoni ki he kakai ʻoku mahuʻingaʻiá. ʻI hono fai ʻa e tokoni ko iá, ʻoku tau maʻu ʻa e fiefia mo e fiemālie loloto. (Fehoanaki mo Sāme 126:5, 6.) ʻOku fiemaʻu heni ke tau teuteu.
2 ʻOku kamata ʻa e teuteú mei heʻetau tauhi ʻa e ngaahi fakamatala fakaikiiki ʻi heʻetau lekooti fale-ki-he-falé. Hiki ʻa e kaveinga naʻe fai ki ai ʻa e talanoa ʻi he ʻuluaki ʻaʻahí pea mo e anga ʻo e fakakaukau ʻa e tokotaha-ʻapí. Te ke toe hiki nai ʻa e founga ʻe kamata ai ʻa hoʻo fetalanoaʻaki ʻi hoʻo toe fokí.
3 Ko e fakatātā, kapau naʻá ke lave ʻo kau ki he Lotu ʻa e ʻEikí ʻi hoʻo ʻuluaki ʻaʻahí pea ke tuku ʻa e polosiua ko e “Puleʻanga,” te ke malava nai ʻo lea nounou ʻaki ha faʻahinga meʻa hangē ko ʻení:
◼ “ʻI heʻeku ʻuluaki ʻaʻahi maí, naʻá ta talanoa ki hono fakahoko ʻo e finangalo ʻo e ʻOtuá ʻi he māmaní pea ʻe hoko leva ʻa e melino ʻi he tafaʻaki kotoa pē ʻo e moʻuí. ʻI he polosiua naʻá ku tukú, fakatokangaʻi muʻa ʻene lau ʻi he peesi 29 ʻo kau ki he ngaahi tāpuaki ʻe niʻihi ʻe fakahoko mai ʻe he Puleʻanga ʻo e ʻOtuá ki he kakaí.”
4 Kapau ko e tokotaha ko iá naʻe hehema ke taʻetui ki he ʻOtuá, leaʻaki ha faʻahinga meʻa hangē ko ʻení:
◼ “ʻI heʻeku ʻuluaki ʻaʻahi maí, naʻá ta fetalanoaʻaki ki he meʻa naʻe leaʻaki ʻe Paula ʻia Hepelū 3:4, ko ʻene fakahā ʻa e ngaahi ʻuhinga lelei ke fakaaʻu ʻa e fakakaukau ʻoku pau ʻoku ʻi ai ha tokotaha poto naʻá ne ngaohi ʻa e meʻa kotoa pē.” Toe lau ʻa e konga Tohitapú pea lave ki he peesi 8 ki he 11 ʻo e kiʻi tohi ʻOku ʻI Ai Ha ʻOtua ʻOku Tokanga Mai? pea ke hoko atu mei he fepōtalanoaʻaki naʻá ke ʻuluaki fai mo iá. ʻEke ʻa e fehuʻí pea ke lau ʻa e palakalafí, ʻo tuku ha faingamālie ki he tokotaha-ʻapí ke ne tali ʻa e fehuʻí. Kapau ʻoku feʻunga pea ke fakaafeʻi ia ke toʻo mai ʻene polosiuá pea mo fetalanoaʻaki fakataha ʻo kau ki he meʻa ko iá.
5 Kapau naʻe hā mei he tokotaha-ʻapí lolotonga hoʻo ʻuluaki ʻaʻahí, ʻoku fiemālie pē ia ʻi he meʻa fakamatelié pe faʻahinga meʻa kehe, te ke toe lave nai ki he tuleki ʻE Kei Tuʻu ʻa e Māmani ko Ení? pea ke lau ʻa e meʻa ʻoku ʻasi ʻi he peesi 6. ʻEke ki he tokotaha-ʻapí pe ʻokú ne holi ke moʻui ʻi ha māmani palataisi fakaʻofoʻofa. Ke tokoni ke toe hoko atu ke fakapapauʻi ʻene mahuʻingaʻiá, te ke ʻeke nai pe ko e hā haʻane lau ki ha fakatātā fakalototoʻa pe ko ha fakamatala ʻi ha makasini ʻokú ke ngāueʻaki.
6 ʻE lava ke ngāueʻaki ʻa e founga tatau ko ʻení ʻo kau ki ha kupu naʻá ke lave ki ai mei he Ko e Taua Leʻo pe ko e Awake! Lave ki he kupu ko ia naʻe fokotuʻu ʻi hoʻo ʻuluaki ʻaʻahí pea ke toki lave ki ha taumuʻa ʻoku mahuʻinga ʻi he kupu tatau pē pe ko e taha ʻi ha ʻīsiu ʻe taha ʻokú ke maʻu. Ka malava, lau fakataha ha konga Tohitapu pea ke ʻeke ki he tokotaha-ʻapí pe ko e hā haʻane lau.
7 ʻI he hā mai ha mahuʻingaʻia feʻunga, ʻe malava nai ke tuʻuaki ha tukuhau. ʻE toki fai pē ʻa e meʻá ni ʻi ha toki fakahāhā ʻe he tokotaha-ʻapí ʻene mahuʻingaʻia ki ha toe ngaahi ʻīsiu ʻo e makasiní.
8 Manatuʻi maʻu pē ʻa e kolo ke kamata ha ako Tohitapu. ʻOku faʻa fiemaʻu ke ʻi ai ha ngaahi ʻaʻahi ke fakatupu ha mahuʻingaʻia ke aʻu ki he tuʻunga ke toki fai ha ako Tohitapu. Fakahā hoʻo tokanga moʻoni ki he tokotaha-ʻapí ʻaki haʻo toe foki ʻi he vave taha ʻe malavá.
9 Ko e ongoongolelei ʻoku tau malangaʻí ʻokú ne fakatupunga ʻa e fiefia lahi. (Luke 2:10) ʻI he tali ʻe kinautolu ʻoku mahuʻingaʻiá ki heʻetau ngaahi feingá, ko e meʻa moʻoni ia ʻoku fakatupu fiefia. (Fili. 4:1) Tuku ke tau utu ʻa e fiefia pehē ʻaki ʻetau toe foki ke tokoniʻi ʻa kinautolu ʻoku mahuʻingaʻia ʻoku tau ʻilo ʻi he ngāue fakamalangá.