Kau ke Lavameʻa ʻi Heʻetau Ngāue Fakafaifekau Fakahaofi Moʻuí
1 Naʻe liliu ʻe he ʻapositolo ko Paulá ʻene lea fekauʻaki mo e ongoongo leleí ke ne “fakamoʻui hanau niʻihi.” (1 Kol. 9:19-23) Pehē foki, te tau toe lavameʻa lahi ange ʻi heʻetau ngāue fakafaifekaú kapau te tau ʻiloʻilo ʻo tokanga ki he mahuʻingaʻia ʻa e tokotaha-ʻapí mo teuteu ke liliu ʻetau fetalanoaʻakí ki he meʻa ʻokú ne fiemaʻú. ʻE ʻikai ke faingataʻa ʻa e meʻá ni ʻi hono tuʻuaki atu ʻo e Ko e Taua Leʻo mo e Awake! pe ko e taha ʻo ʻetau ngaahi polosiuá.
2 ʻI he ʻosi hoʻo fakafeʻiloaki koé, te ke kamata nai ke ke leaʻaki ʻi hoʻo ngaahi lea pē ʻaʻau ha meʻa hangē ko ʻení:
◼ “ʻOku tokolahi ʻa e kakai ʻoku tō ʻenau ʻamanakí ʻi he taʻemalava ʻe he ngaahi puleʻanga ʻo e māmaní ke tokonaki ha fakalelei ʻe ala fai ki he ngaahi palopalema ʻo hotau taimí. ʻOku aʻu ʻo tukuakiʻi ʻe he faʻahinga ʻa e ngaahi puleʻangá ki heʻenau ngaahi palopalemá. ʻOkú ke pehē ʻe ʻi ai ha puleʻanga te ne malava ke tokanga feʻunga ki he meʻa kotoa ʻoku tau fiemaʻú? [Tuku ke ʻi ai ha tali.] ʻOkú ke ʻiloʻi ʻoku tau maʻu ha talaʻofa alafalalaʻanga ʻo kau ki ha puleʻanga ʻa ia ʻoku pau ke ne toʻo kotoa ʻa e ngaahi palopalema ʻoku tau fehangahangai mo iá?” Fanongo tokanga ki he tali ʻa e tokotaha-ʻapí. Fakatuʻunga ʻi he meʻa ʻokú ne leaʻakí, mateuteu ke afe ki ha taha ʻo e ngaahi malanga kehekehe ke fai.
3 Kapau ʻoku ʻi ai ha meʻa ʻoku hā mai mei he lea ʻa e tokotaha-ʻapí ʻokú ne pehē ko ha Kalisitiane ia, te tau toki ʻeke pe ʻokú ne faʻa lotuʻaki ʻa e Lotu ʻa e ʻEikí. Kapau ʻokú ne tali ʻio, te tau malava leva ke lave ki he sīpinga lotu ʻiloa ko iá ki he konga ʻa ia ʻoku pehē ai, “Ke hoko hoʻo Pule, ke fai ho Finangalo, hange ko ia ʻi he langi ke pehe foki ʻi māmani.” (Mt. 6:9, 10) ʻOku fakamoʻoniʻi ʻe he meʻá ni ʻe ʻi ai ʻa e ʻaho ʻe fai ai ʻa e finangalo ʻo Sihová ʻi heni he māmaní. ʻE malava leva ke lave ki ha kupu ʻoku feʻungamālie mei he Ko e Taua Leʻo pe Awake! pe ko ha polosiua ʻokú ne fakamatalaʻi ʻa e fakakaukau ko ʻení, hangē ko e peesi 3 ʻo e Ko e Puleʻanga Te ne ʻOmai ʻA e Palataisi.
4 Kapau ʻe hā mei he tokotaha-ʻapí ʻoku ʻikai te ne tui ki he ʻOtuá, te ke malava ke lave kia Hepelū 3:4 pea ke hukeʻi ki he peesi 8 mo e 9 ʻo e kiʻi tohi ko e ʻOku ʻI Ai Ha ʻOtua ʻOku Tokanga Mai? Pea lau ʻa e palakalafi 9 mo e 10 pea ʻeke ʻa e fehuʻi ʻoku tuʻu ʻi lalo ʻi he peesí. Pe te ke malava ke lave ki ha kaveinga feʻungamālie mei ha makasini ʻoku lolotonga maʻu.
5 Kapau ko e tokotaha-ʻapí ʻoku hā ʻoku fiemālie pē ia ʻi he anga ʻo ʻene nofó, te ke malava ʻo ʻeke ʻa e fehuʻi:
◼ “Ko e hā ʻoku totonu ai ke tau fakakaukau fakamātoato ki he meʻa ʻoku leaʻaki ʻe he Tohitapú ʻo kau ki he kahaʻu ʻo e ngaahi founga pulé?” Pea te tau malava leva ke ngāueʻaki ʻa e fakamatala ʻoku maʻu ʻi he tohi Reasoning ʻi he peesi 154 mo e 155, ʻo kiʻi lea nounou ki ha taha pe lahi hake ʻo e ngaahi ʻuhinga ʻe valu ʻoku hā aí. Kapau ʻe fakahāhā mei he tokotaha-ʻapí ha mahuʻingaʻia, ngāueʻaki ʻa e tuleki ʻE Kei Tuʻu ʻa e Māmani ko Ení?, ʻo kamata mei he ʻuluaki palakalafi ʻo e peesi 2, ke toe hoko atu ʻa e fetalanoaʻakí.
6 ʻE ʻikai ke fuʻu lavameʻa ʻa hoʻo ʻuluaki ʻaʻahí kapau ʻe ʻikai te ke ʻai ke leleiʻia ʻa e tokotaha-ʻapí ki ha toe ʻaʻahi ʻe hoko mai. Ko ia ai, fakapapauʻi ke ʻeke ha fehuʻi mahuʻinga pea ke palōmesi te ke tali ia ʻi hoʻo toe fokí.
7 Filifili ʻa e meʻa ʻokú ke ongoʻi te ke fiemālie ʻi hono leaʻakí mei he kaveinga ko ia ʻi ʻolungá. Liliu ʻa e ngaahi fokotuʻu ko ení ke feʻunga ki he kakai ʻi ho kauhalá. ʻAi ke hoko ʻo anga-maheni mo e ngaahi polosiua, ngaahi tuleki, mo e ngaahi kupu ʻi he makasini ʻokú ke teu ke ngāueʻakí koeʻuhi ke malava ke vave hono liliu ʻa hoʻo fetalanoaʻakí ki he meʻa ʻoku fiemaʻu ʻe he tokotaha-ʻapí. ʻOfa ke tau teuteu tōtōivi ʻetau ngaahi fakamatala ʻoku faí “koeuhi koe ogoogolelei” pea ke tau kau ke lavameʻa ʻi heʻetau ngāue fakafaifekau fakahaofi moʻuí.—1 Kol. 9:23, PM.