ʻAi ke “Aʻu ki he Poiní!”
1 Kuó ke maʻu ha tokotaha-ʻapi ʻokú ne fakahohaʻasi hoʻo lea kamata ʻosi teuteu leleí ʻaki ʻa e ngaahi leá ni: “Ko e hā ʻokú ke fiemaʻú? Aʻu ki he poiní!” Ko e hā ʻoku lava ke tau ako mei ha meʻa naʻe hokosia pehē?
2 ʻOku taʻefaʻakātaki ʻa e kakai tokolahi ʻo e ʻaho ní. ʻOku nau fiemaʻu ke ʻilo ko hai kitautolu pea ko e hā ʻa e ʻuhinga ʻo ʻetau ʻi aí. ʻI he taimi ʻoku nau ʻilo ai ko e taumuʻa ʻo ʻetau ʻaʻahí ke talanoa ki he Tohitapú, ʻoku nau fakafisi nai ke fanongo. Ko e lau Tohitapú mo e fetalanoaʻaki fakalaumālié ʻoku ʻikai ko e ngaahi meʻa mahuʻinga ia ʻi he moʻui ʻa e kakai tokolahi. ʻOku lava fēfē ke tau fakatuipauʻi ʻa e ngaahi ʻapi peheé ʻoku totonu ke nau ʻai ha ngaahi miniti siʻi ke fetalanoaʻaki ai ki ha tuʻunga-lea faka-Tohitapu mo kitautolu?
3 Ko e Meʻa ʻOku Ngāue Lelei Tahá: Ko e kií ke fakahā ange ki he tokotaha-ʻapí ʻoku tokonaki mai ʻe he Tohitapú ʻa e ngaahi fakaleleiʻanga ʻaonga ki he ngaahi palopalema ʻokú ne fakahohaʻasi iá peá ke fai pehē ʻi ha ngaahi lea siʻi ʻe ala lavá. Ko e ngaahi lea kamata ola lelei lahi tahá ʻoku fakaeʻa ai ha fehuʻi pau ʻoku faʻu ke ʻai ʻa e tokotaha-ʻapí ke fakakaukau, ʻo hoko atu ʻaki ha konga Tohitapu ʻa ia ʻokú ne tali ʻa e fehuʻí. Te ke fiefia nai ke ʻahiʻahiʻi ha niʻihi ʻo e ngaahi fokotuʻu ʻoku hoko haké. ʻOku faʻu kinautolú ke tokoniʻi kitautolu ke vave ʻetau “aʻu ki he poiní” lolotonga ʻa hono langaʻi ʻa e mahuʻingaʻia ʻa e tokotaha-ʻapí.
4 ʻI he feituʻu ʻoku faʻa leaʻaki ai ʻe he kakaí ʻoku ʻikai te nau mahuʻingaʻiá, langaʻi ha fehuʻi ʻoku kaunga fakafoʻituitui kiate kinautolú:
◼ “ʻI heʻetau fakaofi atu ki he taʻu ʻe taha afe ka hoko maí, ʻokú ke ongoʻi fakatuʻamelie pe veiveiua? [Tuku ke ne tali.] Naʻe kikiteʻi ʻe he Tohitapú ʻa e ngaahi meʻa taʻemanonga ʻoku tau sio ki ai he ʻaho ní pea pehē ki honau ngaahi ikuʻangá.” Lau ʻa e 2 Timote 3:1, 2, 5 mo e Palovepi 2:21, 22.
◼ “ʻOku ʻi ai ʻa e hohaʻa lahi ʻi he fonuá ni fekauʻaki mo e tokanga ki he moʻui leleí. Naʻá ke ʻiloʻi ʻoku talaʻofa mai ʻa e ʻOtuá te ne solova fakaʻaufuli ʻa e ngaahi palopalema fakaemoʻuilelei kotoa pē?” Lau ʻa e Fakahā 21:3, 4.
◼ “ʻOkú ke fakakaukau ʻe maʻu ʻaonga fēfē hotau koló kapau ko e tokotaha kotoa pē ʻoku nofo hení te ne ngāueʻaki ʻa e ngaahi tefitoʻi moʻoni ʻo e Tohitapú?” Lau ʻa e Mātiu 22:37-39.
5 Koeʻuhi ko ʻetau ngāué ke malangaʻi ʻa e ongoongo lelei ʻo e Puleʻangá, ʻi ha taimi pē ʻe ala lavá, ʻoku totonu ke tau fakahanga ʻa e tokangá ki he meʻa ʻe fakahoko ʻe he Puleʻangá. Te ke pehē nai:
◼ “Naʻá ke ʻiloʻi ko e tohi motuʻa taha ʻi he māmaní, ʻa e Tohitapú, naʻá ne tala ki muʻa ʻe ʻi ai ʻa e founga-pule pē ʻe taha ki he māmaní kotoa?” Lau ʻa e Taniela 2:44.
◼ “ʻOkú ke fakakaukau ʻe fēfē ʻa e ngaahi tuʻungá kapau ʻe pule mai ʻa Sīsū Kalaisi ki he foʻi māmaní?” Lau ʻa e Sāme 72:7, 8.
6 ʻI he feituʻu ʻoku ʻi ai ʻa e kakai ʻoku lotú, ʻe lava ke ke ʻahiʻahiʻi ha taha ʻo e ngaahi talateu ko ʻení:
◼ “ʻOku fuesia ʻe he kakai tokolahi ʻa e fakafaikehekeheʻi koeʻuhi ko honau faʻahingá, lotú, pe lanu ʻo e kilí. ʻOkú ke fakakaukau ʻoku hōifua fēfē ʻa e ʻOtuá ki he tomuʻa fehiʻa peheé?” Lau ʻa e Ngāue 10:34, 35.
◼ “ʻOku tau ʻilo naʻe fakahoko ʻe Sīsū Kalaisi ʻa e ngaahi mana lahi ʻi hono ʻahó. Kapau ʻe lava ke ke kole ange kiate ia ke ne fakahoko ha toe mana ʻe taha, ko e hā ia?” Lau ʻa e Sāme 72:12-14, 16.
7 Kapau ʻoku taʻeloto ʻa e tokotaha-ʻapí ke fakaava ʻa e matapaá, te ke kamata nai ha fetalanoaʻaki ʻaki hoʻo pehē:
◼ “Ko e tokolahi taha ʻo e kakai he ʻaho ní ʻoku nau kina ʻi he fanongo fekauʻaki mo e ngaahi palopalemá. ʻOku nau fiemaʻu ke fanongo fekauʻaki mo ha ngaahi fakaleleiʻanga. ʻOku ʻikai ha veiveiua ʻoku moʻoni ia fekauʻaki mo koe. Ka ʻoku malava ke tau maʻu mei fē ʻa e ngaahi fakaleleiʻanga moʻoni ki heʻetau ngaahi palopalemá?” Tuku ke ne tali. Lau ʻa e 2 Timote 3:16, 17.
8 Ko e Hā ʻOku ʻIkai ke ʻAhiʻahiʻi Ai Iá? ʻOku faʻa hoko, ko ha fehuʻi faingofua, mo nounou ko e meʻa kotoa ia ʻoku fiemaʻu ke ne langaʻi ha mahuʻingaʻia ʻa e tokotaha-ʻapí. Ko ha fefine ʻa ia naʻe fakafepaki ki muʻa naʻá ne fakaafeʻi ha tuofāfine ʻe toko ua ki hono ʻapí ʻi he hili hano ʻeke ange ʻe ha taha ʻo kinaua ʻa e fehuʻi: “ʻOku lava ke ke fakapapauʻi ʻa e Puleʻanga ʻokú ke lotu ki ai ʻi he Lotu ʻa e ʻEikí?” Naʻe fieʻilo ʻa e fefiné ki he fehuʻí, pea naʻá ne tali ha ako Tohitapu. ʻOkú ne hoko he taimí ni ko ha sevāniti ʻosi fakatapui ʻa Sihova!
9 ʻI he taimi ʻokú ke lea ai ki ha tokotaha-ʻapi, loto-moʻoni ʻi hoʻo ngaahi leá. Lea mei ho lotó. ʻOku ngalingali tali lelei ange ʻe he kakaí ʻi he taimi ʻoku nau tuipau ai ʻoku tau mahuʻingaʻia moʻoni ʻiate kinautolú.—Ng. 2:46, 47.
10 Ko e ngāue ʻo hono malangaʻi ʻa e ongoongo leleí ko ha pole ia ʻi he ʻahó ni. ʻOku huʻuhuʻu ʻa e ngaahi ʻapi ʻe niʻihi fekauʻaki mo e kau solá. ʻOku moʻuiʻaki ʻe he niʻihi ʻa e moʻui fiefiá pea siʻi ʻa e taimi ke fakamolekí. Ka, ʻe lava ke tau fakapapauʻi ʻoku kei toe lahi ʻa e faʻahinga taau ke maʻu maí. (Mt. 10:11) Ko ʻetau ngaahi feinga ke kumi kiate kinautolú ʻoku ngalingali ʻe hoko ʻo lavameʻa ange kapau te tau ʻai ʻetau ngaahi lea kamatá ke nounou pea “aʻu ki he poiní!”